کلیات معجز شبستری (جلد دوم)

از ویکی‌نبشته
پرش به ناوبری پرش به جستجو
کلیات معجز شبستری (جلد اول) کلیات معجز شبستری (جلد دوم)  از معجز شبستری '



جلد دوم میرزا علی معجز شبستری

ایشیقلاندی[ویرایش]

 گنه ستارۀ بخت جوان ایشیقلاندی آچیلدی غنچۀ گل گلستان ایشیقلاندی  
  نگار گَلدی دونن بنده خانیه مهمان دانیشدی، گولدی، دل ناتوان ایشیقلاندی  
  دئدی یورولموشام، عاشق! سماوری دمله اِشیتدی بو سوزی چون چایدان، ایشیقلاندی  
  خلاصه قِینَدی سَموار، دمله دیق چایی بوشاتدیم، ایچدی او روحِ روان ایشیقلاندی  
  دئدیم بو چایِ معطردو مشک عنبردن تبسم ایله دی، هم استکان ایشیقلاندی  
  دئدی مبالغه دن اَل گوتور داخی، عاشق دئدیم نیه؟ دئدی: آخر زمان ایشیقلاندی  
  دئدیم که مجلس و محفلده گورموسن صد بار که سوندی نور حقیقت، یالان ایشیقلاندی  
  گلنده شوره، ووراندا قفاسینه ملت درست باخ، نجه گور روضه خوان ایشیقلاندی  
 سحاب جهل هنوز حکمرواندور ایراندا اینانمیون دئسه لر اصفهان ایشیقلاندی  
 جمال سعدی و خیام و طوسی و حافظ اگرچه نور وئریب بیر زمان ایشیقلاندی  
 و لیک فایده بخش اولمادی او نور بیزه نه اهل طوس نه شیرازیان ایشیقلاندی  
 مصادف اولدی خرافاتله چون اول لمعه او لمعه سوندی گینه، داستان ایشیقلاندی  
  قارانلیقا آلیشان گوزده تاب نور اولماز قاماشدی گوزلریمیز چون جهان ایشیقلاندی  
  لرستان حاجی سی چون مکه ده دئدی لبیک کلاهی دوشدی باشیندان، یامان ایشیقلاندی  
 بیر آز کثیفیدی پیراهنی آپاردی یووا توکولدی خزنیه بیتلر، طیان ایشیقلاندی  
   
 بزور پاشنه سنگ و به قوت بازو هزار شکر، او مبارک دابان ایشیقلاندی  
 کثیف حاجی گورجک بهشتیده حوری شرارۀ غضبیندن، جنان ایشیقلاندی  
 آتا عوام، آنا بی خبر، بابا جاهل نجه دیوم سیزه من سیستان ایشیقلاندی  
 دئدی: نه وقت اولارام من منور ای معجز دئدیم: اوغول او زمان که آنان ایشیقلاندی  
  او گونکه علم، چیخار کرسیه ندا ایلر گلون گلون که جمال زنان ایشیقلاندی  
 او گونکی گونده گورورسن که بیر مبارک نور وطندن ایتدی صعود، آسمان ایشیقلاندی  
 گیرر هلال، بولوت آلتینا خجالتدن او گونکی کوکب آیرو پلان ایشیقلاندی  
 هلاله اذن وئرین گتسون آیری دنیایه که نور علمیله ملک جهان ایشیقلاندی 

واعظ[ویرایش]

واعظ دیر له معتقد کوه قاف دور
دیو سفید تک چون اونون قلبی صاف دور

آب حمامیله آلار هر وقت دستماز
آلماز وضو گلابیله چون مضاف دور

یوخ اعتباری خظۀ ایراندا معجزا
قارپوز کیمی اونون که عذاری زیلاف دور

اورتر قبیح عمللرین اوستین جناب ریش
مؤمنلرین محاسنی مثل لحاف دور

یا شیح ائتمه غرغره صبح اولمیوب هله
قلیانی چک، اذان اوخویان فُنقراف دور

ساعتده اون آغاج طی ائدر اوتول آقا
حرف صحیح دور بو، نه لاف و گزاف دور

نه سُنّی دور، نه روس دو، نه ارمنی شوفر
باشین یارار هر ایل آدی عبدالمناف دور

اینجیتمه جانیوی اوزیوی سالما زحمته
بو عصریده کجاویه مینمک خلاف دور

معشوقی گورمگه مگر عاشیق یاواش گئدر
آقامون ادعاسی دئمک محض لاف دور

عشق ایلمیش محاصره حُسن شعوریمی
تقصیر ائده گر عاشق مجنون معاف دور



شوخلوخ[ویرایش]

دولتسرای ربّیمه گئتدیم گئچن گئجه
گوردوم که فرشی یوخ نئجه ییرتیخ جیریخ کچه

عرض ایلدیم بو فقریله بو افتضاحیله
مین قصر لر عطاء ائده جکسن بیزه نئجه

شمعی گَتور، چراغی گتور باتدی سینه میز
عشقون نه دور سنون بو چراغ معوّجه

بیر گون اکیل یاواشجا کلیسایه باخ گینین
سیر ائیله عرشه، فرشه، جلاله، بیجه بیجه

سنده مرمت ایله گیلن بو خرابه وی
معمار باشی غفاره دینه تا چکه ریحه

گوردوم الین ووروب بئلینه گولدی قاه قاه
"من عاقیلم" دئدی پولی وئرمم گوجه موجه

یا رب منی مؤاخذه ائتمه بو امرده
معجز سنیله شوخلوخ ائدوبدور دوشوب لَجه



تازه مولود حََقینده[ویرایش]

یارب گوره سن تابع قرآن اولاجاق بو؟
باشین یاراجاق قانینه غلطان اولاجاق بو؟

خیرنک بوغاجاق بو اوشاقی یا کی قیزیلجا؟
یا خود بویویوب بیر یئکه اوغلان اولاجاق بو؟

آرخاسینی زنجیریله صد چاک ائده جک بو؟
باباسی کیمی کهنه مسلمان اولاجاق بو؟

زیر و زیر و پش دو زَبَر اورگنه جاق یا!!
جیغ بیغ اوخویوب داخل نیران اولاجاق بو؟

ابواب جنانی باساجاخ باغرینه یا یوخ؟
یا رب گوره سن قائل قرآن اولاجاق بو؟

معلوم دگیل ایندی بونون مذهبی دینی
بلکه بویویندن سورا بیر خان اولاجاق بو؟

ئولدور منی یا رب او گونی گورمیوم ای کاش
امنیه و نظمیه و آژدان اولاجاق بو؟

وئرّم قسم آللهه سنی ای ملک الموت
آل جانین اگر عامل دیوان اولاجاق بو

ساققال قویاجاق قیخدیراجاق باشینی یا رب؟
معجز کیمی بیر صاحب ایمان اولاجاق بو.


قاتل قصاصی[ویرایش]

حبل المتین روزنامه سندن ترجمه اولونان

علی بیگ باشون آچ اگلش دیز اوسته
درست ایله نظر بو سرگذشته

سوزوم دوزدور اینان یا نور عینی
اینانمیرسان اوخی حبل المتینی

دگیل راوی فلان کبلائی مشدی
یازیر حبل المتین بو سرگذشتی

که بیر نا سید خونخوار ارذل
یتورمیش قتله بیر شخص مجلل

بیلیرمیش (قومدا) وار معصومه خاتون
تحصن ایله میش اوردا او ملعون

بونی یاخشی بیلیرمیش مرد قاتیل
اونی اوردان چیخاتماق غیر قابل

قدم قویسا اورا مأمور دیوان
اَزَر داشیله باشین ملا قربان

(دونر داشه حکومت) بسته گیرسه
چیخار شورش پلیسه امر وئرسه

حکومت عاقبت وئرمیش قراری
که آگاه ایله سونلر شهریاری

یازیلمیش محضر شاهه عریضه
گتیرمیش بو قضیه شاهی غیظه

ائدوب فی الفور شه طلابه تلفون
گرک حکما چیخا اوردان او ملعون

اگر اولمیه سیز بو حکمه عامل
اولار فورا سیزه تنبیه کامل

گتورمیش غیظه میرزانی بو فرمان
شریعت گئتدی اَلدن ای مسلمان

دئیوب عمامه سین وورمیش زمینه
جماعت باشلیوبلر شور و شینه

قسم یاد ائیلیوب بیر بیر جماعت
که ائتسونلر او خونخواره جماعت

ائده توهین هر کس اول مقامه
"توکون قانین دییوب" صاحب عمامه

گوروب بو حالی نظمیه اکیلمیش
حکومت قورخمش امنیه چکیلمیش

اولوب بو قصه دن چون شاه حالی
سارالمیش غصه دن گلگون جمالی

آخوند سِحر اِیله میش ملت قودورموش
"اوتول حاضر ائدون" فورا بویورموش

اوتول حاضرلنوب شه راکب اولدی
اودون قویموشدی آخوندلار اوجاقه

که ناگه وارد اولدی شه اوطاقه
آخوند گورجک شه الده تیغ عریان

کتاب صرف میری ائتدی قلخان
بش اون مین آیة الکرسی اوخوندی

ازیلدی باش قولاخ دوشدی بیلک لرر
بویاندی قانیله تحت الحنکر

سیوطی نین قابورقاسی قیریلدی
عوامل لر نموزج لر جیریلدی

چون اولدی لشگر میرزا شکسته
چویردی شه او دم یوز سوی بسته

باخوب ناسیده ملت آتاسی
تلاوت ایلَدی آیۀ قصاصی

ایشیقلاندی قیلینجی پهلوانین
دیغیرلاندی یره باشی شقینین

هزار احسن او سلطان غیوره
او شمشیره او بازویه او زوره

شها ویر بیر ئوپوم قانلی قیلینجون
باسوم بیر باغریما شانلی قیلینجون

شها شمشیر نادر دور او شمشیر
نه آهندور جواهردور او شمشیر!!

ایچوب چون مستبد قانی او شمشیر
بها بیچمک اونا ممکن دگیلدور

اولون معجزله هم آواز یاران
دییون ای کردگار حی سبحان

نظردن ساخلا ایران پادشاهین
عزیز ایت فتح و نصرتله سپاهین


قماربازلار[ویرایش]

دونن جماعته سویلردی گولده کی قازلار
کچل اوشاقلاری من بعد حمامه قویمازلار

خدا نکرده باش آچماق مود اولسا ایراندا
یقین هلاک اولاجاق غصه دن باشی دازلار

دیون مؤذنه ناراحت ایتمسون خلقی
که قورخورام اونی پورتیست ایده بی نمازلار

گیجه صباحه کیمی چای ایچر چکر جیغارا
اذانچی دامه چیخاندا یاتار قماربازلار

بیر آز تنزل ایدوبدور مظنه تریاک
طسی ده، تیل ده گنه خلق حوقانی سازلار

دیه رله زلزله باعث لرین اوین یخاجاق
اوخور یازیر قچینه هم گیر جوراب قیزلار

بهالیق ایتدی پریشان بیزی او گونلرکه
روبند ووراردی ایاقلق گیه ردی گلنازلار

چکر هر هفته چیتون اوستنه بش اون شاهی
تکذبانلارا چوخ ظلم ایدیر او بزازلار



سربازگیرلیق[ویرایش]

قوشون اولماق یاراشار بی پدره، دربدره
بیز اوز اولادیمیزی قویماروق اولسون فجره
دوتاروخ یوخسلی ویروخ دم تیر و تبره
ئولر ئولسون به جهنم و به فی النار درک

دولت ایستیر قویا قانون نظام اجباری
یعنی همکاسه ایده دینسیزایله دینداری
هرکس اولسا بونا راضی داغیلار پرگاری
لعنت ایلر اونا هر صبح ومسا جن وملک

من نه نازیله بونی بسله میشم صبح ومسا
ایلیه م تا قوجاوقتیمده اونی الده عصا
نه که سرباز اولا بیر گوله ییه قان دا قوسا
آچا آغزین یوما، رنگی گوره ره مثل قدک

اولمارام راضی قویا باشنا شاپقا پسریم
شمرتک چکمه گیه پاینه نور بصریم
قویمارام اوغلومی سرباز اولا وار سیم وزر
یم چیخ بو کتدن اوزاق اول گیت گیله الله معک



شوال اولدی گل[ویرایش]

ای صبا گیت کوی یاره سویله شوال اولدی گل
آتدی افساری باشینان خلق، خوشحال اولدی گل

هر طرفده کوفته بریاندا، خاما بریاندا، بال
معده لر مثل دکان مرد بقال اولدی گل

ایچدی سو شیشدی باغرساقلار مثال کره نای
ای طبیب بی مروت ملت اسهال اولدی گل

تیر مژگانی عبث قویما کمان ابرولره
سینه درد هجردن مانند غربال اولدی گل

جهل، بی وقر ایلدی اسلامی یا صاحب زمان
جدوون امت لری باکوده حمال اولدی گل

دلبرا اغیاردان خوف ایتمه هیچ عاشقلرون
آتدی تریاکی قیزیشدی رستم زال اولدی گل

چکدی تیغ آیت الکرسی نی میندی استره
صاحبا حاضر بدعوا کبله زینال اولدی گل

سنده ای واعظ مین دانا حوری یارا وقف ایتکلن
معجزون چیخدی باشینان عقلی ابدال اولدی گل



سید[ویرایش]

 سبب نه دور اولا محتاج این و آن، سید زراعت ایلمیه آچمیه دکان، سید  
 جهت نه دور دورا منبر دیبینده ذلتله نچون گرک ال آچا خلقه بو جوان سید  
  نه خسته دور نه چولاقدر نه کور دور نه قوجا گوراخ نه ایش گوره بیلمز بو پهلوان سید  
 احیر اولوردی یهوده نچون او شیرخدا علی وصی نبی شاه انس و جان، سید  
 غیوردی شه مردان، بس هانی سنده، او غیرت اسدالله دن نشان، سید  
 آجیندان اولسه ال آچماز رعیته آغا حیا ایدر اوتانار سنده بیر اوتان سید  
 اوقدر یالواریسان بیر قران ایچون خلقه نه فرش اولار نه عمارت او بیر قران سید  
 اگر یوز ایل ایده سن عمر بو سیاقیله نه کوینکون اولاجاق تازه نه عبان سید  
 عباسی کهنه، دونی جنده، باشماقی یرتیخ آتان یاشیندادی باخ بیر اونا اویان سید  
 گدالق ایلمگیله کیشی غنی اولماز ولیک تاجر اولار لبلبو ساتان سید  
 نقدر صاحب یوزمین تومن سیدلر وار اولار نجه قازانوب سنده گیت قازان سید  
 سن ئوز ئوزون نیه بدبخت ایدیرسن ای جاهل علیل دور بدنون یا قوجالمیسان سید  
  اوتانما ایشله که الکاسب حبیب الله او اشرفیدی یا که ال سیخان سید  
 سؤال گور نه غلط دور که کور مادرزاد سؤاله آچمیر الین ایشلیر هر زمان سید  
  دولاندورار سنی ده کسب و کاریله نجه کهدولاندیریر اونی خلاق آسمان سید  
 محرمیله اوروجلوقدا اون تومن آلیسان یتیر تمامه اوچ آی دان سورا اینان سید  
  یاوان چورک پولودور اون تومن که سن آلیسان بیتر او پول و گلر قیش اولار بوران سید  
  قیچوی چون او سویوق کرسیه اوزادورسان گلر گوزون اویونا گورداکی بابان سید  
  نجه کی گورمه دی بیلدیر کوپون قوغورمانی بو ایل گنه قالاجاق دور آشون یاوان سید  
 گرک گنه ساتاسان او سماوری قیشدا گرک گنه قالا تنها او چایدان سید  
 اگرچه تلخدور ازوای دن بو منظومه اگر قولاق ویرسن ایتمه سن زیان سید  



بیکارلارا نصیحت[ویرایش]

 هر شخص گرک ایلیه بیر صنعته خدمت بیر ایش گوره تا اولمیا محتاج جماعت  
 ناچار گرک ایش گوره قیشدا همی یایدا چون مفته دگل چای، چورک، قند و پنیر، ات  
 اما ایله بیر ایش گورسن که اونی تاری منع ایلمیه شرع و پیمبر ویره رخصت  
  می ساتماغی منع ایلیوب الله تعالی وار منفعتی ساتماغون اما او تجارت  
 اسلامه یاراشماز اونی ساتسون و قازانسون مؤمن اونی ساتسا گیدر ایمانی اوساعت  
 می ایچسه گه‌زه‌ر کوچه و بازاری تومانچاق مؤمن کیشی تیز کیفله نی ای اهل دیانت  
 گه نعره چکر، گه قمه قداره مسلمان بیر بطری عرق ایلسه داخل بعمارت  
  قویما دکانا وارد اولا ارمنی قارداش باشدان ایاغا جمله کثافت دی نجاست  
   
  عکاسه دیون آغزینی باسسون سویا هر گون بیر قدر سیز الله ویرون عکاسه نصیحت  
  بیر یاخشی دوشون هیچ بیلیسن نیلیسن اوغلان خلاق میسن که چکیسن نقشه و صورت  
 گورخوم بودور آخیر وره(روح) عکسه حسن خان عکس آغزین آچا سویلیه ای اهل ولایت  
 عکاس اولوسوز هرنه الورسوز اولون اما بیکار اتوروب ایله میون خلقه اذیت  
 هرچه دییرم حاجیه ویرمیر منه دکان بیلمم نیه حاجی سوزیمه ایتمیر اطاعت  
  ایکاش سینایدی ده‌وه نون قول قیچی یولدا حاجی قایدیدی ایوه با شرم و خجالت  
 ایکاش ایتیریدی پولونی یولدا تماماً نه مکه گوریدی نه مدینه نه زیارت  
 ایوای منیم حالیمه که ملت اویاندی به به نه خوش ایامیدی ایام جهالت  
 عکاس ندور عکس ندور بیلمزیدیق هیچ چوخ یاخشی گچردی بیزیم ایام صباوت  
 سیندی علمم ئولدی علمداریم او گونکه حاجی، مشدی ایله دی تبدیل قیافت  
 هر نه دییورم حاجیه رنگین قارالوبدر ویر اذن قویوم دالووا بیر یاخشی حجامت  
  باخمیر سوزومه گلمیری حمامه ولیکن آخر بوغاجاق حاجینی افراط حرارت  
  دوشدی نیجه که موددان او باش یارماخ عم اوغلی موددان دوشه جاقدر اوحجامت ده نهایت  
 سققل گیده جاق بیغ گیده جاق جمله کوکندن هرکس قویا سققل اونا ایتسونله شماتت  
 معجز دیمه دیم من سنه دلاک دکانیندا خلقین بوغونا سققلینه ایتمه دخالت  
  چوخ بیزلمه قوی یوخلیا بو کهنه قفالر ایوای اگر دیسگینه بیدار اولا ملت  
 قولارین آچوب گرنشه گر بو جنوارلار طاقت گتیره‌نمز داهی زنجیر اسارت  
 سن خود سبب اولدون بو ایشه خلقی آییتدون یاتماز داخی بو قوم الی روز قیامت  



ویر گوراخ[ویرایش]

کدخدا سویلر که سنده مالیاتون ویر گوراخ
اوستا قاضی دا دیور خمس و ذکاتین ویرگوراخ

قاضینی راضی ایدوم یا کدخدای دولتی
بیر یول اورگد بندیه بو بارده یا امتی
سرباز و توپچی غصه سی آرتیریر خشگیتی
سنده آل بو جوتلوقی حب حیاتون ویرگوراخ

اوچ نفر سرباز ویردوخ هر اوچی ایتدی فرار
غصه و غمدن بدنده قالمیوبدور اختیار
هر اوچونده اوددا یاندیرسین گوروم پروردگار
دوشموشم خوراکیدن وار کاربوناتون+ ویرگوراخ

ال یخامدان چکمیور سربازگیر ایستیر عوض
یوخ پولوم شیطان دییور سرباز گیرین باشین از
ینجه رم باشین قولاقین آه و زار ایلر تکذ
سویلور آلله یوخسولا صبر و ثباتین ویرگوراخ

بیر طرفدن مرثیه خوان ایستیری حق البکا
آغلادوب چونکه محرم‌ده منی صبح و مسا
هر گون اون‌بش دفعه شاگردی دایانور قاپویا
سه سلیری آی کربلائی بش‌مین آلتون++ ویرگوراخ

بیر طرفدن ایپ دوتور قاضی آغا سققالیما
قبضه‌دن گر مو قدر نقصان اولا وای حالیما
قورخورام آخوند قویا گمرک منیم بو یالیما
گوندره طلابی هرگون عایداتون ویرگوراخ

بیر طرفدن مغ‌مغا ملعون ایتیلدیر اولگوجی
معجزه ایلیر اذیت خاصه لامذهب جوجی
بیر طرفدنده اذان خوانین نه قدری وارگوجی
سه سله نیر ملعون کیشی دور واجباتون ویرگوراخ

+اسم مسهلی است

++اسم پول

اولار اولماز[ویرایش]

 خدا گر ایستیه بیر لوت امیر تومان اولار اولماز نه دن بو اولماسین آیا یوغوت عیران اولار اولماز  
 هانی مجلیسده بیر ساقی هانی مطرب هانی مونس شراب ناب اولان یرده گوزه‌ل حانان اولار اولماز  
  سوزونده گوزلری جانان،اولاندا لبلری خندان تماواً خطه ایمان اونا قربان اولار اولماز  
 رفیقون گلمدی او قانوی تلخ ایتمه ای ساقی قویارسان باشینا بیر بورک، قیز اوغلان اولار اولماز  
 جهاندا یوخدی بیر مشگل که عقل عاجز اولا اوندان بیرآز فکر ایلسه انسان هر ایش آسان اولار اولماز  
  اگر قیزلار دا اوغلانلار کیمی بیر امتحان ویرسه بیر اولسا مرد و زن، ایرانیمیز ایران اولار اولماز  
 سنی ویرم قسم آللهه موهوماتی ترک ایله فنون جهلیله معمورلر ویران اولار اولماز  
 طبیعتده سرور و حزنی توأم خلق ایدوب خالق ایکی قرداش حقوقی قسمتاً یکسان اولار اولماز  
 همیشه قلبلر محزون همیشه سینه لر دلخون سرورین قسمتین غصب ایله مک طغیان اولار اولماز  
  سنون ظلموندن هر ساعت یتیمان وطن نالان یتیمی آغلادان بی دین، بی ایمان اولار اولماز  
 مسلمانلق نچون آساندی انسانلق نچون مشگل بوفرقی حس ایدن نازک جگرلر، قان اولار اولماز  
 گوتور او گوشگیری بیر دانش نوحیله ایساقی گوراخ عالمده بیرده مثل اول طوفان اولار اولماز  
  گوررسن عید جمشیدی گوره‌ن ایرانلی قارداشلار گچن ایامی یاد و بود ایدوب گریان اولار اولماز  
 دییر علت نه دور بخله سبب نقص حرارتدور بوقانسیز جسملرده مایه احسان اولار اولماز  
 حساب ایت بیر گوراخ بش آلتی آرشین نیلگون بزدن فقیره عاجزه بیر دونلا بیر تومان اولار اولماز  
  همیشه میل ایدر دولتلی بال، پشمک، جوجه، ککلیک حرارت بیله نعمتلرده بی پایان اولار اولماز  
 خدایا سن بیزی عمداً آتیرسان نار نیرانه غنی گورسه اوزوین دولتلی، نافرمان اولار اولماز  


اروجلوق[ویرایش]

رحیم ایله آخر اولدی قدیم کمان اروجلوق
رنگ و رخم سارالدی مثل سامان اروجلوق

گلوب ییه ر نهاری افطاری هم سحوری
چایی ایچر چکر هم قلیانی خان اروجلوق

خانلر دییه رگدالر گورمز بهشتی هرگز
واعظ دییه ر سیزوندور حور جنان اروجلوق

صوفی دییه ر بیزیمچون حق خلق ایدوب بهشتی
گتمز جنانه هرگز ایرانیان اروجلوق

گبر و یهود و ترسا ایلر بو ادعانی
بیلمم کیمه جهنم الموش مکان اروجلوق

بی چاره فعله ایشلر تا عصر تر ایچینده
اربابدن آلار بیر سورتوک قران اروجلوق

خباز بی حیایه عطاره ویرسه آلماز
آج آجنه گزر تا وقت اذان اروجلوق

آلتی شاهی آلارلارده یک ایکی قرانه
یوخسول آلار بیر آز چای بیر قدر نان اروجلوق

گویا گلوب خدادن حکمی سنه دییرلر
اوچ گون سورا ایدیرسن نقل مکان اروجلوق

قال گوزلریمی باغلا آغلا جنازم اوسته
جانیم گلوب دوداقه گتمه دایان اروجلوق

چونکه امین سن سن دیندار پاکدامن
اول بندیه وصی سن ای مهربان اروجلوق

اموالیم هرنه اولسا سات کبله علیمراده
نقد ایله قوی کاسایه مثل فلان اروجلوق

آل بیر کفن بیرآزدا کافور سدر پنبه
تابوتمی مزاره ایله روان اروجلوق

قورخوم بودور لحدده جسمیم دونا سویوقدان
یاندیر مزاریم اوسته بیر باغ تیکان اروجلوق

من بیلمرم عربجه نیلوم دیه رله چونکه
بیلمز نکیر و منکر ترکی زبان اروجلوق

واعظ دیر که اول ئورگن عرب لسانین
لازمدور آخرتده جون او لسان اروجلوق

من ربک دییه نده نکیرین قالما حیران
باشین ازر اوساعت گرز گران اروجلوق

مانعدور شیخ، واعظ بو ایشلره دیه سن
حقدن اوتانمیورسن، خلقدن اوتان اروجلوق

ئورگن زبان روسی اول وطنده یاخشی
پس گیت دیار روسه راحت دولان اروجلوق

معجز دیر غلط در ئوزگه دیاره گتمک
حاضردر هر مکاندا روزی رسان اروجلوق


زبانحال معجز[ویرایش]

آی آغلار ماهوت یاتار خابنا
قلنج، قمه ترسه گیرمز قابنا
هر ایل بیر یول عوض اولار کابنا
سحر چیخان گون اذانا قالمادی

ایسی دوشدی داغلاردا قار اریدی
چای آزالدی چای کهریزی قورودی
بیلدیر ایشده آقا عبدالله واریدی
بو ایل دنیا رفیع خانا قالمادی

بو ایل دنیا یوز چوویروب خداما
کبله محمود ایشی سالوب نظاما
فلک ویردی باشیندن بیر قاراما
صفر بیگدن بیر نشانه قالمادی

یواش یواش زبانیمز دگیشیر
تازه فکر کهنه ایله دوئیشیر
آییل قارداش گونش یره یاپشیر
چای پایلاندی یوخیانا قالمادی

بوندان اول خلق چالاردی طوطگی
چوخ ویرردی حاصل باغی، پته گی
پول ویرمه سن سید ویرار کوتگی
مؤمن کیشی بیرجه دانا قالمادی

بوندان اول حاجی اوغلی چوخیدی
دگیرمانون مالیاتی یوخیدی
سلاحمیز عمودیدی اوخیدی
هفتیر چیخدی ایش قالخانا قالمادی

سربازیمیز ایاقیندا یمنی
کفلنردی چون چکردی قمه نی
بویاناردی کدخدانون کفنی
شکر آللهه او زمانه قالمادی

قدیم زمان خلق گیدردی جوتینه
باج ویرمزدی تریاکه یا توتونه
باش اگه ردی قول چوماقون ایتینه
قول قیریلدی تازیانه قالمادی

سیف لشگر ال اوزادیر هر یانا
خلیلی یه شبستره دریانا
گوز تیکمیشم منده شهر مایانا
بو طرفده آب و دانه قالمادی

سیف لشگر دیر آچون گوزوزی
تز پول ویرون اویناتمیون ئوزوزی
بیر گورسیدیم خدام دییور بو سوزی
فقرایه سالیانه قالمادی

فقیر دیر یانه یانه سرهنگه
عبث یره گولله سالما تفنگه
ایکی شاهی بو گون ویردیم لولینگه
پولوم بیتدی کریمخانه قالمادی

دونن گیتدیم بورج ایلیوم فلاندان
یوخدور دیدی یوز آند ایچدی یالاندان
شبیستری دوپ دولاندیم اذاندان
آج و سوسوز تاب و توان قالمادی

اوغلان دا یوز قویوب گیدیپ او تایه
اونون باشی منی سالوب خطایه
ال چکمه سن ال گوتوروم خدایه
چونکه آیری آستانه قالمادی



انبار دارا خطاب[ویرایش]

خدا رحم ایتدی نازل اولدی رحمت
یاغیش یاغدی ایشیقلاندی زراعت

یاغیش یاغدی یاشیل اولدی چمنلر
آچیلدی لاله لر خوش نسترنلر

یوموشاندی زمین ای جوت سورنلر
اوکوز ایتمز داخی یردن شکایت

دورون ای کوکب بختی یاتانلار
دورون ای بوغدیا آرپا قاتانلار
توکون گوزیاشی ای غله ساتانلار
اوقدری که گوزوز اولسون جراحت

دیدیم بوغدا آلوپ ییغان سرایه
غمون آرتار بولود گلسه هوایه
پولون چوخدور آپار ویر قند و چایه
یاغیش یاغسا اونا ویرماز خسارت

یاغس مسرور ایدر اهل دهاتی
اوجوزلانماز ولی چایی، نباتی
آغیردور قند و چایون مالیاتی
اونا نه سنده وار نه منده طاقت

یاغیش ایلر یری سیراب عم اوغلی
که یعنی گوج له نر خیشاب عم اوغلی
اوجوزلاتماز سوئی میرآب عم اوغلی
اگر یاغا هرگون بش آلتی ساعت

ویره ر سو نرخینا حاجی ترقی
خدا ویرمز اونا، پیغمبر حقی
هلاک ایلر سوسوزدان مستحقی
مثال ابن سعد بی مروت

بهارون چون گیلاسی وار خیاری
اوشاق صاحب لری سویمز بهاری
صباح اوشقون باشین قوزار یوخاری
یتیش امداده یا شاه ولایت

اوشاق واریوخ نه دور بیلمز دیه ر آل
الهی اولمییدی کاش بقال
اگر سنده اولیدون صاحب اطفال
یاراتمازدون بوقدری ناز و نعمت

نه بقال دا وار انصاف نه ده رنده
هجوم ایلر اوشاق الچه گورنده
پلاسی سات و یا قاچ گیت مرنده
ویا گیج آبرودن تا قیامت

قازاندی یوز تومن بیچاره معجز
دیدیلر آل بیر آروات یاتما یالقوز
اونی خرج ایتدی تویدا قالدی پولسیز
گل ایندی ایله باعث کاره لعنت