کلیات معجز شبستری (جلد اول)

از ویکی‌نبشته
پرش به ناوبری پرش به جستجو
' کلیات معجز شبستری (جلد اول)  از معجز شبستری کلیات معجز شبستری (جلد اول بخش دوم)




محتویات

سنین[ویرایش]

 زینت وئروب جمالیوه گیسولرین سنین قان ایلیری قیلینج کیمی ابرولرین سنین 
 قوربانیم او قاش و گوزین، کیپریکلرین، لبین لعل لبون ایچینده کی اینجولرین سنین 
 جلاده وئر باشیم کسه، سن گیرمه قانیمه قورخوم بودور کی اینجیه بازولرین سنین 
 ائتدی بلای عشقه گرفتار گوزلرین معجز هانی؟ سوروشمادی جادولرین سنین 
 یانسین گوروم بو آتش هجرانه من کیمی آللهه آند ویریرم او بدگولرین سنین 
 بو شهر ایچینده بیر گونول آباد قالمادی ای سنگ دل که ییخمیا هندولرین سنین 


کاش[ویرایش]

 سنین او گول یوزیوه من گولاب اولیدیم کاش ایاغوه بالا بیر جوت جوراب اولیدیم کاش 
 کتابیله دانیشیرسان، دانیشمیسان منیله گئجه الونده سنین بیر کتاب اولیدیم کاش 
 گونش سنی گوره ر هر گون، و لیک من محروم چوخ آرزو ائدیرم آفتاب اولیدیم کاش 
 گلنمیرم او را چوخدور کرایۀ بالون الاهی من قجله یا غراب اولیدیم کاش 
 شرابیلن گونی خوشدی، منیله یوخ آراسی او بیوفانین الینده شراب اولیدیم کاش 
 اوتانیرام که دییه م یوللا بندیه بیر ماچ نه دور بو شرم و حیا، بیحجاب اولیدیم کاش 
 رقیب قویموری من کام دل آلام سندن رقیب چشمینه تیر شهاب اولیدیم کاش 
 دونن بیری دئدی واعظ گئدیر بهشته طرف ئوزوم ئوزومه دئدیم اهل عذاب اولیدیم کاش 
 یوخودا معجزه بیر ساعت طلا وئردین گَلم سنین کیمی عالیجناب اولیدیم کاش 

غزل[ویرایش]

 یاریم سحر گونش کیمی چیخدی اوتاقدن آز قالدی ضعف ایده اوره گیم اشتیاقدن 
 آیینۀ جمالینه باخدیم، جمالیمی گوردیم که گون کیمی سارالیبدی فراقدان 
 دوشدیم ایاغنه، دئدیم: ای یار محترم گل، باخ رنگ رویمه، اَل چک نفاقدن 
 اول گونکه اولدی قاش و گوزون متفق سنین اولدیم خراب خانه من او اتفاقدن 
 فطره وئریر فقیره غنی، سنده وئر گوره ک بیر ماچ آبدار، او سیمین بوخاقدن 
 اولدی نصیب معجزه وصلت هزار شکر رحم ائتدی یار دوشدی گونول احتراقدن 


مشغولم[ویرایش]

 نه تسبیح و نه تقدیس و نه قرآنیله مشغولمبو گونلر من کنار و بوس جانانیله مشغولم 
 سوزَنده گوزلرین جانان، دوشور اعصابیمه لرزهوجودیم خسته دور، پیوسته درمانیله مشغولم 
 داخی وعظ ایلمک ممکن دگولدور بَندیه، چونکهجمیع احکامه دارا بیر مسلمانیله مشغولم 
 خیالیم وار یازام شرح کتاب حُسن آیینهدواته توکمیشم چرنیل، قلمدانیله مشغولم 
 ید بیضاسی وار ناز ایلمکده، عشق ساتماقدارموز عشقه واقف بیر سخندانیله مشغولم 
 یوزی گُل، کاکلی سنبل، دهانی پسته، بوی بستهگَهی ناف مُدَوَّر، گَه زنخدانیله مشغولم 
 منی یالقوز قویون یاریمله ای یاران، سیزی تاریبو گونلرده نه دینیله، نه ایمانیله مشغولم 

ایستر[ویرایش]

 مریض عشقه ای دلبر طبیب مهربان ایسترعلیل درد هجرانم گونول آرام جان ایستر 
 دهانین غنچۀ پسته آچیلسا گونلی شاد ایلربو روشندور که: یار یارین همیشه شادمان ایستر 
 لبین سویلر که: من قندم، او قنده من ده خواهندمنه تنها من سنه بندم، سنی جمله جهان ایستر 
 جمالین گلعذارین اییل بیر گُل دریم جانانگارین گورمگه عاشیق الینده ارمغان ایستر 
 جهاندا یوخدو مانندین، مثال زلف دلبندیناو رفتار خوش آیندین گوره نلر هر زمان ایستر 
 همیشه آرزو کشدور جمالین سیرینه دیدهو لکن گوزلرین گورجک اونی تیر و کمان ایستر 
 }مژه ن بیر اوخ ویریب قویدی کمانه، گوزلرین آتدیاورکدن عاشقی ده لدی اولوب تسلیم امان ایستر 
 دئدیم چاه زنخدانین نه قدری طولی وار، سویلهدئدی عاشق، جنون اولماخ، محبت امتحان ایستر 
 الونده دستۀ رعنا، ویره رسن معجزه یا نهگئدیرسن تک گلستانه، یانیندا پاسبان ایستر 
 بویون سرو خرامان تک، چکیلمیش سمت افلاکهاُتور بیر بوسه لطف ایله، آیاقدا نردبان ایستر 

اولمیان یرده[ویرایش]

دانیشماز بلبل شیدا، گلستان اولمیان یرده
گونول شاد اولماز هرگز باغ و بستان اولمیان یرده

گوزوم باده، سرشکم می، مزه م غم غصه ای ساقی
شرابی نیلرم من، تازه جانان اولمیان یرده

یاخاسین ییرتمییدی، وورمییدی باشینه سیلی
نی نیه یدی بس بو ملت، علم و عرفان اولمیان یرده

دییرسن ساقیا، حاجی گولور پاریس شهرینده
مگر آغلار بنی آدم مسلمان اولمیان یرده

فرنگی دلبر الده باده هر دم سویلر: ای عاشق
نئجه زیست ایله سیز خوبرویان اولمیان یرده

الوندن ایچمه سین باده، لبوندن آلماسین بوسه
مقدس نیله سین بس، حور و غلمان اولمیان یرده

ملامت ائتمه واعظ آغلارام قیرخ ایلدور ایراندا
نولور بش گونده گولسم آه و افغان اولمیان یرده

دونن بو مصرعی بلبل اوخوردی صحن گلشنده
چتیندور دین و ایمان ساخلاماق نان اولمیان یرده

نه رشوتخوار و نه سارق نه واعظ خاک مغربده
تاپولار بیله ملعونلار دبستان اولمیان یرده

دئدیم گل بیر گئده ک واعظ کلیسایه، دئدی حاشا
عبادت ائتمه رم من چای و قلیان اولمیان یرده

خیال خام جنتله گونول خوش ائتمه ای زاهد
گویرمز لاله و گل، برف و باران اولمیان یرده

نه چاییله قیزار جانین، نه کنیاکیله ای معجز
دوغیدی کاش آنان سنی، زمستان اولمیان یرده


یاشاماق[ویرایش]

نه خوشدی بیر صنم مه جمالیلن یاشاماق
همیشه عزت و جاه و جلالین یاشاماق

فراق دردینه بیر چاره ایلیون یاران
محالیدور گجه گوندوز او حالیلن یاشاماق

امید وصلیله خوش ساخلا خاطرین عاشیق
فراقه چاره ائده نمزملالیلن یاشاماق

فقیه مدرسه هرگز یِمزدی مال حرام
اگر میسّر اولیدی حلالیلن یاشاماق

بهار عمری گچیبدور بیزیم تکذبانین
دوشوب خیالیمه بیر نونهالیلن یاشاماق

اسیر شهوت اولوب عقلین ایلمه زایل
سنه یاراشماز عموجان، مارالیلن یاشاماق

جوان ایچوندی دف و نای و مجلس و عشرت
قوجایه عیب دی زورنا قاوالیلن یاشاماق

جلال سلطنت آلداتماسین سنی ای قیز
ئولوم کیمی آجیدور آغ ساقالیلن یاشاماق

دئدیم اوتور دیزیم اوسته، اَیا نگار جوان
که خوشدی معجز شیرین مقالیلن یاشاماق

دئدی چکیل اویانا سورتمه ساققالین ئوزومه
منیم ایشیم دگی جنگ و جدالیلن یاشاماق

گلمز[ویرایش]

 غم چکمگیله میل طبیعت اَله گلمزتسبیح چِویرمکله شریعت اله گلمز 
 بیر دُرّ گرانمایه دی ناموس و شرافتزحمتسیز عزیزیم، او شرافت اله گلمز 
 ناموس ایچون عالمده نه قدری توکولوب قانناموس گئدندن سورا قیمت اله گلمز 
 عصمت آراما زمرۀ اسرار چکندهآختارما که تریاکیده غیرت اله گلمز 
 قاچماقدان ئولوم یاخشیدو سردار غیورهسردار جبون اولسا غنیمت اله گلمز 
 جهلیله قدم باسما طلسمات جهانهعلم اولماسا، مفتاح فضیلت اله گلمز 
 ساقی منی مسموم ائله، مطرب دور ایاقهسنسیز گوزلیم زادِ فضیلت اله گلمز 
 معجز دئمه دیوانه یه لازم ده گی زنجیربو سرعتیله ایسته عزیمت اله گلمز 



عاشق پریشان[ویرایش]

همیشه فکری بودور عاشق پریشانین
او گُزلریندن ئوپیدی، اولیدی قوربانین

قاپونی باغلاما ای باغبان حسن جمال
مرخص ائله منی بیر گوروم گلستانین

خلوص نیتیله گلمیشم تماشایه
ائشیتمیشم گول آچیب تازه نار پستانین

نه نار درمگه گلدیم نه گول بو گولشنده
نه دور زیانی سنه، خشکه بیر تماشانین

نظاره نقص یتیرمز گولین لطافتینه
داها گُزللُشی، بارین سیلنده هیوانین

رسوم عشق و محبتدن آنلاماز مفلس
بیلر دوشابی اولان لذتین مربانین

نظاره قیل نئجه گور خلق فوج فوح گلیر
زیارت ایلمگه کعبۀ زنخدانین

گولاب اییی گلیر آغزوندان آشکار سنین
گول اوسته نصف اولنون یوخسا دُرّ دندانین

اگر دییم لبیوه قند، دهانیوه گلقند
زجاج قلبی سینار، پشمکیله خرمانین

غلطدی زلفیوه ریجان دئمک و یا مرزه
او رنک و بویی هانی مرزه ئیله ریحانین

او چشم مستیوه ایلر فدا بِلا تردید
وئریلسه عاشیقه مالی تمام دنیانین

او خال شاه، او عارض، او زلف مار سیاه
فدا اولوم سنه اینجتمه زیر دستانین

یازاندا بو غزلی نصف لیل گئچمیشیدی
یاواش یاواش ایشیغی تار اولوردی لامپانین

خانیم آییلدی بو اثناده گوردی من یازیرام
دئدی: دو یات کیشی توزلی قالا قلمدانین

تمام فیکریوی حصر ائتمیسن غزلیاته
دوشونمیسن که کوپی بوش قالیب قوورمانین

صباح اولاندا جوابین نه دور طلبکاره
مگر وئریلمیه جک مالیات دیوانین

اجاره دار گذشت ایلمز فقیره پولون
"سرانه" نی دَریسیندن چیخاردی عریانین

خدا نکرده صفربیگ اگر گله غضبه
یرینده یللر اسر یاسدیقیله یورقانین

باشی بلالی اوغول بادکوبه ده چالیشار
گرک یازیق آنا وجهین وئره مسلمانین

"گور، آل" رسمیدی گر، بس بو "گورمه آل" نه دور؟
عجب نظام قویوب حکمداری تهرانین

بیزی ساتیر سیزه، بیر کلله قند ایچون ملا
اوقند ایشلنه یا رب یاسیندا ملانین

منی سنه وئره نی حق گوروم ذلیل ائتسین
کبین کستده دیلی لال اولیدی آغانین

بو تلخ سوز منی پرت ائتدی بیلمدیم نه دییم
دئدیم وفاسنه لعنت تمام نسوانین

بهشت عدنیده ای کاش حضرت آدم
اولیدی کور، ئوزون گورمییدی حوانین

جهاندا بیلمدی عورت نَدور، اوشاق نَدور
خوشا سعادتینه حضرت مسیحانین

سوای غصه ندور خیری بونلارین کیشیه!
نه نفعی وار گوره سن بیزلره تکذبانین

ائشیتدی بو سوزی عورت دوروب سراسیمه
دئدی تفاوتی چوخدی پلولا شوربانین

دئدیم که، خرجینه فرمایشوز ندور پلوون
دوتوب ایگیرمی تومن زربناره تومانین

شبستر اهلینه کافرده اولماسین آروات
نه خیری وار بیزه بو اسم بی مسلمانین

اون ایل گئدر، گلر اون گون قالار ولایتده
نه بیله وصلون اولیدی، نه اویله هجرانین

وطندن اَل چکیب ای یار گئتمیم! نیلوم
بویور گوروم گذرانی هانی بو ویرانین

یقین بیلین که قدم باسماز ئوزگه تورپاغه
وطنده خوش گئچه گر روزگاری انسانین

سویوقدا غربته گئتمگ چتیندور ئولمکدن
نه برک جانی وار الله بو اهل ایرانین

نه شاه شاد، نه درویش سنده ای ایران
نه امن وار، نه تجارت، نه شرع و نه قانون

بو کاروانی چکیر جهل درۀ موته
نه یاتمیسان بالا دور مست دور شتربانین!

بیزی اجانب ائدیب زور علمیله حمال
سوای صبر، ندور تکیه گاهی نادانین

غم آلدی جانیمی ساقی، سنی آعان جانی
ایچینه قدری عرق قوی او شیرلی فنجانین

عرق حرامیدی، لاکن حلالدور رشوت
تأمل ایلمه قوربانیم بو فتوانین!

به قصد رشوه حلالی حرام ائدیب مجرم
وبالی بوینونا اولسون او نا مسلمانون

یاتار مهاجر اسلام آج قار اوستونده
قالار پلو باشینا مطبخینده اعیانین

کنار پینجیده اگلشمیسن نزاکتیله
نه کار ائدر سنه تاثیری سرمانین

نه پینجی وار، نه لباسی ائده سویوقدان حفط
فقیردن خبر آل زحمتین رمستانین

اوروس یولی آچیلئیدی قاچایدین ای معجز
حلاص اولئیدین الیندن بو کج قابورقانین


خسیسین عاقبتی[ویرایش]

فصل بهاردور گئچیردیم لاله زاردن
خوش صوتیلن اوخوردی ائشیتدیم هزاردن

بلبل سنین ده وار مگر عالمده بیر غمین
گوردوم اودا شکایت ائدر روزگاردن

تا وار فراق دردی گلستان دهرده
اسگیلمز آه و ناله سه سی بو دیاردن

گَل عندلیبین حالینی سیر ایله اوندا سن
ظالم فلک چون آیری سالار یاری یاردن

دیش دوشدی، باش آغاردی، کمان اولدی قامتیم
بیر سس گلیر قولاقیمه هر گون مزاردن

"گل گل که گوزله ییر یولوی خانۀ لحد
گل مور و ماری ایله خلاص انتظاردن"

قوتلی چوخ جوانلار اسیر ائتدی شاه مرگ
باک ایلمز سنین کیمی بی اختیاردن

ناگه الینده باده گلر ساقی اجل
زور ایله حلقیوه توکر اول زهرماردن

وئرمز ئولوم او قدر سنه فرصت ای عمو
تا بیر ایچیم سو میل ائده سن جویباردن

ایله وداع اهل و عیالین همیشه لیک
دیدار قالدی محشره اَل چک نگاردن

دیوار قبری هیچ دلاور یاراتمادی
ممکن دگیل فرار او محکم دیواردن

سلطاندی جان بدنده بدن تحت سلطنت
سلطان کی قاخدی تخت دوشر اعتباردن

وارث دییه ر منیمدی بو دولت تئز اول گورهک
تشریف آپار کی چیخدی الین اختیاردن

دوشسه یولون مزار ائوینه غفلت ایلمه
کام آل دویونجا عمو سنده سوسماردن

وارث "هتل پالاس" دا ییه ر مفته پوللاری
بوسه آلار دویونجا قلم قاشلی "ماری" دن

قوربان اولا آتا و آنام گول دهانیوه

عاشیق قویار کلاهی یره، یار شاپفانی
زلفین توکر عذاره یمین و یساردن

دف سسلنر، کمانچه دییر: یار، یار، یار!
ساقی توکر گیلاسه می مشکباردن

شامپانیا قدحلری چون بیربیره دَیر
عوج ایلر آسمانه بو سس چنگ و تاردن

یا بختیار ائدون ئوزوزی جد و جهدیله
یا پارسا اولون چکون ال کسب و کاردن

بدبخت او کیمسه دور که ییغار مالی صندوقا
خرج ایلمز یرینده گچر عمری یاریدن

بینین یورولدی چونکه قاباغیندا صبح و شام
حاصل نه ئولدی بس سنه بو دارا داردن

بیر خسته خانۀ ملت ایچون ائتمدین بنا
ناخوشلار ئولدی کوچه ده باخدین کناردن

ای کاش اولیدی دولتین عمرین کیمی ذلیل
بیر کورپی یاپدیریدین او دار و نداردن

نه ملته، نه دولته بیر خدمت ایلدی
بیر هوشه گل داداش گئجه گئچدی قراردن

گه بصره دن سسین گلیری گاه مصردن
گه شام شومدن، و گهی قندهاردن

اسباب عیشی خوف و خطر، منزلی رباط
فرقی ندور بیله کیشینین چارواداردن؟

معجزآغاردی صبح یری هوشه گل گورک
یالوار، سیزیلدا، عفو دیله کردگاریدن

سالما آشاغه بویله سر شرمساریوی
الله باغیشلیاندی گئچر توبه کاردن


من[ویرایش]

کاش همدم اولِیدیم گلشنده خاریلن من
عیش و نشاط ائدیدیم دائم بهاریلن من

بو حال کتده اولمور تکلیفلر معین
اولسیدی یار اولاردیم بیر گلعذاریلن من

بیر یاندا آه و ناله، بیر یاندا می، پیاله
گه یاریله انیسم، گه آه و زاریلن من

چکمز گینه یاخامدان اَل نوحه خوان ظالم
ائتسمده قطع الفت لیل و نهاریلن من

آغزین بویانه توتما، بیهوده ای منادی
دورمام یریمدن، الا آواز تاریلن من

قیلام نماز صبحی با صد رکوع و سجده
میخانه دن چیخاندا سرخوش نگاریلن من

پروانه یاندی معجز نار وصال جهله
علت اودور کی اولدوم همفکر هزاریلن من


غزل[ویرایش]

همیشه قالماز ای بلبل قیزیل گل بو لطافتده
سولار بیر گون گلستان، غرق اولارسان بحر محنتده

اسر باد ستم ناگه خزان ایلر گلستانین
سیخار بیر گون فلک جانین سنی قویماز او حالینده

آ بلبل مثل پروانه دولانما کوی جانانه
دوشرسن درد چانانه یانارسان نار فرقتده

چون اولدی غاشیق ایرانلی گل رخساره سمواره
اودوزدی وار یوخین یکسر قمارخانۀ محبتده

یتیردی عشق چون چایه، چیت و ماهوت و ترمایه
الیندن اوچدی سرمایه داخی ایش قالمادی کتده

ایله کی گوردی ایش یاشدی، مصیبت حددن آشدی
دابانلاری چکیب قاچدی، دیار جهل غفلتده

مشجر چادره ئورتر، یه ل مخمر گیه ر باجی
بیابان گرد اولار حاجی، گزر صحرای غربتده

گر ایگنه وئرمیه کافر، قالار عریان مسلمانلار
یاتین ای جاهل انسانلار دورون روز قیامتده


سنی تاری[ویرایش]

توکنده استکانه چای خالداری سنی تاری
فراموش ایلمه عشاق عم خواری سنی تاری

کمان قاشلارون اویناتما، سن آتما تیر مژگانین
توخونما قلبیمه ای ساچلاری ساری سنی تاری

آچیلسا مه جمالین کوکب بختیم طلوع ایلر
کنار ایله یوزوندن زلف زرتاری سنی تاری

اسیر دستگیرم ای گوزه للر امپراطوری
بویور اینجیتمه سین چشمون سپهداری سنی تاری

غم آلدی جانیمی ساقی پتیر بیر بادۀ حمرا
توتولموش گونلوم ای مطرب گوتور تاری سنی تاری

غلط ائتدیم دئدیم بیر دوغری سوز مؤمن آجیقلاندی
سَریتله باشوا تنظیف کفاری سنی تاری

گتو داش، جیندا قو، یاتپری، نانجیب قونشی
سوروشما دردیمی، مشگلدر اظهاری سنی تاری

داشون کمدور، مالون نمدور، باشون قیرخیخ، اوزون سیرتیخ
مروت ایله، آلداتما خریداری سنی تاری

نشان سجده آننوندا، الونده سبجۀ تربت
نئجه کشف ایلیوم قوینوندا زنّاری سنی تاری

آغاردی ساج ساققالون، نه کار ائتدین اوغورلوقدان
قازاندون هانسی فرشی، هانسی تالاری سنی تاری

"توخ اولماز اگریده، آج دوغرودا" ضرب المثلدور بو
امیدین باغلا حقه، بوشلا بوکاری سنی تاری

دئمه معجز ئوزی باشدان ایاقه عیبدور نقصان
سوزونده عیب یوخدور، ییرتما اشعاری سنی تاری

دیلیمدن قورخورام حق سوز دسین محلوقی اینجیتسین
خداحافظ، گذشت ایله منی قارء، سنی تاری


بو گئجه[ویرایش]

گینه یر اوسته نزول آفتاب ائدیب بو گئجه
گونول سراینی روشن شراب ائدیب بو گئجه


گلین ئوپون الینی معجز گنه کارین
که کنج میکده ده چوخ ثواب ائدیب بو گئجه

شراب نور هدایتیله دولدوروب قلبین
بنای کفری یخیب می خراب ائدیب بو گجه

می ایله ایلمه میشم من محاسنی الوان
اگر حنا ایله زاهد، خضاب ائدیب بو گئجه

من ایچمم کوثری واعظ، که حضرت ساقی
ایکی قدحله منی کامیاب ائدیب بو گئجه

باتیب کسالتیله شیخ شهر من نئیلوم
او نفسنی ستم بیحساب ائدیب بو گئجه

اَلونده باده، یانوندا حبیب ای معجز
خدا دعالریوی مستحاب ائدیب بو گئجه

قوخماز[ویرایش]

گوله عاشیقدی بلبل طعنۀ اغیاریدن قوخماز
جفای خاره صبر ایلر هزار آزاردن قوخماز

پیشیکدن قوخماسا، عزلت گُزین اولماز یوواسیندا
ییه ر قند و نبات و هِل، سیچان عطاردن قوخماز

قاپار بورکون باشیندان ائتمسه اندیشه حاکیمدن
سویار گوندوز گُزی خلقی مسلمان تاریدن قوخماز

ئوزون بیهوده یورما واعظا آز سویله دوزخدن
باخار نامحرمه گُز آتشین مسماردن قوخماز

چورکچی خانه یانیندا دورار آج، بوینی چیگنینده
کنکدن قورخار اول بیچاره، نار و ماردن قوخماز

اریک لذتلیدور، شیریندور آلما، دادلیدور کیشمیش
تامارزی اوغری دوققوز مهره لی دیواردن قوخماز

اگر سیر ائتمه سه یولدا مسافرلر سلاحیله
کسر باشون حرامی سطوت قهاردن قوخماز


پریشانم[ویرایش]

پیاله وئر منه ساقی که چوخ پریشانم
سویوق آمانیمی آلمیش چو برگ لرزانم

نه قاتلم، نه دغلباز، اویله باخما منه
اسیر ظلم قضا بیر زاواللی انسانم

سمور کورک وئریب تولکیه ، ایته، قوردا
مقدرات خداونده مات و حیرانم

"کفردانیشما" دیرلر اگر دییه م "یا رب!
لباس پشم گییب گربه، بنده عریانم"

یاواش دیینده اشیتمیر دییم قایمدان پس
آ هی، آ هی، منه باخ، لاط و لوط میدانم

دییَلله یوخدی قولاغی، گُزی-گُرَ ر، ائشیدر
اینانمششام بو سوزه من غریبه قانمازم




ملت[ویرایش]

چالیندی صوراسرافیل بیدار اولدی هر ملت
آییلمیر خواب غفلتدن هله بو بیخبر ملت

طلوع ائتدی گونش مغربدن اهل شرق غافلدور
آپاردی فیض نور شمعدن اول بختور ملت

داغیلدی پنبۀ منفوش تک ارکان استانبول
جهالت مرکزی کوچدی، یر اولدی آیری یِر ملت

نجوم جهلی بی نور ایلدی علم و هنر نوری
فضای غربده بیرلشدی خورشید و قمر ملت

قیامت قوپدی یاهو، کهنه دنیا تار و مار اولدی
قورولدی تازه عالم، آچ گوزون ایله نظر ملت

جهالت مقبریندن سن ده چیخ، دور رستخیز اول بیر
ویریلدی جمله موتالر کلمح بالبصر ملت

بویوردی اطلبوا العلم و لو بالسین پیغمبر
مگر افسانه دور فرمایش خیر البشر ملت

او هانسی علمدور، علمی که ایجاد ائتدی تلفونی
سوروش هر یردن ایسترسن سنه ورسین خبر ملت

او علمین قوه سیله خلق اولدی چاپ ماشینی
باسار ساعتده اوراق اوسته مینلرجه اثر ملت

او هانسی علمدور، علمی که تسخیر ائتدی افلاکی
نه خوشدور مرکب بالونیله سیر و سفر ملت

او علمیکه چراغ برق ایله ظلمات دنیانی
منور قیلدی، روشن اولدی شب مثل سحر ملت

همان علمیکه گلدی نطقه آهن پاره انسان تک
قولاق وئر گور نه خوش سسلر گلیر خونین جگر ملت

او هانسی علمدور علمیکه یاردی سینۀ خاکی
چیخارتدی معدن نفت و ذوغال و سیم و زر ملت

او علمیکه گزیر انسان بالیق تک قعر دریاده
او علمیکه گئچر بحرمحیطی بی خطر ملت

طناب علمیله بِش یوز کّرور هندوستان اهلین
نئجه گور باغلییبدور قول قولا بیر مختصر ملت

او علمیله چوغوندور ریشه سی تبدیل اولور قنده
مگر زنبیل ایله گویدن اَنیر چای و شکر ملت

حرام ائتدی سیزه تحصیل علمی عالم جاهل
بنای علمی ییخدی، ایله دی زیر و زیر ملت

جهالت ایلدی ایرانی ویران، ملتی فعله
نه چوخ مظلومدور یا رب بیزیم بو دربدر ملت

بو آه و واه دایم یِرده قالماز، خاک زیر اولماز
کَسَر مظلومین آهی، ولی کارلی کَسَر ملت

عمود عِلمیله اَزَر کله سین جهلین، جهاد ایله
جهالت خصم جاندور، مار افعیدن بَتَر ملت

تاسف بی ثَمردور، چون گچن گئچدی، کوچن کوچدی
آییل بوندان سورا قویما گئچه عمرین هدر ملت

امیدین کسمه، مأیوس اولما استقبال ملتدن
تمام ایله سوزین معجز آییلمیش بیر قدر ملت


یوخدور علاج سویلدی درد جهالته[ویرایش]

 ساقی بش اون پیاله گتیر بو جماعتهتغییر وئر بو حالتی بیر باشقا حالته 
 فرسوده قلب ایچون ئولوری روحی ملتینبیر تازه قوه ایله عطا روح ملته 
 بیر باده ایله رفع ائله خلقین کسالتینبلکه گله جماعت اسلام غیرته 
 ساقی عجب زمانه ده گلدیک جهانه بیزحسرت قالیب تمام جهان اهلی راحته 
 قیرخ آی تمام اولدی، گرفتار محنتیکانسان نئجه دوام ائده بونجا مصیبته 
 باشلاندی حرب، بیر بیرینه ووردی عالمیباغلاندی یول قاریشدی کدورت کدورته 
 اهل شبسترین یاریسی قالدی بی پناهاونلار که تیکمیشیدی گوزون راه غربته 
 روسیه مالینین بیره اون آرتدی قیمتیوئردیک کیلیمی کوینگه، تومانه، چرقته 
  قندیله چای خیلی ضرر ووردی بیزلرهائتدی فقیر ایچه نلری، لعنت بو عادته 
 خلقین یوخیدی بیرجه چورکدن شکایتیآخر اودا گتیردی فقیری شکایته 
  رحمت کسیلدی اوچ یوز اوتوز بشده بالتماماود ووردی قحط آب تماما زراعته 
 یاددان چیخاردی قحط غلا هر مصیبتیمخلوق ایتیردی ال ایاغین، دوشدی وحشته 
 فرصتدن استفاده ائدن بوغدا تاجریهر گون علاوه ایلدی بیر قدر قیمته 
 آچ بیر گوزیوی شیعه، نظر قیل خانیملارااونلار که دوشمیشیدیله بو نوع ذلته 
 بو اهل غیرتین یوره گین داغدار ائدر عورت دورار چورکچی توکاننیده نوبته  
  مشتاقسن اگر آلاسان باغ جنتی ای مالدار! وقت دی باشلا تجارته  
 آچ کیسۀ سخاوتوین بندین ای غنی لاقید باخما، بذل ائله اهل ولایته  
 تعمیر قیل شکسته کونوللر عمارتین ای مین تومن فدا ائلییه ن بیر عمارته  
 وئر بیر ناهار خرجینی شامسیز یاتانلارا الله دوشورمه سین سنی فقر و ذلالته  
 دوشمز اله همیشه بئله فرصت ای عمو احسان ائدین، وئرین، تله سین استعانته  
 یاده سالان سویوخدا قالان بینوالری مشغول اولورمی پینج کنارینده صحبته  
 بیر باغ ولیم تاپانمیری بیچاره یاندیرا محتاجدور ئوزی و عیالی حرارته  
 شیر خدا کیمی فقرا پرور اول داداش سن ده ئوزون شبیه ائله شاه ولایته  
  آج قالدی اهل بیتی، ئوزی اوچ گون اوچ گئجه وئردی فقیره رزقینی قاتلاشدی زحمته  
  سندن بو قدر ایسته مز اصحاب احتیاج بیر مختصر کومکلیک ایله اهل حاجته  
 اون مین تومنلی یوزده بیرین ایله سه فدا ارباب احتیاج چیخار استراحته  
  شیطانه اویما، باتمایاجاقدور پولون سنین تئز ختم اولور بو معرکه چکمز قیامته  
 تسبیحی قوی کناره ئوزون یورما شیخنا اللهین احتیاجی نه دور بو عبادته  
 وئر بیر چره ک چورک آپاریم اهل بیتمه اولسون سبب رضایت فخر رسالته  
 رحم ایله میر قوهوم قوهوما، قونشی قونشویا تبدیل اولوبدی چونکه مروت قساوته  
 اما شبستر اهلی ئوز اهلین آراشمیری یوخدور باخان فقیره یتیمان عورته  
 اهل وطن قالیبدی یامان گونده ای غنی ای اللی مین تومنلی، تف اولسون او دولته  
  قارص اهلینی نه طور ایله باکو جماعتی بسلیر اوچ ایلدور، سیزده گلین بیر حمیته  
  یوللارلا زحمتیله اوزاق بیر مسافه یه پول و غذا و البسه مینلرجه کلفته  
  اونلار وئریرله مفت و مسلم بو پوللاری اما بیزیمکیلرده باخون بیر قساوته  
 کبر و غیرور ایله دایانیب تکیه گاهنه بورج ایسته ینده یوخسولی باشلار ملامته  
 اونلار وئریرله مفت، ولاکن بیزیمکیلر وئرمیرله بورج معامله سیله رعیته  
 بیدار ائله یاتانلاری یا صاحب الزمان دولتلیلر تمام گئدیب خواب غفلته  
 ای امت محمده رحم ائتمه ین کیشی ناز اهلیسن، گووه نمه نماز طهارته  
 دین قارداشی عیالی محله نده آج یاتیر وزر و وبالی بوینوما، گئتمه زیارته  
 دور و برینده اللی نفر مستحق وار زوار اولور امامه باخین بیر حماقته  
 بزم عزاده باشه وورار، های و هوی ائدر رونق وئریر دییلله فلانکس شریعته  
 گوز یاشی: های و هوی دویورماز قارینلاری اون شاهی وئر فقیره، وره هفدرم اته  
 یا رب رحمتونله بیزی شاد کام قیل وئرریک قسم جنابیوی نور نبوته  
 دولتلینین غمینده دگیل یاغدی یاغمادی اما تیکیب گوزین فقرا باب رحمته  
  اونلار ائدیب تدارک اوچ ایللیک ذخیره سین مشغولدولار بخاری باشیندا محبته  
 اما فقیرلر سویوق ائولرده تیتریری نفرین ائدر له دمبدم ارباب ثروته  
  باخدی طبیب معجزه، ترپتدی باشینی یوخدور علاج سویلدی درد جهالته  

بیلمه دیم[ویرایش]

بنده نی عفو ایلیه میلت گرک
معبده میخانه دئدیم بیلمه دیم

باشینی دیواره ووروب سیندیران
عاقله دیوانه دئدیم، بیلمه دیم

من نه بیلیم قارقا خوش آوازیمیش
بایقوشا بایقوش دئمک اولمازیمیش
تلخدی اوقات شریفیم بیر آز
بایقوش او حیوانه دئدیم بیلمه دیم

گوردی فلانکس یوخودا بیر گئجه
قول بویون اولموش یاتیور حوریله
سرخوشدیم شیرۀ انگوریله
اویقویا افسانه دئدیم بیلمه دیم

سقل و بیغ صحبتین الدن سالین
ایلمیون ذم او قیزیل دیشلری
عصریمیزه لازم اولان ایشلری
ئورگدین اوغلانه دئدیم، بیلمه دیم

دشمن دین گویده گزر قوش کیمی
معبدی ویران ائده جلکدور، اگیل
کس سسیوی، باشوا بیر چاره قیل
قارء قرآنه دئدیم بیلمه دیم

گورجک الینده قزئته جعفرون
رنگی پوزولدی! سیریقی کورلادی
غیظه گلیپ، بمب کیمی پاتلادی
آعزینا قورخانه دئدیم، بیلمه دیم

وزر و وبالی، گنهی بوینوما
مشدی جانیم وئر پولوی آجلارا
پیکری عریانلارا، محتاجلارا
گئتمه خراسانه دئدیم، بیلمدیم

حاجی داداش سالما ئوزون زحمته
وئر او پولی ملت بی دولته
کافر اگر بورج وئره ملته
بند اولار ایرانه دئدیم، بیلمدیم

اویموش عجب غفلته قارداشلار
چورت وورار، صبح و مسا یوخلیلار
من ائله بیلدیم که او سارساخلیار
سرنی غلیانه دئدیم بیلمه دیم

آتدی الین قائمۀ خنجره
دوردی بش اون ووردی من مضطره
من ائله بیلدیم که او سوز یاخشیدیر
یاتما مسلمانه دئدیدم بیلمدیم

دوستا دییه ر دوست خطیاتینی
که ائده اصلاح عیوباتینی
دین و وطن دشمنی ظن ایلدیم
معجزه بیگانه دئدیم، بیلمدیم

جانلی جنازه[ویرایش]

ماه صیام گلدی منی سالدی زحمته
ای کاش گلمییدی اوروج بو ولایته

ای ماه روزه، ای رمضان، ای فلان فلان
خلقی گتیرمه تنگه، ئوزون سالما غیبته

گئت هر یره کئفوندی ولی گلمه سیس بگه
یوخدور دوام منده اوتوز گون کسالته

افطاری یوخ، اوباشدانی یوخ بینوالرین
تکلیف شاق ایلمز حق بی بضاعته

افطار ایجون کباب ائده ن بیر چره ک اتی
ای مالدار گل بیزه بیر باخ قناعته

آخشام اولاندا چولمه یی لبریز ائدیر خانیم
یعنی که بیر چره ک سو توکور هفدرم اته

قلبی ضعیف ائدیر بو غذا، هوشی تار و مار
من تاپدارام اوشاقلاری، عورت دونر ایته

جنگ و جدال ماه مبارکده چوخ اولار
حقسیز چیخار فقیر گئده گر شکایته

عورت منه یامان، من اونا سیلی و تپیک
قان ائلروخ گر اولمیا همسایه واسطه

وارلی اگر فقیرون ازه داشیلن باشین
تنبیه ائدر حکومت او باشی جراحته

بیر ایل قالیر اذانه هله قوی باشین یره
ای بینماز آچما گوزین باخما ساعته

یات باشیوی کسیم دئسه واعظ، وارام ولی
اما یوخام اوروج کیمی مشکل عبادته

چای ایچمه سم سحر گئده رم اختیاردن
قویمازلا، قویماسینلا منی باغ جنته

من زر خرید قول دگیلم ماه روزیه
من نوکرم تیممه، غسله طهارته

مال یتیمی ملا ییه ر، من اوروجلوغی
من مال حقه بندم، او مال رعیته

خائن گورنده خائنی آبنی قاباقلانیر
من خلوتی گناه ائدیرم، او صراحته

ساقی غریبه ایشدی بو ایش خیلی گولمه لی
وقفی ییه ر گوله گوله آغلار شریعته

ای یار غار کافر ائدیرسن علینی سن
اگلشمیسن یزید کیمی تخت خلافته

طلابی ییغمیسان باشوا بیر مرامیلن
مختص دگیل مرامین عمو ذیفراسته

عرضی قالوب ائشیکده مهاجرلرین تمام
میرزا وئریر تومانلری اصحاب ثروته

اون مین تومن فقیر پولون دولدوران جیبه
تزویر ائدیب حصیر سالیرسان عمارته

ساقی دونن بو وقت گئچیردیم برابدن
دوشدی گوزوم او سمتده بیر بیکس عورته

بیمار ایدی، غریبیدی بی اختیاریدی
محتاجیدی دوایه، غذایه، حمایته

من مضطرب باخاردیم او جانلی جنازه یه
آغلاردی گوزلریم او پریشان قیافته

بیر تخته پاره تک قوروموشدی او بینوا
گوردوم او بینوا دوشه نیب خاک ذلته

زلفین ائدیب نقاب سالمیش عذارینه
باشین قویوب داش اوسته، گئدیب خواب راحته

شکلی بیان ائدیردی که بو بیر عزیزیمیش
بیچاره بیر قضا ایله دوشموش بو حالته

هر کس اونا باخاردی، دیه ردی که جانی یوخ
من ده دییه ردیم عمری یتشمیش نهایته

ناگه گتیردی هوشه اونی تاققاتاق سه سی
آچدی گوزون یاواشجا منی سالدی حیرته

بیر باخدی حسرتیله، ینه یومدی گوزلرین
اگدی باشین یوزون دایادی سنگ عبرته

معجز! بو سس نه دور؟ ددی، باخدیم دئدیم که هئچ
دولتلیلر گئدیرلر نماز جماعته

بیر آه چکدی شعله سی یاندیردی شاعری
یا رب اولارمی چاره بو بیچاره ملته


ضیافت و فلاکت[ویرایش]

اوخوردی مرثیه خوان من باخیردیم حیرتله
ووروردی باشه جماعت کمال شدتیله

رفیق قووزادی باشین دئدی: اییل آشاغا
دئدیم: نیه؟ دئدی: همرنگ اول جماعتیله

روا دگیل باخاسان خارجی کیمی خلقه
گرک ملول اولاسان سن ده بو مصیبتله

خلاصه مرثیه بیتدی، چکیلدی یا الله
گوتوردیک ال طرف کبریایه ملتله

دوشندی سفره یره، خونچۀ پلو گلدی
قارینلار اولدی چراغان او دادلی نعمتله

یانیردی پینج او مجلسده، خلق ترلردی
ولیک قار یاغیردی ائشیکده شدتله

ییغیلدی سفره تمام اولدی مجلس عشرت
ایاغه دوردی جماعت یریندن عزتله

عباسینی گوتوره ن ایلدی خداحافظ
یولا سالیردی قوناقچی بیزی نزاکتله

فناریلر یاخیلیب کوچه چون ایشیقلاندی
دئدیم رفیقه باخ ایندی اویانه دقتله

باخوب نه گوردی، پریشان، بینوا بیر جمع
آیاق یالین، بدن عریان، دوروبلا ذلتله

نه رنگ واردی نه قان یوزلرینده دم بستهٰ
باخیردی خلقه او بی نور گوزلر حسرتله

دئدیم رفیقه گورورسن او طفل معصومی
دوداقلاری گوگه ریب جنگ ائدیر طبیعتله

او عورته نظر ائت اگله شیب بوز اوستونده
باشی آچیق، دوناجاق بو گئجه او حالتله

روا دگیل باخاسان خارجی کیمی اونا سن
عباوی سالمیاسان باشنا محبتله

جگر کباب ائدیجی حالدور، بو حال ای دوست
نئجه گئدیب یاتاجاقسان ائوینده راحتله

رفیق یومدی گوزون، ترلدی خجالتدن
باشین آشاغه سالیب گئچدی گئتدی سرعتله

دالینجا سسلدی معجز: رفیق دور، گئتمه
گرک که تیتره یه سن سنده بو جماعتله

بو یاره لی باجیلار مرهم ایسته ییر سندن
هارا قویوب گئدیسن، خلقی مین جراحتله


خلقی بیدار ایلرم[ویرایش]

دلبرا قالمیش بیزه دنیا ثمود و عاد دن
خسرو پرویزدن، شیریندن، فرهاددان

نیلسه انسان اولار آسوده خاطر هر زمان
غصه سیز، غم سیز یاشار- ائتدیم سوال استاددن

اولما دوراندیش چوخ، درویش احوال اول دئدی
یوخ جهاندا بیر گوزل شیء هر چه بادا باددن

عقل بیدار اولسا پرت ایلر سنی صبح و مسا
ایچ شرابی، سوک چیخارت غم ریشه سین بنیاددن

اوغلون ایستر مرگیوی، قیز تلخ ائدر اوقاتوی
فائده یوخدور سنه اولاددن، احفاددن

یاغی سات، دکانی هم خرج ائت، ائدیر وارث غلط
خیر گورمز هر آتا، هر والده اولاددن

یاغی سات، سرباز توپچی غصه سندن اول خلاص
چونکه باغ دلتنگ ائدر باغ صاحبین آرواددن

چون وورار قامچی باشیندان ملتین سربازلر
تربۀ محمود تیتره ر ناله و فریاددان

نه جوانه رحم ائدر نه پیره نه خانباجیه
علم ظلمی حرمله تحصیل ائدوب شداددن

سات میتیل یورغانی وئر سربازه قورتار جانیوی
ای تکذ باجی مروت گوزلمه جلاددن

بابی یم من ائتمرم اندیشه روز حشردن
حاجی قارداشلار نیه خوف ایله میر میعاددن

چاره یوخ غیر قویوب قاچماخ اوغول آل بیر بلیت
دیغلار انسان چیخماسا بو خانۀ برباددن

دویدی استبداد دن تورک و فرنگ و روم و روس
دویمیور بیلمم نیه ایرانلی استبداددن

ظلم الین کوتاه ائدین ایش گوسترین ایشسیزلره
تا به کی گلسین سسی ایرانلینین بغداددن

علمدن بی بهره ملت نیله سین ای دوستان
ائتمه سین هجرت، نه یاپسین بو خراب آباد دن

غیر ملتلر قویار اولادینه میراث علم
بیر کفن بیر قدره قالدی بیزه اجداددن

خلقی بیدار ایلمک ممکنمی خواب جهلدن
ایلرم بیدار معجز قورخماسام ایجاددن


گل باشیم اوسته[ویرایش]

سالدی ایاقدان عاشقی ای یار فرقتین
گل بیر عیادته اگر اولسا فراغتین

جانیم گلیب دوداقه چکر انتظاروی
مایلدی چوخ زیارتینه ماه طلعتین

جان اوسته عاشق ایله ظرافت روا دگل
گل باشیم اوسته گئچدی زمانی ظرافتین

امرون نه دور بو باره ده حکم ایله ای وطن
اولسون فدا قدملروه جانی ملتین

عاشق یالان دانیشما مکرر دئدیم سنه
اولما سبب تنزلنه قدر قیمتین

وئرمزله اختیاریله بیر جرعه سو منه
یاخشی بلد سن حالینه سن بو جماعتین

اون مین تومن قماریده سرکار غیب ائدر
بیر ذره ترلمه ز توپوغی کم سعادتین

سفره دوشر، قوناقلیق ائدر قارنی توخلارا
اما یاتار سنین گئجه لر آج کلفتین

جام و پیاله، مطرب، مزمار، چنگ، عود
حاضرلانیر بو بزمده هر زادی جنتین

نقره ظروف ایچینده بهشتی طعاملر
بیهوش ائدر دماغی اییی ناز و نعمتین

یا رب خیالدور بو ویا اینکه خوابدور
بش یوز تومن ده خرجی اولار بیر ضیافتین؟

ای نازنین، هئچ بیلوسن بیرجه نیلوسن
بو پول خونبهاسیدور اهل زراعتین

قخط و غلاده اولدی تلف بیر کرور جان
سویله گوروم قراری بو دور آدمیتین؟

مطرب، کمانچه ناله سی آغانی پرت ائدیر
قویمور ایشیتسین آه و فغانین رعیتین

مضرابی قوی کناره قبول ایله عرضیمی
آخر قدیم واریدی منیله رفاقتین

ای تیرمه رختخواب ایچینه قویلانان عمی
پئتسه وطن، وطنله گئدر استراحتین

ئورگنمیسن زمانه ده بیر اوخشاماق فقط
یوخدور سوای بو، سنین ئوزگه مزیتین

سن دشمنیله جنگ ائده بیلمزسن ای عمو
دعوا گونی سلاحیدی گوز یاشی عورتین

غفلت چون ائتدی اورمی عمارتلرین خراب
بیر گون ییخار سنونده او غفلت عمارتین

ساوج بولاقیله قره قشلاق حکایه تین
نقل ایله سم جنابیوه آرتار کسالتین

بیر مال آپاردی ظن ائدیسن بیزدن اشقیا
ناموسین هم آپاردیلار مینلرجه عورتین

ساقی جهت ندور منه می وئرمیسن بو گون
لازم دگیل غرور، وئر آل مندن اجرتین

معجز بوگون که هر کس ایچون بیر وظیفه وار
سن ده عای خیریله یاد ایله ملتین


وار[ویرایش]

دئسم که حسنده یوسف سنه برابر وار
نئجه دییم بو سوزی تاری وار، پیمبر وار

چکیل کنارده دور، سیر ائله او مهرویی
سوخولما یانینه عاشق الینده خنجر وار

قویوبلا ایسمینی معشوق خلق جلادون
دییه له آدینا "یار" هاردا بیر ستمگر وار

بقدر اللی تومن بلع ایدیر هر ایل یاران
مثال گرگ دغا بیزده بیر سماور وار

غریبه دور که بو خرجی گوروب دییه له گنه
بیزیم وطنده نچون اللی مین قلندر وار

وطنده چوخدی ایلانچی، دیلنچی، جادوگر
نه کارخانۀ پنبه، نه معدن زر وار

اوتوز تومن ایکی لامپایا پول وئرمیشدیم
قولوم توخوندی او سیندی دیین که: "اللر وار"

گر ایگنه وئرمیه کافر، قیچین قالار عریان
الهی ساخلا بلادن نه قدر کافر وار

بش آلتی مین طلبه صرف و نحویله مشغول
باخین گورون نه قدر مفته خور دلاور وار

نجفده هر بیری اون مین تومن ائدر مصرف
گلیر دییه بیزه یاران، نکیر و منکر وار

قولاق نه لر ائشیدیر رهنمای ملتدن
او شاد، سنده ولی خاطر مکدر وار

ادبله می ایچرم هر گون حق حضورینده
اگر ادبسیزه جنتده آب کوثر وار

گئدین دورون قاپیدا قویمیون گله واعظ
سریمده شور، الیمده شراب احمر وار


ای ویلهلم[ویرایش]

 گئتدی الدن هر نه وارسا، ما ملک ای ویلهلم قالمادی ائوده مگر قلبیر الک ای ویلهلم  
 بینوا مخلوقه بیر دامجی یاغیش یاغدیرمیری ظلم و جوریندن سنین چرخ فلک ای ویلهلم  
  قیمت بوغدا ترقی ایلدی گوندن گونه سکیز عباسی توتور سکیز چورک ای ویلهلم  
 دیش دایانماز قارشیسیندا چونکه هر بیر باتمانی داش، کسسک وار ایچینده بیر چره ک ای ویلهلم  
  گون اوزون، کلفت اوروج، دویماجیله گئچمیر عمل ریزه کوفته، هم کباب ایستر بوره ک ای ویلهلم  
 "معجز" بخت قارانین هر نه گلسه باشینه هامیسی سندندی لعن الله لک ای ویلهلم  
 بیر سوری خیردا اوشاق وار ائوده عریان لات و لوت قدرتیم چاتمیر آلام بیر توپ قدک ای ولهلم  
 طفل معصومی قوجاغیمدا آپاردیم بزازا وئرمدی بیر ئونلیگیله بیر لچک ای ویلهلم  
 بیر قپک بورج وئرمیر استامبولچیا، تیفلیسچیلر اسکناس وار هر بیرینده بیر اتک ای ویلهلم  
 باغیمیز، بوستانیمیز اود توتدی یاندی، سهلدر وارلیلار بیر شربه سو وئرمیر ایچک ای ویلهلم  
 مرحمت آثاری یوخ دولتلیلرده مو قدر وارلیدان ممکن دگیل پول ایسته مک ای ویلهلم  
 سو ایچه نده لعنت ایلر شمره سو تاجرلری ئوزلری ظلم ایلیری اوندان قشنگ ای ویلهلم  
 قالب بی روحه بنزه ر بیمروت اغنیا حلقی شیرین کام ائدرمی بوش پتک ای ویلهلم  
 صلح باش دوتمور، ایشین راست گئتمه ییر آیا ندن؟ خق یانیندا بیر گناهین وار دئمک ای ویلهلم  
  بلکه اوغلان قیرخدیریرسان ساققالی اونداندی بو چونکه ایتمر فاسقه الله کمک ای ویلهلم  
 تون به تون ساققالی قیخدیرماق ظرافتدور مگر هر توکوندن ساللانیر یوز مین ملک ای ویلهلم  
  نه باغیمدا بیر اریک وار، نه جیبیمده بیر قپک مالیات ایسته ر مباشر نینیه ک ای ویلهلم  
  پول وصول اولماز بو ایل دیوانه مندن بیر شاهی وورسالار لوت جانیما یوز یول کتک ای ویلهلم  
  بو اوروجلوقدا خلاص اولدوق داداش بکدن عجب گئتدی بیلدیر باشیما یوز مین کلک ای ویلهلم  
 پایدار اولسون جهان ایچره دیموقرات فرقه سی تا نه قدری واردی دریاده نمک ای ویلهلم  
 آچ یولون استانبولون رحم ایله آلله عشقینه حلقیله اگلنمه چوخ، بسدور هنک ای ویلهلم  
  من حاجی زاده نئجه باتمان بئلی شیشلیم یره قولوما لازمدی بیر قالین بیلک ای ویلهلم  
 شعر یازماقدان عبارت بیر متاعیم وار منیم اونادا ایرانلی وئرمز بیر قپک ای ویلهلم  
 بیر بیرینه چالخادور جمله جهانی هر بیریز باشوزا ییقدوز بش اون مین بیچ دبک ای ویلهلم  
 آی بالام ال چکمیسیز خلقین یاخاسیندن نیه سن بیج اوغلی بیج، حرامزاده فرنگ ای ویلهلم  
 بیر گون ایلر ظالمی عدل الهی دستگیر باخ اگر بینادی سنده مردمک ای ویلهلم  
 تورکیله روسی باریشدیر، انگلیسی آت گئده او قبول ائتمزسه فی النار درک ای ویلهلم  
 نیقولای ظلم ایلدی بولدی جزاسین عاقبت گور نئجه زنداندا قالمیش چار تک ای ویلهلم  
 تختیوی تابوت ائدر بیر گون سنینده روزگار کیمسیه رحم ائتمز اول ظالم فلک ای ویلهلم  
 معجز هر وقت جیبلرین یوخلار، گوره ر بوش، دامجیلار گوزلریندن یاش بسان مرجمک ای ویلهلم  
 قیزلارین اوغلانلارین بوغسون گوروم خیرنه ک سنین یا آپارسین هامیسین بیردن چیچک ای ویلهلم  

پروسیا شاهی[ویرایش]

جهانی بیر بیره چالدی پروسیا شاهی
بیزی بو حاله سالان ویلهلمدی واللهی

نه کافره، نه مسلمانه رحم ائدیر بو قوم
زهرلی قازیله مخلوقی ایله ییر معدوم

سو آلتی لودقالاری هی گزیر دنیزلرده
ده لیر سفینه لری غرق ائدیر دنیزلرده

گهی چیخیر گویه گوزدن نهان اولور ماشینا
گئدیر گئدیر قاییدیر بومب سالیر آدام باشینا

گهی چکیر توپچی وردینه، گاهی ریغایه
تکان وئریر سه سی دوردونجی گویده عیسایه

بئله خیال ائلمه واردی رحمی آلمانین
اگر بئله بیله سن یوخدی دین و ایمانین

توتاخ که واردی گناهی آداملارین یاران
دیین گوره ک اونا نیلیبدی بینوا حیوان

آداملارین قویور آج ئوزلرینی، کلفتینی
بالیقلارا وئریر انسانلارین لطیف اتینی

قولاق وئرین سیزی تاری بونون یالانلارینا
نه گلسه آغزینا سویلر و گلمز هئچ عارینا

گهی دییه ر گئده رم حجه باغلارام احرام
گهی دییه ر عجمم، ایلیه ر بیزی بدنام

اگر او بیزدن اولیدی ساتاردی املاکین
باشین آشاغه سالاردی چکردی تریاکین

اگر او بیزدن اولیدی باخاردی خلق سوزینه
غازیت یازانلارا لعنت ائدردی هم ئوزینه

دئمک دگیل او بیزیم جنسیمیزدن البته
نه عقلده، نه فراستده، نه طبیعتده

بئله خیال ایلمه عاجزم جوابینده
هانی او مؤمنه بنزه ر بویون جنابینده

گل ایندی باس الیوی آیه آیه قرآنه
گوره ک جنابیوی کیم بنزه دیر مسلمانه

اوچ ایلدی قان توکیری، سویلر اهل ایمانم
بو قدر ائو یخیری هم دییه ر مسلمانم

کیم آد قویوبدی بو وحشی جماعته مدنی
برص ناخوشلیخینا اوغراسین گوریم بدنی

اگر تمدن عبارتدی بو رذالتدن
گئچه یرین دیبینه چیخمیا خجالتدن

بو دعوانی اوزادان پادشاه آلماندور
بونا شهادت ائدر کیم که اهل ایماندور

شرافت اوممادی "معجز" نه حال و آینده
بو آلمانین نه ئوزونده نه پادشاهینده


سرتاسر[ویرایش]

اولماسیدی ئولوم، قوجا کیشیلر
دولدوراردی جهانی سرتاسر
نئجه کی دولدوروبدی اولدوزلار
صحنۀ آسمانی سرتاسر

بلیلی لال ائدر جفای خزان
اولا بیلمز همیشه گل خندان
گرک ائتسین خزان مرور زمان
گل عمر جوانی سرتاسر

قیشدا چون قار یاغار یری ئورتر
احتیاجات گون به گون آرتار
گرگ بی رحم قالسا آج، ییرتار
هم ایتی، هم چوبانی سرتاسر

گرچه ایام آغارتدی ساققالین
یاشین آرتدی دگیشمه دی حالین
گوجلی اولسیدی بختی حمالین
چاتلامازدی دابانی سرتاسر

ای عمو سو ایله سونر آتش
نه سرابیله، بیلمیسن ئورگش
اولماسیدی جهاندا زحمتکش
کیم تیکردی بنانی سرتاسر

ایشله سه حاجی بش دقیقه صباح
زحمت کاردن اولار آگاه
چکسه ال ایشدن آدم، عبدالله
غم بویار اغنیانی سرتاسر

چوخلارین بو جهالت آلداتدی
دستگیر ائتدی، قول دییه ساتدی
بو همان جهلدور که تیتره تدی
هند و چین و خطانی سرتاسر

جهل وقتی که اولگوحجین تیله دی (ایتیله دی)
هر کسی گوردی قانینه بله دی
بو همان جهلدور که پاره له دی
معجز ناتوانی سرتاسر

ای جوانان جامع الاخلاق
بیوفا در جهان نیلو طاق
چون گوزوزدن نهان ائدر توپراق
شاعر بینوانی سرتاسر

دوستانیله عیش و عشرت ائدین
گاه گاه هم منی زیارت ائدین
اهل ذوقیله سیز محبت ائدین
هم گونی، هم شبانی سرتاسر



مکتوبلاشما[ویرایش]

شبستردن استانبولا

افندی چوره ک قیمتی یوخدور نگرانلوخ
قند چای آلیرام گونده فقط بیرجه قرانلوخ

چیت بوردا باهادور گلن اولسا بش اون آرشین
گوندر منه هم قزیلارا شاللوخ و تومانلوخ

گلسن گونئیستانه عم اوغلی گئچینه رسن
باخسان سوزیمه ال اله وئرروخ دا قازاننوخ

گلسن وطنه اون تومنه بیر اینک آلسان
بیر طویله قاییدیرسان اگر بیرده سامانلوخ

منده ساغارام، هم په هینین یاپپا قایررام
آلتین سیله رم، سنده اوتار ایله چوبانلوخ

استانبولدان شبستره

بو امر محققدی که بیز ملت ایران
خورتانه و هم غول بیابانه ایناننوخ

افسون که نسوان وطن گورمدی بیر گون
ایرانی مین اوچیوز سنه جهل ائتدی قارانلوخ

تا عم قیزی وار گوزده ایشیق، تنده توانا
هر زحمته، هر محنته غربتده دایاننوخ

یاتدیم من، اوزان سنده هله وقته قالیر چوخ
صبح مدنیت آچیلان دمده اویاننوخ

وقتی که طلوع ایلدی خورشید ترقی
اوندا که ایشیقلاندی بیزیمده آبادانلوخ

منده گله رم یانووا، یعنی او زمان که،
نه سنده طراوت قالی، نه منده جوانلوخ

من ساققالی، سن زلفی حنا ایله بویارسان
وئرروخ او زمان ال اله بولغاری دولاننوخ

معجز اوتانیر قیخمیری ساققالی دییرلر
نه! بیزده حیا اولسا، جهالتدن اوتاننوخ

دئدیلر[ویرایش]

چون یتیشدیم وطنه، آچما دهانین، دئدیلر
دینمه، دانیشما، ترپتمه زبانین دئدیلر

قوی بش اون توک چنوه، اوخشات ئوزین شیعه لره
گده قیخدیرما باشون، چکمه دابانین، دئدیلر

بیر عبا سالدی آنام چینیمه، گئیدیم قولونی
"عیبدور، بوردا قولون گییمه عبانین"، دئدیلر

"مسجده داخل اولان وقتده کرنوش ایله"
"وئر سلام، ئوپگیله دستارین آغانین"، دئدیلر

دئدیم:" آللهه باخین، ائتمیون، آخر ئولدوم"
"گر بوجور ائتمیه سن، چوخدی زیانین"، دئدیلر

دوشدی دالینجا بش اون دانه دیلنچی هر گون
"وئر گوراخ همشهری حقین فقرانین" دئدیلر

دئدیم "ای وای نه چوخدور فقراسی بو یرین"
"وار شبسترده فابریقاسی گدانین" دئدیلر

"مالیوین بشده بیرین وئر سیده مفته خورا"
"اوجلارین کسمه بوغون، چکمه دابانین"، دئدیلر




سیزه من نیله میشم[ویرایش]

باشیما زلف قویوب ساققالی قیخدیرمامیشم
خلقدن رشوت آلیب کیسه می دولدورمامیشام
جدیزین وقف سویون ملکیمه آچدیرمامیشام

ای شبسترلی داداشلار سیزه من نیله میشم

بیر قران پول آپاریر دولت ایران دریدن
ظلم ائدیر فرقۀ قصابه اوتانمیر تاریدن
مهر ذبحیه آلیر باج ئولیدن هم دیریدن
من بئله ظلم و ستم خلقه روا گورمه میشم

ای شبسترلی داداشلار سیزه من نیله میشم

گوروسیز من نه آژانم، نه قازاق ای کیشیلر
گورمیوب قوندارا هرگز بو دابان ای کیشیلر
سالمیشام لیفۀ شلواریمه باغ ای کیشیلر
پانتولون گئیمه میشم بوغلاریمی بورمامیشام

ای شبسترلی داداشلار سیزه من نیله میشم

کفرمه حکم ائله دیز هانسی گناهیله منیم
جرمیمی ثابت ائدیب مجلسه دیندیرمه میشم
نه طلاق ایله ایشیم وار نه نکاحیله منیم
قیزیزی حاضر ائدیب مجلسه دیندیرمه میشم

ای شبسترلی داداشلار سیزه من نیله میشم

من فلانکس دگلم، صیغه مه ایراد ائده سن
گئت کبین کسمه دیه اوستومه فریاد ائده سن
ییخاسان خلقین ائوین ئوز ائوین آباد ائده سن
من هله هیچ کسین قلبینی سیندیرمامیشام

ای شبسترلی داداشلار سیزه من نیله میشم

ای عمو چک قیلیجون ائیله مربایه هجوم
شیر برنجه، خامایا، هم قارا دولمایه هجوم
بیجهت ایلمه چوخ "معجز" شیدایه هجوم
من مگر ایلده بش اون یول سیزی گولدورمه میشم

ای شبسترلی داداشلار سیزه من نیله میشم

شبسترده[ویرایش]

نه تار وار، نه کمانچه، نه دف شبسترده
اماندور ایلمه عمرون تلف شبسترده

نه یوز گولر، نه گونول شاد اولار، نه گوز روشن
سونوب چراغ سرور و شعف شبسترده

بیریسی ساققالا ایراد ائدر بیری بوغووا
هزار درده اولارسان هدف شبسترده

خدا نکرده باشیندا اگر اولا کاکل
یولار آخوند اونی مثل علف شبسترده

جهنم اهلی کیمی کارین آه و زار اولاجاق
بوغازیوا سالاجاق غم قنف شبسترده

عمودی آل اله، قوی طاس کلاهی باشوا چون
چکیب سپاه غم و غصه صف شبسترده

بئلیوه باغلا بره ک، هم یاتیرت دابانلارین
که ایستیسن اولاسان با شرف شبسترده

اونین که واردور الینده سلاح تکفیری
اولانماسان اونیله سن طرف شبسترده

مباد ایلیه سن اوست باشیوی خوشبو
که بیردی عطرله بوی کنف شبسترده

گره ک قبول ائده سن "معجزا" به خاطر خلق
آغا ذوغاله دییه گر صدف شبسترده

کوچه لر[ویرایش]

پالچیق آیاقلاماغدا اگر وار مهارتین
ایرانه گل، زیارت ائدیم ماه طلعتین

ایتلر یوگورسه اوستوه بازار و کوچه ده
ممکن دگیل فرار، تئز ایله وصیتین

زیرا که کوچه دار، گل و لای دور و بر
دور، قاچما که گئدر هدر، سعی و زحمتین

نودانلار ایشلیه نده چوور بورکی ترسینه
وقتی که دولدی، توک یره ایسلاتما کسوتین

ییخسان آتان ائوین، تازادان ایله سن بنا
ختم ایله کوچه دن کیچیک اولسا عمارتین

اردیبهشت سونلارینا ساخلا ئولمگی
جان وئرمه قیش زمانی اگر واردی غیرتین

نقل جنازه ائتمگه یول یوخ که دامدن
قاری توکوبدی کوچیه دیندار ملتین

نعشین قالار اوطاقده، حمام تک قوخار
ایذا ائدر جماعته بوی و کثافتین

عقلون آزالسا، دوشسه یولون بو ولایته
گئتسن حضور پاکینه دریای حکمتین

سویله آغا نه ایلمیسن اختراع سن
که دولدوروب جهانی بو اندازه شهرتین

قیخدیرمیسان بش آلتی کچل باش زوریله
بوندان سوای نه دور وطنه، خلقه خدمتین

دلاکلر سیاست ائدیبسن، ائشیتمیشم
که وورماسین سقالینه اولگوج رعیتین

مرداد آییندا ایلمیسن نطق لر، بلی
بیر آی تمام نفعنه دایر جماعتین

ملت ئوپر ال آیاغووی چوخ احترامیله
سویله علتی بو ایمیش او حرمتین

باشین یاران جماعته لازم دگیل حجم
ای بی حقوق غجم له مگر وار عداوتین

شمشیر آبدار بیانیله "معجزا"
وور کله سین، دوشور یره دیو جهالتین


قیزلار و خانیملار ایچون[ویرایش]

قلم[ویرایش]

نویسندۀ سرگذشت جهان
قلمدر قلم بارک الله قلم

سفیرکبیر انوشیروان
قلمدر قلم بارک الله قلم

قلم حکم فرمادی هر عصرده
قلم اهلین اگلشدیره ر قصرده
عزیز ایلین یوسفی مصرده
قلمدر قلم بارک الله قلم

او در رستمی راکب رخش ائدن
اودر هیکل نادری نقش ائدن
شه عباسه نام نکو بخش ائدن
قلمدر قلم بارک الله قلم

یازار گونده مینلرجه فرمان سخت
ایه ر باش اونا صاحب تاج و تخت
سپهدار و سردار و سالار بخت
قلمدر قلم بارک الله قلم

قلم یازدی چون قتل فرمانینی
اوروس چارینین توکدیلرقانینی
ائدن خلع هم تورک سلطانینی
قلمدر قلم بارک الله قلم

قلمدن سؤال ایله سن ممده لی
نچون تختدن دوشدی اولدی دلی
سبب کیمدی؟ سویلر به صوت جلی
قلمدر قلم بارک الله قلم

ائده نمز دیک عالمده سیر و سفر
قلم ائتمه سیدی بیزی با خبر
نگارندۀ نقشۀ بحر و بر
قلمدر قلم بارک الله قلم

اگر اولماسیدی جهاندا مداد
کیم ایلردی خیام و سعدینی یاد
سخندان شیرین زمان بلاد
قلمدر قلم بارک الله قلم

اگر اولماسیدی جهاندا قلم
دییلمزدی دنیاده نام عجم
علمدار فردوسی محترم
قلمدر قلم بارک الله قلم

ئولوب شیخ محمود جنت مکان
قالیب "گلشن راز" اوندان نشان
اونی شهرۀ شهر ائدن دوستان
قلمدر قلم بارک الله قلم

اجل باغلاییب صابرین گوزلرین
قویوب یالقیز اوغلانلارین قیزلارین
دیری ساخلیان "هوپ هوپون" سوزلرین
قلمدر قلم بارک الله قلم

دئدیم چون هانی حافظ دهر شوم
نولوب شمس عطار، ملای روم
دئدی: نیلیسن ایندی بحر العلوم
قلمدر قلم بارک الله قلم

گوروب خسروی هاتفی گورکن
بیچیب لعلیله، صائبه هم کفن
بوشاعرلرین نامین احیا ائدن
قلمدر قلم بارک الله قلم

جهان قالدی یاران نه خاقانیه
نه ابن یمینه، نه قاآنیه
او که دل چویرمز بودیوانه یه
قلمدر قلم بارک الله قلم

گئدیب دهردن عرفی و انوری
وئریب جان هم او جامی وجوهری
بو گون اونلارین وارث اکبری
قلمدر قلم بارک الله قلم

جهاندا اگر اولمییدی مداد
سنائینی آیا کیم ایلردی یاد
باباطهره یاور خوش نهاد
قلمدر قلم بارک الله قلم

اسیر ایلییب ایرجی روزگار
نظامینی، خواجوئینی بیقرار
او که ئولمز هرگز، یاشار بیشمار
قلمدر قلم بارک الله قلم

دئدیم آغلیا آغلیا ای قلم
هانی سبزواری، هانی محتشم
دئدی: معجز الساعه حی الامم
قلمدر قلم بارک الله قلم


وار[ویرایش]

 نه لیره و نه منات و نه پنجهزاریم وار پیاله وئر منه ساقی گر اعتباریم وار  
 نه بنگی یم، نه پلاکش، نه شیره کش، نه فلان نه بابیه م، نه طبیعی، نه چارپاریم وار  
  قناعتیله گئچیننم به قدر امکان من برای اینکه نه تیلوم، نه شیندواریم وار  
  حاجی نهاره ائدیر میل کوفتۀ کوکی فقط منیم نه کبابیم، نه بال نهاریم وار  
  ایچینده کسسه گی، داشی، فلانی، بهمانی قارا، قورا، آجی، شور نان کمعیاریم وار  
 نه ارشدم، نه سمیتقو، نه مرتضی قلیخان نه سنی ایله و نه شیعه ایله کاریم وار  
 نه حاکمم، نه مباشر، نه سیلله یم، نه یامان نه نوکرم، نه غلامم، نه آبداریم وار  
 نه رعیتم، نه شهنشه، نه میر خالصجات نه ملجأم، نه پناهم، نه غمگساریم وار  
  نه قولچوماغم، نه عاجز، نه ده که اربابم نه فورخارام، نه چکیلله م اوجا دیواریم وار  
 اگر واریندی سنین خیلی نقره و ذهبون منیم ده کتده طلبکار بیشماریم وار  
 یاخین گه، قورخما نه افسونگرم نه افسونخوان نه عقربم، نه ایلانم نه شاهماریم وار  
 نه دیلمقان، نه لکستان منیمدی، نه اورمی نه ماکو، نه خوی، نه چهریق، آدلی بیر دیاریم وار  
 اگر واریندی سنین یار ماه رخساین منیم ده بیر باشی داز، عقل آز نگاریم وار  
  اونا من هر نه جفا ایلسم، دوام ایلر طلاق وئرمگه چون الده اختیاریم وار  


جمهوریته[ویرایش]

  ساقیا بیر باده وئر ابنای جمهوریته تشنه در اهل وطن صهبای جمهوریته  
 ساکت اول، آهسته گل، تند اسمه ای باد صبا قورخورام توز اگلشه سیمای جمهوریته  
 بیر پارا نادان کیشی (باش سیز بدن اولماز) دئیه ر پس دئمک واقف دگیل معنای جمهوریته  
  قوردا وئردی گله نی، چون کله سیز چوپانیمیز اول جهتدن دوشمشیک سودای جمهوریته  
 قامتی اولدی خمیده بینوا ایرانلینین بسکه کرنش ایلدی اعدای جمهوریته  
 قبلۀ عالملره یوز ایل (بلی قوربان) دئدیک بیر زماندا "هن" دییه ک آقای جمهوریته  
 ایسته سن قید اسارتدن خلاص اولماق گرک قوی قدم موسی کیمی دریای جمهوریته  
 ائتدی احیا ینگی دنیا مردگانین بالتمام سن ده یالوار ای اوغول عیسای جمهوریته  
  بیر قاریش یر یوخدی لم یزره فرنگستاندیه ایله بیر عطف نظر صحرای جمهوریته  
 محتکرلر آستانین بوس ائدن جهالدر یوز سوره عاقل گرک طغرای جمهوریته  
 قدر زر "معجز" شناسد، قدر گوهر گوهری اولماز هر کس مشتری کالای جمهوریته  


شاه فرنگستاندادر[ویرایش]

یوخدی جمهوریتین دنیاده قدر و قیمتی
سرنگون اولسون گوروم شاهین او قد و قامتی

بسکه ملت اولدی لاغر نی کیمی غم غصه دن
روضۀ رضواندا پیغمبر سویلر وا امتی

اهل خبره قویدیلار قنطاره شاهی چکدیلر
اللی باتمان استخوانی گلدی، یوز باتمان اتی

تخت مرواریده چون چیخدی دئدی ساقی گتیر
عورتی، اوغلانی، تاری، عودی جام و عشرتی

ملت آغلارکن او ساز و سوزله مشغولیدی
قارنی شیشمزدی او قدری گر اولیدی غیرتی

قویدی شاپقا باشنه ائتدی فرنگستانه سفر
صحن مهمانخانه ده طغیانه گلدی شهوتی

بسکه هر گون، هر گئجه ائتدی زنا اول نابکار
.......

چوخ دگل یوزمین تومن بیرآروادا احسان ائدر
ایلده خرج ائتمز مگر یوزمین تومن شاه عورتی





انشاءالله[ویرایش]

ساقیا بیله آف و اوف ائتمه
دولانار بو زمانه انشاءالله

خلقه ایلر زمانه رحم داخی
اوخی قویماز کمانه انشاءالله

ئوز ئوزین ئولدیریبدی شاه قجر
دار عقبایه ایلیوبدی سفر
دوزدی بو سوز، یالان دگل بو خبر
بویانیب رختی قانه انشاءالله

وئردی چون تاج وتختنی باده
قالمادی ایش اونا بو دنیاده
ساقیا قورخما دور گتیر باده
داخی گلمز بویانه انشاءالله


قالدی بیرجه برادری شاهین
اودا دوشموش گوزیندن آللهین
توکه قانین گرک او بد راهین
بلکه ملت اویانه انشاءالله


ملتین دردی جهل و غفلتدر
چاره سی علم ایله صنعتدر
خلقمز خلق با کیاستدر
گلر آخر زبانه انشاءالله

اوخودار نوجوان انسانی
عالم ایلر قیزی و اوغلانی
اولار همره زمان طولانی
عمری هم شادیانه انشاءالله


اولار آیریپلانلار آماده
گزه ریک بیزده چرخ میناده
دمله ریک چایی عرش اعلاده
توکه ریک استکانه انشاءالله


یری ماشینیله سوکر زارع
خرمنی علمیله دوگر زارع
قازانار خیلی سیم و زر زارع
ایشله مز مفته خانه انشاءالله

فعله و رنجبر گئده ر درسه
روزنامه آلیب چوبان گلسه
اولار هم کربلای تحفه نیسا
آشنا هر زبانه انشاءالله

چون اولار علم و فضل اناثه انیس
یخیلار خانمان ناف نویس
داخی گئتمز تکذبان خبیث
جانب وایقانه انشاءالله


او زمان خلق غصه دن آزاد
اولار هم گوز ایشیق، گونول آباد
کسیلر بانک ناله و فریاد
دوزه لر بو زمانه انشاءالله


وار یا یوخ؟[ویرایش]

ساقیا چله چیخوبدر، ارییوب قار، یا یوخ؟
هم منه سویله گوروم شیشه ده می وار یا یوخ

بیلمیرم وار نفسی، یا که ئولوبدر "معجز"
ساقی قوی شیشی اودا، باس گوره ک آنلار، یا یوخ

بئله بیحس دوشوبدو، دیه سن پولسوزدر
بیر قدر زر توکه سن اووجونا قالخار، یا یوخ

یخدیغی قصرلری، بیرده تیکرمی، ساقی
توکدیگی قانلارا ظالم فلک آغلار، یا یوخ

سنه قوربان اولوم ای دفتر جمهوریت
بو گوزه ل تخم بیزیم یرده جوجوقلار، یا یوخ؟

آل قاجاری فلک سالسا آیاقدان جانا
گوره سن ملت ایران گئنه یوخلار، یا یوخ

ده گوروم شاه عجم، احمد بی غصه و غم
مرض سلله دچار اولسا آریخلار، یا یوخ

تار شرعه توخونارمی عجبا بو مطلب
"هن" دییه رمی بو ایشه بوینی یوغونلار، یا یوخ

ای منجم منه بیر سویله گوروم بایرامدا
منی بیر بوسه ایله خوشدل ائدر یار، یا یوخ

ایستیرم کورکی ساتام، قورخورام اما ای وقت
باخ گوراخ، گویدکی آنباریده قار وار، یا یوخ


عموغلی (صابره نظیره)[ویرایش]

بش گوندی جهان دولتی نیلرسن عموغلی
علم و هنر و صنعتی نیلرسن عموغلی

ئولچ کولگه نی گوندوز، گئجه باخ اولدوزا آیه
کافر قاییران ساعتی نیلرسن عموغلی

بوزباش دئدیگین باشه بلا جانه خطر در
یات دور سحر اولسون، اتی نیلرسن عموغلی

عریان گله جک محشره مخلوق تماما
آلما نسیه، خلعتی نیلرسن عموغلی

بیغیرت ائدر آغلاماق انسانی دییه رلر
خرج ایله گئده دولتی نیلرسن عموغلی

باغلا بئلیوه غیرتی، ناموسی، حیانی
سات قدّره نی، حاجتی نیلرسن عموغلی

آرخا یارالی، باش یارالی، سینه جراحت
بو زحمتیله جنتی نیلرسن عموغلی

سن روم قیزینی بسله بک اوغلاندا، دانیش، گول
ایراندا کی آج کلفتی نیلرسن عموغلی

حوری وئره جکلر سنه خرمن کیمی زلفی
بیر کله سی داز عورتی نیلرسن عموغلی

واعط که ساتیبدر سنه جنات نعیمی
شاهد دی خدا، حجتی نیلرسن عموغلی

ساققالی اوزون، کله سی کوت، فکری داریسقال
سن صورته باخ سیرتی نیلرسن عموغلی

معجز دانیشار بال کیمی آچ آغزیوی دینله
قندی، رطبی، شربتی نیلرسن عموغلی


ملمع[ویرایش]

بمن تارتن حاجی گوید بزور
نه رفتم به مکه به حق شکور

نه باغ و نه خانی، نه دکانی وار
نه فابریک و کندی، دگرمانی وار
فقط معجزین بیر قوری جانی وار
ضعیف و نحیف است آنهم چو مور

منیم یوخدی پولیم آپار تارتن
نه بیر دو هزاری نه ده بیر تومن
اگر بر فلکّه نهی پای من
زنی چوب و شلاق تا نفخ صور

به حق غریب خراسان و طوس
آلا بیلمه سن بنده دن بیر فلوس
"نترسند دلیران ز آواز کوس"
چرا؟ به هر آنکه نیم پور تور

نه من قورخورام سققل و بیغدن
نه خوف ایلرم گردش میغدن
منیم ناطقه م تیز در تیغدن
بیا تو به میدان مکن گورگور

نگیرد شهان مالیات از گدا
بود مفلس اندر امان خدا
....
....

چکرسن سن آلتی شکل دفتره
ساتاشیرسان آخوند دین پروره
اگر حق سوزین وار دو چیخ منبره
بگو بر جماعت لیال و سحور

چو رفتی به بالای منبر چو برق
به صلوات شادت کنند اهل شرق
بگیرند دستت ببوسند خلق
اگر گفته باشی ز حور و قصور

الا ای برازندۀ چاه ویل
اگر سنده وار دین اسلامه میل
قلم آل اله یاز دعای کمیل
که لازمدی بو چوخ به اهل قبور

تو غیبت کنی صبح و عصر و ضحی
تو صحبت کنی از تیاتورها
دییرسن گولون سیزده نادرشاها
ائدر خلق دوران عبور و مرور

دف و تار او دم، آه و زار ایلیور
دل عاشقی بیقرار ایلیور
ییخیر دین ائوین تار و مار ایلیور
نگاه دو چشم بنات طهور

نه مفتون شَبدَر و نه لاله در
عجم ملتی عاشق ناله در
مگر بو جماعت تکذ خاله در
که آلسین غازیت سندن ای بیشعور

اگر طالب جنت خرمی
به کوی شتربان گذر کن همی
بکن توبه در پیش ملا عمی
ز عصیان نسیان ز فسق و فجور

دییرسن که یوخسولار ایلر ختو
چکر بگلر آتینا شال وقشو
یازیرسان که خانلار ییه رلر چلو
گیه ر اگنینه پوستین سمور

ستیزه مکن با خداداگان
خدا داده دولت به شهزادگان
به بالا رود کار افتادگان
لنینی کند چون در ایران ظهور



گونئیلی[ویرایش]

  خبرین وارمی سنین بخت قارا گونئیلی تازا مأمور گلیبدور گنه بورا گونئیلی  
  ایکی مین فعله ایستر دولت اهل گونئیدن وئرسین چوره ک چراغین سالسین یولا گونئیلی  
 فعله لر گئدر شهره آلسین اله کولونگی تبریزلییه قاییرسین راه قونقا گونئیلی  
 پولی وئریب گلدانا، تیرمه زری یورغانا شهر میلیونرلری اولوب گذا گونئیلی  
 مأمورلار سویلر شرقی، باغلار آغاجا خلقی بئله روایت ایلر کوثون خالا گونئیلی  
 آلدیلار اُدون پولی، آلتی یوز تومن قیشدا از برای قوشون شرفخانا گونئیلی  
 آغالار، روضه خوانلار، وئیرمیر حجت یازانلار قارا یاخا ایچوندور هر بیر جفا گونئیلی  
 حامالین بیر اوجونی اودا قویسین چیگنینه ئوزین نه چون کناره چکیر آغا گونئیلی  
  هله نه یین گورموسیز بو درد بی دوانین گوز یاشووز قوروماز بوندان سورا گونئیلی  
 ذاقونی قالدی زنده یر یوزونده لنینین اگر چه ئوزی دولدی گییدیک قارا گونئیلی  
 نه تفلیسه سفر وار، نه شهر استانبولا نه وطنده چوره گی، گئتسین هارا گونئیلی  
 سیز اوروسجا اوخویون همده ماهوت توخویون گلیر بوسه س سمادن، گئتسین هارا گونئیلی  
 آخوند قویماز ملتی علم ماشین اوخویا نئجه ماهوت توخویا! بارالاها گونئیلی  
 ضرب زید عمرا علمین بیزه اوخودور واعظ قویماز اوخویا علم جغرافیا گونئیلی  
 علم طیاره واردور نموذج کتابیندا اوتوزونجی بابیندا، باخ بیر اورا گونیئلی  
 حب وطن حدیثین معناسین آنلامیرسان وطن وطن دییرسن صبح و مسا گونئیلی  


رنجبرین[ویرایش]

ساقیا ایراندا چوخ مشکلدی حالی رنجبرین
آلتی ایل ایشلر گینه دولماز چوالی رنجبرین

او اکر بوغدانی اما خان ییغار انبارینه
قیشدا یارماسیز یاتار اهل عیالی رنجبرین

خان ساتار آرپانی، دارینی، توکر پولین جیبه
بورجلی ساققالیم یولار باشی بلالی رنجبرین

ملکدار بختور هر گون بویار ساققالینی
ایلده بیر دفعه حنا گورمز عیالی رنجبرین

نوکری ساخلار آغا تا وار دیزینده قوتی
عذرین ایستر چون چوخالدی سن و سالی رنجبرین

خدمت ایله مفته رشبر، بگلریله خانلارا
ائتمه سین من نیلیوم یوخدی کمالی رنجبرین

عقلین ایشلتسه ائدر نوکر آغانی برزگر
بیلمیرم هاردا گئچر فکر و خیالی رنجبرین

معجزا: بیر فکر ائده یدی رنجبر بو باره دا
لیک بورنین سیلمکه یوخدور مجالی رنجبرین


سلطان مالیدور[ویرایش]

 ای اوغول پشمک نوغول سرهنگ و سلطان مالیدور حضرت صدری جناب جوجه اعیان مالیدور  
 ای پلو، ای کوکب رخشنده روشن واریکن بیر پارا احمق دییه ر شوربا اوباشدان مالیدور  
  قند شیریندور نجاست ایله مز تأثیر اونا سال چایا سن ایچ اونی گیرم لهستان مالیدور  
 ای کاسب یوم گوزلرین قندانه کج کج باخما یوخ شیره و قند و پلو دولتلی اوغلان مالیدور  
 تورپ، چوغوندور، شور نخود، نان و پنیر مال گدا پرتغال، نارنج و لیمو، بال، خاما خان مالیدور  
 او تومانیکه ائدر گوم گوی قیچین باشین سنین نیلی سوداندان گلیر ظن ائتمه ایران مالیدور  
 آغ سماورلر، قاشقلار، استکانلار، تفسیلر زرلی فنجانلار تماما کافرستان مالیدور  
 جوت فیتیللی لامپالار، آئینه لر آویزه لر لوقسلار، دیوار کوبلر، جاملار آلمان مالیدور  
 قوروت ازه ن، کسک دوگن، ئوز مالیمیزدور دوستان او قوی هیکل قازان سام و نریمان مالیدور  
 تلغراف و تلفون اوتور دگیل مال وطن آت دوه، ایششه ک، قاطیر قاصد مسلمان مالیدور  
 بنگ محصول وطندور، شیره و تریاک هم آت و چک ایچمه عرق چونکه او شیطان مالیدور  
 او چراغلار که یاناندا روشن ایلر کوچه نی کافر و لامذهب و بی دین و ایمان مالیدور  
 وزنی اوچ باتمان گلن حاجی رسول بستیلری پیسه ری قالین قولی قوتلی انسان مالیدور  
 نردبان، کرسی، دیبک، قاپی، آتیشقا، پنجره چاخچاخی، پردی، دروسار، هامی وایقان مالیدور  
  فونقرافی که آلیبسان اللی بش تومانه سن کئف چکیرسن روز و شب خالص آمرقان مالیدور  
  قحبه، جندا، ماتیشقا، فاحشه هر یرده وار صیغه اما خالصا مخلص خراسان مالیدور  
 بیلمیرم هاردان گلیب ملا علی ذاکر، فقط زعفر جن مطلقا حضرت سلیمان مالیدور  
  فالچیلار، جن دارلار چیخمیش بیزیم فابریقادان طاسی هم فالچیلارین زنجان و کاشان مالیدور  
  قارقالار طیاره میزدور، سرچه لر بالونیمیز شیشۀ قلبی سینار، ال وورما ایران مالیدور  
 خلق ائدیب اون یدی واعظ هر بیری بیر مسجدی خلق ظن ایلر که بونلار اوستا رحمان مالیدور  
  اختلاف رنگ و بو یوخ مذهب اسلامیده سیز دییه ر سیز بو لرستان بو خوزستان مالیدور  
  ای جماعت باخمیین تعریفینه، توصیفینه معجزین ساتدیقلاری پس مانده دکان مالیدور  

پولدور پول[ویرایش]

گونده بیر پولسوزی قصاب اجل داره چکیر
برکیدیر ال آیاغین اوستنه قداره چکیر
باهالیقدان نه لر او کاسب بیچاره چکیر

چوره گه وئرمگه یوخ درهم و دیناری داداش
قره پولدور کیشینین غم گونی غمحواری داداش

قیزیلی قیز کیمی آل قوینووا یات تا به سحر
سنه نه گر اولا دنیا هاموسی زیر و زبر
کمره قویما زر و سیموی ای نور بصر

جان کیمی باغریوا باس درهم و دیناری داداش
چونکه پولدور کیشینین غم گونی غمخواری داداش

ایسته سن راحت اولوب کئف چکه سن یای و قیشی
قیچون آروات قیچینا چاتما آبیچاره کیشی
انگیوی ناللاما بیجا یره دولدور جیبیشی

چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش

اولا گر آی کیمی هم حسن و جمالی کاسبین
عقلین آزسا خوشونا گلسه خیالی کاسبین
وارلی آلماز قیزینی باشی بلالی کاسبین

بونی یوز یرده سنه امر ایلییب تاری داداش
جان کیمی باغریوا باس درهم دیناری داداش

نه قدر چرکین اولا وارلی قیزی آل قوجاغا
بنزیه گر صفتی رندییه، باشی قاباغا
چونکه او درهم و دیناردی باشدان آیاغا

جان کیمی باغریوا باس درهم و دیناری داداش
بونی یوز یرده سنه امر ایلییب تاری داداش

پوللی حمامه گلنده ییغیشیرلار یانینا
اوستا، رشبر، جامادار کیسه چکرلر جانینا
یاغلی قویروقدوی هره بیر پای آتارلار دامینا

چونکه پولدور کیشینین غم گونی غمخواری داداش
بونی یوز یرده سنه امر ایلییب تاری داداش

پوللی هر هفته بویار ساققالینی قیر کیمی
میل ائدر قایقاناقی نعره چکر شیر کیمی
یوخدی پول قدری بیلن دهرده جیب گیر کیمی

چونکه پولدور کیشینین غم گونی غمخواری داداش
بونی یوز یرده سنه امر ایلییب تاری داداش

پاراسیز اولمیاسان، کار اولاسان، کور اولاسان
پول الوندن یاپیشا عازم بازار اولاسان
دار دنیاده اگر ایسته میسن خوار اولاسان

جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش

پلووی پوللی ائدر میل بو بیر قاعده دور
فیرنی شهد شکر پولسوزا بی فائده دور
سوزیمه ایله عمل گر قولاغین دائی ده دور

بونی یوز یرده سنه امر ایلییب تاری داداش
جان کیمی باغریوا باس درهم دیناری داداش

چاشتیه پوللی ییه ر کوفته نی غلیانی چکر
خوب شیرینه گئدر باشینه یورغانی چکر
فقرانین پولی یوخ محنت ایامی چکر

چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش

گله بلبل کیمی عاشقلق ائدیب یورما سه سین
عاشق سیم و زر اول عشقه اگر وار هوسین
گل نه دور، عشق نه دور، پولدی سنین دادرسین

بونی یوز یرده سنه امر ایلییب تاری داداش
جان کیمی باغریوا باس درهم دیناری داداش

یوخدی بیز زاد جهاندا قره دن ایسته مه لی
پولیله ممکن اولار سبزه، تبرزه، عسلی
یوخلاما جان قولاغین وئر منه ای رستم علی

بونی یوز یرده سنه امر ایلییب تاری داداش
جان کیمی باغریوا باس درهم دیناری داداش

بیر کرور اهل وطن قان قوسور ایراندا بو گون
فقرانین ازیلیر باشی دگیرماندا بوگون
دییرم من بو سوزی هر کسه هر یاندا بو گون

قره پولدور کیشینین غم گونی غمحواری داداش
جان کیمی باغریوا باس درهم دیناری داداش

حاجیلار صدر مجالسده همیشه قورولور
سوزی گئچمز کاسبین بوش یره آغزی یورولور
پولی پولسوز ئولونین اوجونا قویسان دیریلیر

چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش

مجلسه داخل اولور پوللی خانیم لاله کیمی
یاد و بیگانه آلیر دوره سینی هاله کیمی
سفره ده تک قالی پولسوز باجی غساله کیمی

چونکه پولدور کیشینین غم گونی غمخواری داداش
جان کیمی باغریوا باس درهم دیناری داداش

یار و یولداش و رفیقین هامیسیندان آ کیشی
چونکه یوخدور سنه بیر فایدا بولاردان آ کیشی
دوست بسدور سنه قوینونداکی جزدان آ کیشی

جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش

یار و یولداش قارا گونده قویاجاقلا سیزی تک
گر آجیندان ئوله سن بیر تیکه وئرمز له چوره ک
یانوا قویما بغیر از لئره، مجدیه، چره ک

جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش

گرچه واعظ سنه هی ترک ائله دنیانی دییر
جان کیمی باغریوا باس حوری و غلمانی دییر
اده! معجز ده سنه بو سوزی پنهانی دییر

سوزیمه ایله عمل ای قره گوز، ساری داداش
جان کیمی باغریوا باس درهم دیناری داداش
چونکه پولدور کیشینین غم گونی غمخواری داداش


ای دوستان[ویرایش]

چیخدی گون ایندی گلیر یار الده نار ای دوستان
وه نه خوشدور روز عیده وصل یار ای دوستان

بوسه نین نرخین منجم چوخ باها یازمیش بو ایل
قورخیرام الدن گئده دار و ندار ای دوستان

کئف نه لازمدی جوانه، ساقیا می وئر منه
عفو ائدین چون اولمیشام بی اختیار ای دوستان

گئتدی باده باد سرما مژده ای یاران من
قاری پامال ایلدی باد بهار ای دوستان

کرۀ ارضه حرارت وئردی نوی آفتاب
آز قالیر باش قالدیرا یرده نه وار ای دوستان

غلغله افلاکه سالمیش ایندی هر بیر شهرده
صوت مطرب، یانک نی، آواز تار ای دوستان

طالب دم دود اولان عزم خراسان ایله سین
بو مقدس یرده اولماز دارا دار ای دوستان

اویناما، چالما، دانیشما، گولمه، دینمه، لال اوتور
یاخشیدور مین دفعه بوردان بیر مزار ای دوستان

نه تجارت، نه زراعت وار بو ویران خانه ده
وار فقط بیر گوز یاشی، بیر آه و زار ای دوستان

منفعت یوخدور شبسترده جماعت الفرار
یاخشیدور ملک گونئی ده شندوار ای دوستان

کوچه لر دار، زیغ چومور، ممکن دگیل سئیر ایلمک
وای او گوندن که دولار ابر بهار ای دوستان

گوز گوزی گورمز، گئجه یاران گوزتلین کندیزی
قورخورام هم باشیزی یارا دیوار ای دوستان

بیر ایشیق لازمدی ایندی تا بو ظلمتدن چیخاق
قوی سیزه بیر سوز دییم مثل فنار ای دوستان

تازه بیر یر یاپدیریب اعیان ملت سئیر ایچون
گورمیوب هرگز نظیرین روزگار ای دوستان

گرچه ملت باخچاسی تفلیسده هم باکودا وار
هئچ بیری اولماز بونیله هم عیار ای دوستان

چیخ حمامین دامینه سئیر ایله ملت باخچاسین
گون باتان سمتنده دور بو لاله زار ای دوستان

حور عین ایستر خدادن مؤمن بی معرفت
خازن چنت گولر بی اختیار ای دوستان

باغلامازلار مرکبی انسان یرینده هیچ وقت
جنتی فرض ئتمیون دار الحمار ای دوستان

دورموشام سد سکندر تک گلین میدانیمه
سویله رم هل من مبارز آشکار ای دوستان

معجزین تیغ زبانی چون غلافیندن چیخار
قهرمان اولسا قاباغندان قاچار ای دوستان



یا رب[ویرایش]

سن گورمه میسن درد نه دی درمان نه دی یا رب
مندن خبر آل زحمت دندان نه دی یا رب

عقرب کیمی سانجار منی آغزیمدا کی دیشلر
بیلمزمی مگر صانع جان، جان نه دی یا رب

راحم قوی آدین توک دولونی باغینه خلقین
راحم نه دئمک، معنی رحمان نه دی یا رب

بیلسیدی فلک دام ییخیلار گر دوشه نودان
سالمازدی اونی، بیلمز او نودان نه دی یا رب

دامدا نه چوغوندور اکر ایرانلی نه مرزه
بیر یاخشی دوشون، دام نه دی نودان نه دی یا رب

ماه رمضان فصل زمستان، اودا چوخ برک
ملت توتا، یا میل ائده؟ فرمان نه دی یارب؟

بوینی یوغون آلمانلاریدا ایله مکلف
تا توتسون اوروج بیلسین اوباشدان نه دی یارب

لاغر بدن ایرانلیا لطفین نیه چوخدور
بیر مشت عجمه بو قدر احسان نه دی یا رب

بالونیله افلاکه چیخار یاندیری جرخین
آلمان بیله گر روزه و رمضان نه دی یا رب

واعظ بویورور باشووا وور، جانیوی اینجیت
بو باره ده تکلیف مسلمان نه دی یا رب

کله ن دئدیم آهندی غضبلندی کفن پوش
آهن دگی گر کلۀ نادان نه دی یا رب

تغییر اگر وئرمیه جک خلقونه خلقین
پس فسلفۀ دین نه دی، ارکان نه دی یا رب

گر قورخیدیر آیات جهنم بیزی، پس بو
امنیه و نظمیه و آژدان نه دی یا رب

بی پرده گزیر نسترن و سوسن و سنبل
اسرار سیه پردۀ نسوان نه دی یا رب

اخلاقی پوزار گر دییه سن حسن وجاهت
طرلان قوشی تک بو گوزه ل اوغلان نه دی یا رب

حکم ایله اودا یوز توتا ساققالی چیخینجا
بوشلا گئده تقصیر تکذبان نه دی یا رب

من ده قیلارام صاحب میلیاندا نمازی
آخر منیله فرق فلان خان نه دی یا رب

اوچ یوز تومن آیلیق ییه ر او، من غم و غصه
علت نه دی، حکمت نه دی، برهان نه دی یا رب

مبعوث چلوخواره بیزی ائتمه حواله
بیلمز او غم و غصۀ چایدان نه دی یا رب

سن ظن ائدیسن یوخدی منیم قتلیمه تشنه
چای و شکر و دویی گیلان نه دی یا رب

هرگز دوزه بیلمز بو قدر منته انسان
انسان دگی گر ملت ایران، نه دی یا رب

عزم ایله میسن معجزی ئولدورمگه ئولدیر
یوز جان سنه قوربان اولا، بو جان نه دی یا رب


الله[ویرایش]

 بیر آز ایستر آییلا ملت ایران الله دستی یورغانی چکر باشینا مُلّان الله  
  یاتدی نادان، قویوب سجدیه باشینی آخوند دئدی: ای جسمیمه جان، دردیمه درمان الله  
 یارادیبسان منه یا رب نه حمل حیوانلار مینمه سی، سورمه سی، یوک چاتماسی آسان الله  
 عقل وئرره م دییه وعد ائتدی بو بی عقله خدا بیلمیرم نولدی سورا اولدی پشیمان الله  
  دییسن ائتمه نظر عارض خوبانه طرف نیه بس خلق اولونوب بو گوزل انسان الله  
 یارادیبسان علفی تا ایده خوراک حیوان خلق ایدیبسن گلی تا ایلیه انسان الله  
 گلشن حسنی ائدیب خار شریعت غارت گورنه پیس حاله قالیب سیب زنخدان الله  
  کاش سنده اوشییدین بئله مخلوق کیمی تا بیلیدین نه چکیر قیش گونی عریان الله  
 دمیرم بو لوته بیر دست لباس ایله عطا ایکی آرشین شیله ویر ایلیه تومان الله  
 ویرمیسن بو آجا اوتوز ایکی دیش مثل صدف اولماسا دن نیه لازم دی دگیرمان الله  
   
 گورسه نیر دایرۀ عصمتی بو عاجزه نین گولمه ییم من نیجه ای خالق منان الله  
  کون حوایه باخیب گولدی تمام حوریلر چون سویوندیردی اونی خازن رضوان الله  
  باغ رضواندان ئوتوردون ائشیگه تومانچاق کاش آدم یمیییدی ایکی بوغدان الله  
 نه گنه صاحبیدی بو ایکی یاشیندا اوشاق قارنی آج، پالتاری یوخ، آی سنه قوربان الله  
 بورکی یوخ، باشماغی یوخ، پیکری عریان بیکس دولانیر کوچه و بازاری پریشان الله  
 سنی رزّاق بیلیب، اَکدی بونی بیچاره کیشی بیلمدی آخر آجندان ویره جک جان الله  
 ای ویرن بیر صلواته ایکی مین قصر طلا ایوین آباد اولا ای صاحب احسان الله  
  او عمارتلری سات توک فقرانین جیبینه وئر او پولدان منه ده بیر ایکی تومان الله  
  ایکی بوغدان ییب آدم ایکی مین ایل اوّل هله ده ایلیری رسوای اونی قرآن الله  
 ایسته ییردی بیری مسجدده خدادن یورغان گوردوم آغلار، دییه ر: ای قادر منّان الله!  
 دیدیم آخماق کیشی گونده سنه بیر دانه لاواش ویره بیلمز، نئجه ویرسین سنه یورغان الله  
 یا گرک قویمیاسان آدیوی رحمان رحیم یا گرک ایلیه سن عدلیله دیوان الله  
  بالی خلق ایله میسن یوخسولی چاتداتماق ایچون دوزدی بو سوز دیمیرم من سنه بهتان الله  
 اللی یاشیدی رحیمین یمه ییب بیر یول بال ایلده یوز یول یه ییر اما حاجی رحمان الله  
   
 معجزین بار ستم قامتینی ایتدی کمان ئولدیم آخر یره گلسین گوروم آرخان آلله  


لازمدر[ویرایش]

اگر جنابوه آه و انین لازمدر
می ایچمیشم منه هم بیر قرین لازمدر

دئدی بوراخ غزیتی، آل بو وردی ازبرله
دئدیم: آخوند منه حبل المتین لازمدر

گلنده درده دیشین سن دعا اوخی واعظ
فقط منیم دیشیمه کلبتین لازمدر

سنین کئفین ایله ایستر، منیم کئفیم بئله
سیزه همان فقیر و فقیره انین لازمدور

دئدی:رساله اوخورسان، دئدیم: حساب اوخورام
دئدی حساب دگل، شخصه دین لازمدر

دئدیم که دینی نه ساخلار، دئدی: مسلمانلق
دئدیم: خیر! ایکی یوزمین سپاه مبین لازمدر

دئدی: جفنگ دانیشما، خدادی حافظ دین
بیزه نه توپچی نه سرباز و ذره بین لازمدر

دئدیم: نیچون قاپووی باغلیسان یاتان وقتده؟
دئمک سنه کره و انگبین لازمدر

قاپووی قویسان آچیق دزد اولار ائوه داخل
آپارسا مالی، سحر شور و شین لازمدر

عیالین اولسا دل آرا، او دزد لا مذهب
تصرف ایلر، او بیلمز کبین لازمدر



قدیم سربازلار[ویرایش]

ایام سلف بیزیم دیارین
سربازلری نعوذ بالله

اورتاسینی قیرخدیراردی باشین
حقا که مثال راه ماشین

بیر کیسه چوبوق بئلینده دائم
بیر قدرده منتظر به قائم

بوحالتیله بدون اغماض
میداندا قدم ووراردی سرباز

اویناردی وئرنده مشق مشاق
قولتوق جیبینده داش چاخماق

بیر یاندن او بند زیر جامعه
افعی کیمی آند اولا امامه

شرقا و جنوبا و شمالا
قالخاردی دوشردی اتضالا

اگنینه چیت آرخالیق گییه ردی
ئوزی پیشریب ئوزی ییه ردی

سرباز قدیم بوالعجایب
نه جیره آلاردی نه مواجب

سرهنگ ییه ردی وارداتین
نایب و یاور و سلاطین

چون رشوتی وئردی آلدی رخصت
آزاده اولاردی خیلی مدت

بیر کوچه باشیندا اگله شردی
قیچین اوزاداردی ساپ ائشه ردی

سرکرده لری وئره ردی آیلیق
سرباز ائده ردی پینه دوزلوق

باشماق یاماردی کبله عابدین
بورکینده نشان ناصرالدین

یانینا ییغاردی کهنه پاره
سرراه گذرده بخت قاره

سلطانی گورنده تا اوزاقدان
ایلردی فراغت ایشله ماقدان

بیر الده گزن، بیر الده ایگنه
آند اولسون آغام امام حسینه

قالخاردی آیاغه چاس ووراردی
سلطان سبیللرین بوراردی

با کبر و غرورو و فخر مزداد
سرباز باخیب دییه ردی "آزاد"

توپخانه محل دفغ حاجت
سربازخانه مرکز کثافت

بئله یدی او عصرین انتظامی
قیسالداق اوزاتمیاق کلامی

یا معجز اذانچی چیخدی دامه
بسدر سوزیوی یتیر ختامه



حکمت[ویرایش]

گیاه ئولر، دیریلر باز صحن گلشنده
نیه ئولوبده بنی آدم اولماسین زنده

هزار سال یاتیب قبر ائوینده مستانه
دوروب مراجعت ائتسم دوباره بو کنده

اگر دوشه یادیما ظلم چای و قند اوندا
دخی عبانی ساتیب وئرمرم چایا، قنده

بها اولاردی چوره ک بیرزمان محمدعلی
گولردی خلقین ئوزی باز سال آینده

چیتین اوجوزلیقی لاکن قیامته قالدی
تکذبانه دیین گر قالا گینه منده

لباس اولمیاجاق، قول قیچی اگر اوشییه
گرک تویوق کیمی صبح و مسا یاتا نینده

دئیین اونا که عجب ئولمه لی زماندی زمان
ئول، ائتمه بوشلی یانیندا اریوی شرمنده

فقیرین حالینی بیلمز او میلیونر وکلا
گرک منیم کیمی بی چیز اولا نماینده

وئره ردی لوتلره شالوار، دون، پیراهن
یاتئیدی بیر گجه گر مالدار کلخنده

خوشا سعادتنه حضرت مسیحانین
نه عورته تومان آلدی، نه کفش فرزنده

اسیر شام کیمی دستگیر ائدیبله منی
ووروبلا بوینوما زنجیر آیاغیما کونده

دئدی قولاغیما غم چکمه مهیا اول
او گون که معجزی خلق ائتدی آفریننده

مگر قولا باخار آغا بونوعیلن یا رب
خطا که ائتمه میشم اولمیشام سنه بنده

اوچ هفته متصلا گوز یاشی نثار ائده رم
خدا نکرده اگر بیر گون ایلیام خنده


دنیانین[ویرایش]

گئچر گئدر سنوات شهوری دنیانین
مثال ابر لیال سحوری دنیانین

بوگون که چیخدی باشا بیر گون عمردن گئتدی
همیشه لیک دگی عیش و سروری دنیانین

سوروش دئسین سنه بیر بیر گئچنلرین حالین
سرای گوریده بهرام گوری دنیانین

داغیتدی کلۀ کاووسی قبرده حشرات
قاریشدی تورپاغا کبر و غروری دنیانین

ائدر سوموکلری سورمه آلیات جهان
تناول ایلر اتون مار و موری دنیانین

بنوره سین نه قدر محکم ایله سن ایله
تکان وئرنده ییخار چوخدی زوری دنیانین

چون عزم ائتدی اجل پهلوانی میدانه
قیلینجی سالدی یئره شاه پوری دنیانین


ایچون[ویرایش]

دییه للر غم یارانیب مندرس عبالر ایچون
دیین گدایه که حاضر اولا بلالر ایچون

سن ایشله صبح و مسا ای جفا کش دوران
عمارت ایله بنا محترم آغالر ایچون

او حجره، حجره دییب فروش ایده، درویش
اوحجره ده گیه جک یوخدی بینوالر ایچون

قدر ایشین اوزادیر، پامبوغین قضا اگیره ر
فلک گیریپ پاچالا بیز توخور گدالر ایچون

گوزیوی یوم بچه بالی گورنده ای مسکین
اونی فقط قاییریب آری اغنیالر ایچون

کباب ائدر اتین اعیان قویار پلو اوزونه
خدا ائدیب قویونی خلق ناخدالر ایچون

حنا و رنگی غبار ایله توزدی رنجبرین
اکه ر حنا ایله رنگی او اغنیالر ایچون

بلانی سئودیگی انسانلارا وئره ر تاری
او بیر هدیۀ عظما در اغنیالر ایچون

قرا گوز حوریلری معجزه ساییر واعظ
ئوزینده یوخ هوسی هئچ او مه لقالر ایچون


غربت[ویرایش]

کیم گوره سن غربتی ایجاد ائدیب
هر کس ائدیب، من کیمی بیمار اولا

ترک دیار ایله مگین باعثی
اولسا، گرک ظلم طلبکار اولا

قالسا وطنده گئده جک عزتی
هم تکذین چادری و چرقتی
جانیوی اینجیتمه اوغول، عورتی
بوشلا، و لو که ممه سی نار اولا

تذکره اون دورت تومنه مالدر
قول پولی اونداندا قریشمالدر
یولچی نه ائشکدی، نه حمالدر
تا بو قدر ظلمه خریدار اولا

سن ده بیلیرسن که او تاجر دگل
بونجا پولی وئرمگه قادر دگل
بوشلا یاخاسین بورا بیر یر دگل
قوی گئده استانبولا تجار اولا

گونده ره حق هر گون اگر رحمتین
ائتمز اوجوز تذکره نین قیمتین
ائیلیین آگاه رسول امتین
جیبده گرک درهم و دینار اولا

خرجی وار هشتاد تومن گئتماغین
یا ائوی قوی بیع و یا سات باغین
قورخورام آخر یخیلا مطباغین
پردیلری عازم بازار اولا

تورک منه وئردیسه دوتیوز لیره
غصه وغمدن توتولار خیرخیره
یا زهر ایچ، یا سال ئوزون تندیره
قویما غرض حوصله چوخ دار اولا

غارت اگر ایلمیه خیمه نی
حرمله و خولی و شمر دنی
غصه بوغار یوخسول بیچاره نی
اللرین ای مرثیه خوان وار اولا

سن او دییرسن وره سن جانیوی
سایمیشم اغزونداکی دندانیوی
سن باتورارسان گینه توممانیوی
شیمر اگر ایندی پدیدار اولا

سنیز اگر بالغ اولوب اللیه
قدّره نی برک وورون کلیه
بلکه سیزی آخرته یوللیه
خلق گییه قاره عزادار اولا

بسکه ایچر شیرۀ انگوردن
شاعرین اولماز خبری صوریدن
مست چیخار دائرۀ گوریدن
کاش هامی معجز کیمی دیندار اولا

خلقه[ویرایش]

  ایچیرتدین شیخنا صبح و مسا خون جگر خلقه گهی لطفیله، گاهی قهریله ائتدین نه لرخلقه  
  نه تلفون ایلدین نه تلغراف ایجاد ای واعظ مگر ماشینی سن یاپدین که اولدون تاج سر خلقه  
 چراغ برقیله دنیانی روشن ایلدی کافر مسلمان سن نه ائتدین اختراع وئردین خبر خلقه  
 آمرقا عالمی خلق ائتدی بیر دستگاه آهندن گهی دف چالدی آهن، گاه نی شام و سحر خلقه  
 دئدین سن ملته یار باشیوی آچ سینه نین بندین دوشون دَل میخ و مسماریله ئورگتدین نه لر خلقه  
 پدر اولادین حفظ ایلر اسارتدن، جهالتدن عموی کم لیاقت سن نچون اولدین پدر خلقه  
  گونوللر عرصه سینده دائما تخم نفاق اکدین سئویدین سن اگر خلقی اکردین بهر بر خلقه  


گئده‌ر[ویرایش]

هر ایشده بیر امیدیله انسان یاشار گئده ر
نیک و بده باخیلماسا هر ایش آشار گئده ر

وار اختلاف طبعده، اخلاق بیر دگل
هر کس بیر ئوزگه ایش دالیسینجا قوشار گئده ر

آسان دگیل، اینانمیین عالمده بو سوزه
عورتله ار گئچینمه سه آسان، بوشار گئدره ر

مجروح سورما آچوب اشعار روزنه
آری عسل سینیق قابا قویسان داشار گئده ر

دنیا بیر سیرگاهدر هر کس گلر گزه ر
بیر نام نیک قالسا قالار، سیم و زر گئده ر

وار اطلاعی معجزین اسرار خلقته
اسراره واقف اولمیان البته شاشار گئده ر


اولمیشام[ویرایش]

من نه نظمیه، نه امنیه نه آژان اولمیشام
یا نه چون منفور خاص و عام دوران اولمیشام

نه قیزیلباشم، نه فراشم، نه حاکم ساقیا
بیر سوروش مندن: نه چون پس من مسلمان اولمیشام

بوغدایا ساری دئدیدم، قیرا قارا، شیره سفید
او جهتدن من بئله بی دین و ایمان اولمیشام

بیمروت گورمیشم بسکه مسلمان فرقه سین
ائتمیشم نفرت مسلمانلیقدان انسان اولمیشام

من سیزی اشراف ظن ائتدیم ایناندیم قولیزه
بولمدیم علافیمیش سیز، چوخ پشیمان اولمیشام

اولمایین راضی بونا که، من ییه م سرمایه نی
ال آچام خلقه، دییه م یاران پریشان اولمیشام



دوندی[ویرایش]

 یتیش هرایمه ساقی که دیگ جان دوندی سویوق امانیمی کسدی بدنده قان دوندی  
 گئدین دییون گونشه پینجینه اودون قویسون توقف ایلمسین کرۀ جهان دوندی  
  بش آلتی گوندی پیشیک آه و زار ائدر آغلار وورار قفایه دییه ر: ای خدا سیچان دوندی  
 نه کوزه قالدی، نه شیشه، نه کاسه، نه فنجان نه چایدان، نه سماور یکان یکان دوندی  
  خانم دئدی: چوره ک آل! عزم چارسو ائتدیم تزلزل ایلدی اعصابیم استخوان دوندی  
  سرشک دیده دونوب سالانیردی سققلدن منی او حالیله گورجک تکذبان دوندی  
  اذانچی چیخدی داما ایسته دی آچا آغزین سویوق چو لفظ جلاله دگیب اذان دوندی  
 جهنم اهلینه یالواردی خازن جنت دئدی: آماندی بیر اوت وئر که حوریان دوندی  
 جواب وئردیله که: ایله سویوقدی سقر ایچینده هر نه که وار عقرب و ایلان دوندی  
 اصول مذهب و دینی سویوق آپاردی تمام نه بابی قالدی، نه اسلام، جملتان دوندی  
 گوروب بو حالی آخوند نعره ای چکیب ییخیلیب بوز اوسته، بوز کیمی اول جنت آشیان دوندی  
  امین وحی ندا ائتدی پس به صوت بلند: بیلین ای اهل جهان قاسم جنان دوندی  
 نه رشوه گیر و نه موقوفه خواره قالدی جهان نمازه حاضر اولون بیر رساله دان دوندی  
  دونار سویوقدا همیشه فقیره رسمیدی بو خدایا شکر که بیرده پلو ییه ن دوندی  
 فقیر! بیر گویه باخ، گور نه تیتریر اولدوزلار هوایه آچما دهانین که کهکشان دوندی  
 نه آه سرد چکیب خلقی بیقرار ائدیبسیز صبور اولون ای اودونسوزلار آسمان دوندی  
 فرشتگان خدایه خبر وئرین گلسین که نظم معجز گم گشته در دهان دوندی  


جان[ویرایش]

نه برک یرده دی جان ایسته میر چیخا تندن
مگر بو جانی خدا خلق ائدوبدی آهندن

بوقدر زحمته بیلمم نچون تحمل ائدیر
جهت نه در نیه چیخمیر بوتنگ مسکندن

اگر مسافره منزلده بیر گئجه گئچه بد
چاتار یوکین، چیخار اوردان، صباح ایرکندن

او منزلی که قاچار مور و مار او منزلدن
سبب نولا، نیه جان نفرت ایلمیر اوندان

اگر بدن ائده اندیشه حق وار چونکه
هراس ائدر هامی غسال و گور و گورکندن

بو جان نه دن ائدیر اندیشه بیلمیرم یاران
سؤال ائدین بونی سیز بیر او روح کودندن

گرک که اولمیا واعظ دییه ن کیمی، که بو جان
دوزور بو زحمته، اولمور کنار او گلخندن

اگر اولییدی او دنیاده حور و عین و بهشت
بدون عذر و بهانه چکردی ال مندن

گرک که آنلیاجاق یوخدر اوردا بیر خوشلوق
و گرنه کیم گئچر عالمده سرو و سوسندن



ایستر[ویرایش]

ملک الموتی نه بولغار، نه یونان ایستر
اونی دنیاده فقط ملت ایران ایستر

تنگدر راهگذارون، در و دیوارون اوجا
حرکت ایلسه یر، قاچماغا میدان ایستر

یوز تومن دوقتورا جنداره وئریر کربلایی
باش قویار سجدیه خلاقدان اوغلان ایستر

آی کیشی نیلیسن اوغلانی که حاضردی بلا
اونی حفظ ائتمگه بین یاخشی خیابان ایستر

یخیلا مدرسه گر باشینا شاگردانین
وارثی عرضه ویره ر مدرسه دن قان ایستر

رنجبر خنجریله کله سین ایلر یاره
نیه بیلمم او ئوزین قاننه غلطان ایستر

سیزین احسانیزی ای قانلی کفن قارداشلار
نه ابوالفضل و نه شاه شهیدان ایستر

ایستیسن اولمیاسان دهرده محتاج طبیب
قانیوی ائتمه تلف، چون کی بدن قان ایستر

آلتی آی ایگنه سنه وورسا طبیبان بلد
ایگنه نین هر بیرینه مزد ایکی تومان ایستر

سن دوامین آلا بیلمزسن اوغول بو خرجین
چونکی ناخوش کیشینین گونلی بادمجان ایستر


چیچه‌ک[ویرایش]

ایکی قیز آلدین الیمدن بویادون قانه چیچه ک
بیری بیر دانه دی رحم ایله بو اوغلانه چیچه ک

دئدیم اوغلانه چیچه ک دویدوراخ عورت دئدی یوخ
اعتقاد ائیلمدیم منده او درمانه چیچه ک

تیتره رم برگ خزان تک گئجه لر تا به صباح
ایکی قوربان کسه ره م گر گئده دریانه چیچه ک

خلق ائدیب خالق جان ای باجی هر درده دوا
عاقلیله ایشی یوخ بند اولی نادانه چیچه ک

لوح محفوظه یازیلمیش گرک ئولسین بالالار
بو "گرک" لفظی گرک اود وورا ایرانه چیچه ک

قبر قازماقدان اولوبدر ال ایاغی شل و کوت
بیزه رحم ایله مسن، رحم ائله گورکانه چیچه ک

گوزه لی چرکین ائدیب، ایلمه رسوای جهان
قورخورام قیزلار الیندن قاچا تهرانه چیچه ک

قیزلارین شکوه سینی گر ائشیده شاه جهان
باغلار او قوللاروی گونده ری زندانه چیچه ک

بو قیزی کیم آلاجاق قوینونا ای وای به من
قاشی یوخ، کیپریکی یوخ، بنزه مز انسانه چیچه ک

گر چیچه ک یرلرینه سورته بو بیر پوط کرشان
یئنه گلمز صفته حیف اولا کرشانه چیچه ک

اوخشار آغلار آنالار، چون دییه ر ای وای بالا وای
در و دیوار گلر ناله و افغانه چیچه ک

آنا چون گوردی جگر پاره سنی قان آپاریر
غصه دن اولدی دلی دوشدی بیابانه چیچه ک

نه فرنگ ایله ایشین وار، نه اوروس ایله سنین
اولموسان بند فقط ملت ایرانه چیچه ک

اود ووروب باشدان ایاغه عجمستانی قیریر
نه آمرقانه گئدیرسن و نه آلمانه چیچه ک

قورخورام ایلیه غلمانه سرایت بو مرض
بو اوشاقلار که گئدیر روضه و رضوانه چیچک

ئولمه لی چوخ قوجالار ارونق انزابده وار
طفل معصوم آپاریرسان نیه دیوانه چیچه ک

اعتقاد ایله سه پیونده مسلمان، معجز
بو قدر ایله مزآزار مسلمانه چیچه ک


اولسون گرک[ویرایش]

 مجلس عشرتده دائم ساز و یار اولسون گرک عارضی گلناره بنزه‌ر بیر نگار اولسون گرک  
  دلبرین زلفی شب یلدا، جمالی چلچراغ لبلری خوشرنگ وضع آبدار اولسون گرک  
  یازدیلار بومصراعی بیر نامرادین داشینا "نفسینه مغلوب اولان خاک ایچره خوار اولسون گرک"  
 صاحب وجدان اولان هم نوعینی خوار ایسته مز بیر پریشان حال گورجک بیقرار اولسون گرک  
  بیر جوانین من دونن گوردیم جیبینده یوز تومن ایندی بیر دیناری یوخ باعث قومار اولسون گرک  
  واعظ بی مدرکین باشی نه قدر زنده در کنج غربتده جوانلار اختیار اولسون گرک  
  برفی انبار ایلمیش گوگلرده چون خلاقیمیز پرده ده اعیانیمیز انباردار اولوسن گرک  
 حق ئوزی عالیمدی صنعتکار یوخ ایرانده استکان و نعلبکی گویدن نثار اولسون گرک  
 مصلحت بیلسیدی خالق، خلق ائدردی ماشینی خلق ائدیب ائشکلری، ملت سوار اولسون گرک  
 یا گرک تزویر ائدم، یا باش و جانیمدان گچم عمری باشه وئرمگه شام و نهار اولسون گرک  
  رحنه دار اولسون شریعت، پایمال اولسون وطن هر نولور اولسون، مریدیم بیشمار اولسون گرک  
  گئتدی اسلامیت الدن ای قولاغی توکلیلر تازه مکتبلر بناسی تار و مار اولسون گرک  
 ای جماعت جمع اولون جیغ بیغ صداسین قطع ائدین لام زبر لین، جیم زیر جین پایدار اولسون گرک  
 تازه چیخمیش بو کتابه بیر تماشا ایلیون بو ایلان، بو قورباغا، بو سوسمار اولسون گرک  
 بو یوغون قویروقلی حیوانی تانیرسیز یا خیر آلتینا یازمیشلا تولکی حیله کار اولسون گرک  
  بوش یره آلله بلا گونده رمیری بیز میلته یوز بلا و محنته فاسق دچار اولسون گرک  



یاز سوزون[ویرایش]

ای عندلیب باد خبر یاره یاز سوزون
اما جواب وئرمه سه گل، خاره یاز سوزون

بو عصر، عصر علم و کتابتدی دلبریم
گر داشه ممکن اولماسا دیواره یاز سوزون

ملا دییر "حرامیدی" سیندیر قفاسینی
قانه باتیر مدادی دستاره یاز سوزون

اولما رضا که غیر بیله حال زاریوی
ئورگن ئوزین کتابتی دستاره یاز سوزون

دیوار ممکن اولماسا زلف معنبرین
ایله مداد عارض گلناره یاز سوزون

عطار نسیه وئرمسه لوح و قلم سنه
بارماقیوی باس آغزیوا همواره یاز سوزون


گنه واردر[ویرایش]

بو دلبر صد ساله ده حالت گینه واردر
گیسوی سفیدینده طراوت گینه واردر

حالا گزیری مرغ خیالی اورالاردا
گل غنچه لبینده او لطافت گینه واردر

گرچه توکولوب دیشلری میمونه دونوبدر
اما یریشینده او نزاکت گینه واردر

تغییر تاپار حالتیمیز، عادتیمیز یوخ
حمامده، مسجدده کثافت گینه واردر

گز چمچه کتانی، لیوانی، کوزه کنانی
قابلاردا قاشوقلاردا بدایت گینه واردور

قرآن اوخوماق، بیز توخوماق، کوفته پیشرمک
اولی ترقی، او تجارت گینه واردر

گرچه چوخالیبدر پینه چی، فالچی، دیلنچی
اما نه دییوم کشف و کرامت گینه واردر

ایلردی ازل خسته و سیسقا، قوجا، جاهل
هر آی باشی بیر دفعه حجامت گینه واردر

هر درده دوا، گوی زیره جوشانده، اماله
شکر ایله خدایه او طبابت گینه واردر

هر اوده بش آلتی باشی داز قیز، کچل اوغلان
حمامده فریاد و قیامت گینه واردر

مایلدی کفن گئیمگه باش یارماغا قارداش
حمد ایلرم آللهه او عادت گینه واردر

شالوار گییه لی، خیر و برکت گئتدی دییه رلر
شکر ایله باجی، گیمیه ن آروات گینه واردر

آغ، چاق قیچی آلله یارادوب بنده سی گورسون
گئت کهریزه بیر باخ، او رذالت گینه واردر

ایام محرمده قدیم جرگه گیده ردوخ
ترک اولدی ولی ئوزگه جنایت گینه واردر

کهنه لدی دئمه م سوزلریمیز، مسجده گئتمه‌م
غصه ائلمه تازه روایت گینه واردر

یوخدی تازا سوز بیلمه لیسن مرثیه خواندا
معلوم اولونان وحی و رسالت گینه واردر

معجز دئمه دیم من سنه بو سوزلری یازما
اول واریدی سنده سفاهت گینه واردر


یات گوره‌ک[ویرایش]

تا به کی باشیندا جانا چالما و چارقات گوره ک
تا به کی مشرق زمین آرواتلارین خوسمات گوره ک

کهنه شئی در قیرمیزی باشماق، ایاقلیق، کوله جه
گئی جوراب و قوندارا چادرشبی قیسالت گوره ک

خلق اولونموش گل تماشا ایلیه ک، خوشحال اولاق
آچ جمالین هم اوزین ابرولرین اوینات گوره ک

یوخ سوادین تا دییه م آل بو کتابی بیر اوخی
ساکت اگله شمه خانم ایله بیر آز غیبت گوره ک

اشتباه ائتمیش خدا قاره یاراتمیش قاشلارین
قیز، ارین ایندی گلر دور وسمه نی ایسلات گوره ک

سیر ائدر هر گون بیزی چادرشب آلتیندان زنان
اذن وئر واعظ سن الله بیزده بیر آروات گوره ک

قویدی صندل اوسته پهلوسین جناب روضه خوان
بوز دوداغین دلبرا، قاش قاباق تورشات گوره ک

آغلاماغین گلمیری اوخشات ئوزین باکی لره
بارماغون سوخ آغزیوا کیپریکلرین ایسلات گوره ک

ملتین توربا وورانماز باشنا هر بی هنر
ماللالیق آساندی گر سنده بیرین آللات گوره ک

کِرم موهوماتیله قاپلاندی بینی ملتین
بو مضر میکروبلارین خیری نه دور آنلات گوره ک

هر طرف دشمن آلیب بیز خواب ده، ای بولهوس
قورخورام گلمیریوخوم ای ساربان دور چات گوره ک

خواب غفلتدن آییلدی ملت چین و خطا
دویمامیشسان سن هله ایرانلی قارداش یات گوره ک

یوخ دییه رسن معجزا، بو رنگ بو قارت، بو قلم
سن ده بیر حوری یارات کلبه عباده سات گوره ک




البته[ویرایش]

ای دوست سواد اولمیا گر عورتده
نامحرمه محتاج اولاجاق البته

ایستر سنه نامه یازدیرا خاتونین
بیر بوینی یوغونلا اگله شر خلوتده

مینجیق کیمی سوز توکر آغزیندان
کاغذ یازان جنب اولار ساعتده

مکتوبی گلنده گزدیره ر کوچه له ری
بیر قدر گرک گوزلیه هر دربند ده

تا بیر اوخویان گوروب دییه، ای قارداش
بوکاغذی بیر اوخی ده ده ن رحمتده

بیر ایش چیخاحاق ایشین ایچیندن مطلق
کاغذ اوخویان اولسا فنا طینتده

اوّل خانیما باخار سورا مکتوبه
سن بورکووی یانقیلیجی قوی غربتده

ای مؤمن خر چوخ اشتباه ائله میسن
وئرمز پزونگه یِر خدا جنتده

معجز گوره سن جهت نه دور که تاری
خلق ایلمییب عقل بیزیم ملتده

نامحرمیله قول بویون اولماق شرعی
یازماق، اوخوماق خلافیمیش بوکند ده

یازماق قیزین عصمتین خللدار ائتمز
ساخلار اونی علم پردۀ عصمتده

جاهل آنانین بالاسی بیسمارک اولماز
آرواد گرک علم ئورگنه هر حالتده




سنین[ویرایش]

ای بینوا گینه سارالیر صورتین سنین
ظالم چوره ک گینه بیچه جک خلعتین سنین

ائتمز نظاره کتدلییه ارزاق اداره سی
شهری سالیر نظامه فقط دولتین سنین

ای رنجبر سن ئولمه لیسن، چونکه کتدلیسن
دولت یاننیدا یوخ قدر و قیمتین سنین

یاز بیر عریضه دولتیوه بو سیاقیله
شاها مگر بیز دگیلیک رعیتین سنین

ای ملتین آتاسی نظر قیل بو سمته بیر
اولما رضا که آج وئره جان کلفتین سنین

درد اهلینه ده دردیوی، بیدرده سویلمه
بیلمز او، اهل درد بیلر زحمتین سنین

آج قالماییبدی بیر گون او دولت، هاردان بیلر
آجلیق نئجه الیندن آلیر طاقتین سنین



یاخشیدر[ویرایش]

کیم دییه ر آتش کناریندان گلستان یاخشیدر
عاشق و معشوق ایچون فصل گلستان یاخشیدر

یاریله هر بزم اولانلار سیر بوستان ایستمز
سینۀ دلبرده سیر نار پستان یاخشدر

شانه وورما زولفوه حالیم پریشان ایلمه
دیدۀ مخموریله زلف پریشان یاخشیدر

اختیاریم گئتدی الدن گئتمه ای نامهربان
استخاره ایلدیم تاخیر جانان یاخشیدر

بو سفردن قورخورام جانا قمر عقربده در
نیش عقربدن حذر قیل، دلو میزان یاخشیدر

هر یرین بیر سبکی وار، هر مجلسین بیر صحبتی
گوشۀ میخانه ده غوغای مستان یاخشیدر

کفریمی امضا ائدر کهنه معلم، سویله سم
مکتبه مسجد و یا لفظ دبستان یاخشیدر

ناز و استغنا یاراشماز چیرکینین سیماسینه
ناز و استغنایه روی و چشم خوبان یاخشیدر



نه آنلادیق بو گلمکدن[ویرایش]

نه آنلادیق بو گلمکدن
بوآلتی آیاق قوناقدان
کباب اولدیق آغلاماقدان
آلله ئوزین امداد ائله

تذکره نی آلدی اله
جانمه سالدی ولوله
یاریم گئدیرنه واخ گله
غملی کونول فریاد ائله

عاشق آغلار آجی آجی
یار باخار اونا قیقاجی
ساخلا آتین آراباچی
عاشقلری بیرشاد ائله

سنینله کونلوم خوشدر
نئجه گوروم یرین بوشدر
یارین قفسده بیرقوشدر
تئزگل اونی آزاد ائله

عموغلی جان سنی تاری
دون بیرده باخ منه ساری
یخیلدی کونلوم دیواری
گل گل، گل گل آباد ائله

من وطنی چوخ سئوه رم
والله کونولسیز گئده رم
انشاء الله تئز قییده رم
عم قزی آز فریاد ائله

آغ گردنده قارا شه وه
من باخارام سئوه سئوه
سیل گوز یاشین قییت ائوه
یخ کویمی برباد ائله

یاریم گوزدن نهان اولدی
داغلار باشی دومان اولدی
ایشیم آه و فغان اولدی
آلله ئوزین امداد ائله




مسکین قویون[ویرایش]

 گوردوم طناب الده افکار سرسری بیلدیم او خیره سر بوغاجاق من قلندری  
 ناچار سمت میکدیه ایلدیم گذر ساقی لبالب ایلدی چون جام ساغری  
 واعظ دئدی: حرامیدو، ساقی دئدی: حلال ایچدیم بش اون پیاله بهار ائتدیم آذری  
  چون قوه وئردی قلبیمه مِی، سویلدیم که: هِی ساقی تئز اول گتیر منه شمشیر حیدری  
 سوردی: نچون؟ دئدیم: آکیشی گورمیسن مگر ایلیر خراب دیو جهالت شبستری  
  ظن ائتمه دیو ببردی، دئدی: بودیارده مینلرجه دیو خلق ائدیب آقای شستری  
 دور باشوی یو،عقلیوی جمع ایله باشوا گوندوز یاتیب، گئجه اوخوما مثل سرسری  
  قیش گلدی آلدی قاپیمی ای بینوا آییل باخ گور نئجه سارالتدی خزان برک لولفری  
 اَل قاتدی قیش تدارکنه وارلی، ای فقیر امر ائتدی نوکرینه: آلین یاغ بیر دری  
 حکم ایلدی قوغورمالیغی یخدیلا یره ساللاخ چکدی داره او بی یار و یاوری  
 باغلادی ال ایاغینی محکم او بیکسین قویدی بوغازینه او لعین قانل خنجری  
 فیشقیردی قان هوایه، بیر آز چالدی ال ایاق گئچدی جدایه باشی، دوغراندی پیکری  
  ایکاش ائدیدیلر بوقدرظلمه اکتفا زوریله باسدیلار قازانا اول دلاوری  
 ووردی او قدرباشنه توخماقیله کنیز بینی توکولدی توپراغا شیل اولسون اللری  
 حکم ائتدی پس خانم که دورون سیندیرون دیشین اولدی نشان بوظلمه ده بیچاره پروری  
 ایکاش ائدیدیلر بوقدرظلمه اکتفا بیر باشقا ظالم ائتدی اونا ظلم دیگری  
 آلدی اله عمود، شکست ائتدی قول، قیچین یا رب بوحاله قویما گیلن هیچ کافری  
 صبر ایلدی عوام او مسکین قویون کیمی هر بیر جفایه سالدی رضا اول ستمگری  
 سن مردسن مدافعه ایله حقوقوی مسجد ده دول قادین کیمی تیترتمه منبری  
 سن مردسن عموغلی، اگر خواهش ایلیه سندن خانم، گرک آلاسان مخمل و زری  
 آروات اگر دییه سنه بو شنبه آخشامی همسایه آلدی: فخری، تبرزه و عسگری  
 فی الفور قیزما، چکمه قیلینجی غلافدن آلدات بش اون یالانلا اول ماه منظری  
  آخشام دییه نده: نولدی؟ دئنه: یوللادیم اوندان ئوتری بازارا کبله کوثری  
  چای ایچمه دن اگر دییه: بیر جفت دست بند بیر دانه سینه بند طلای مظفری  
 سویله خانم چوخ ایلمیسن اشتباه سن بو باره ده باغشلایاسان عبد کمتری  
  دین حقی، مذهب حقی، منم بینوا علی او مرتضی علیدی که، فتح ائتدی خیبری  
 شعر و غزل خزینه سیم من، نه سیم وزر منده آریشما سندس و دیبا و عبقری  
  مین درده مبتلا ایدی "طوسی" ده دلبریم شرمندۀ عیالیدی حتی او "انوری"  
  "صابر" که رحلت ائتدی بو فانی جهاندن قالدی فقط عیالینه بیر دانه دفتری  
  "حافظ" ده ایلییب گِله، "جامی" ده دهردن تحقیر ائدیب هر عصرده دنیا سخنوری  
  سن نیلیسن قیزیل گوموشی ای تکذبان معجز سنین بسیندی وزیبا غزللری  



ایلر[ویرایش]

 دییه لر بوغدانین نرخین گران پروردگار ایلر خداوندا سن ایلرسن و یا انباردار ایلر  
  بلی، آلله یاراتمیش سوغزونی، اما اونین نرخین بو گون بویله، صاباح اویله او اهل شندوار ایلر  
 آماندی ای بولوت سه سلن، سه سین کس بو ستمکارین قویوب بورکین یاناکی محتکرچوخ دارادار ایلر  
  گئجه رؤیاده گوردوم عالمی سیراب ائدیب باران دولوب سوییله هر یان ناودانلار شاراشار ایلر  
 گمیسی غرق اولان تاجر کیمی بوغداچی قارداشلار وورار باشین در و دیواره گوز یاشین نثار ائلر  
 خداوندا سنی وئرره م قسم خباز بی رحمه قولاق وئر گور نئجه بیچاره یوخسول آه و زار ایلر  
 الینده اَل قدر بیر نان دوتوب هر دم دییه ر: یاران! بونی آلله ائدیر بویله و یا شاطر غفار ایلر  
  گوزون یاشی هله خشک اولمیوب خلقین خداوندا هله اوچیوز اوتوز بش خرجی خلقی بیقرار ایلر  
 مسلمان ئولدیرر خلقی آجیندان ای مسلمانلار قویار قاسسایا خلقین خونبهاسین افتخار ایلر  
  دگیرمانچی وورار توپراق اونا بوغداچی بوغدایه بهالیق ملتی مثل تولکی حیله کار ایلر  
 الهی قلبی داشدان برک انسانلار یاراتمیشسان فقیرین قلبینی سنگ ستمله زخمدار ایلر  
 دولانیر باشینا سولموش سارالمیش خرمنین هر گون سنین احسانیوه یا رب چَرَکدار انتظار ایلر  
 نه نقدی وار، نه اشیاسی، نه بوغداسی، نه یارماسی سرشک دیده ایله روز و شب، شام و ناهار ایلر  
 نه خانه بند اولور، نه تاجره قحط و غلا یا رب همیشه بینوانین خاندانین تار و مار ایلر  
  نه زوریم وار اولام ظالیم، نه پولیم وار آلام فایض سنه قربان اولوم یا رب گناهی مالدار ایلر  
 مزور حیله گر چوخدور، وطنده دوغرولوق یوخدر گورورسیز مؤمنه مؤمن نئجه ظلم آشکار ایلر  
 وئریرلر یِِر رباخواره همیشه صدر مجلسده اوزون قیرخدیرسا بیر اوغلان اونی خلق سنگسار ایلر  
 ذغال و هیزمی جمع ایلمک انباره یعنی چه؟ منه سن ظلم ائدیرسن آ کیشی، یا کردگار ایلر  
  خدادن هیچکس باک ایلمز آند اولسون آللهه حکومت قورخیسی خلقی شرارتدن کنار ایلر  
  اگر سیز مسلمانلار محب شاه مردانیز حکومت بس نیه بو قدر زحمت اختیار ایلر  
 تهی دور مغزدن قلبی صداقتدن، دیانتدن ولکن سققل و جببه اونی با اعتبار ایلر  




نه آخرتی خوش اولار نه دنیاسی[ویرایش]

اونونکه یوخدی دوشابی، یاغی، یومورتاسی
اونون نه آخرتی خوش اولار، نه دنیاسی

خوشا سعادتینه اونلارین که وار بالی
سحر تناول ائدر، هم ییه ر گون اورتاسی

غنی ئولنلرینه بالیلن چالار حلوا
اودادی وئرمز عموغلی فقیرین حلواسی

گورنده بال لذیذی گوزون یوم ای یوخسول
ملول ائدر سنی چونکه اونون تماشاسی

او دُور گئچدی که درویش عقیده سی خلقین
ایلانچیلار قوطونی ساتدی، فالچیلار طاسی

بوعصردن نه سید خوشلانیر و نه الواط
گوتور بو عصری خدایا که چوخدی خولیاسی

نه روضه خوانِ بَلَد شاد دور نه قاضی شهر
نئجه گولر دانیشار بو زمانه ملاسی

ایکی اَل، ایکی بوش جیبلری ائدر تفتیش
دوشنده یادیمه ناگه قیشین قوغورماسی

ائدون سماوره لعنت همیشه ای یاران
که خرجی مصرفی وار هر گون اون بیر عباسی

نه بی سبب بیزه بو ظلمی روزگار ایلر
بیلیر که شیللاغ آتار خر چوخ اولسا آرپاسی

نه سورمه واردی گوزینده، نه وسمه قاشینده
لباسی یوخ تکذین، لاپ قاچوبدی سوداسی

دئدی نه وقت آلاجاقسان تکذبانه لباس
دئدیم: او گون که بیتر یارما، رشته دعواسی

دئدی: دییرله آچوب کارخانه بیر مشدی
دئدیم: بلی یاشاسین هم ئوزی هم اوستاسی

غم ایلمه سنه معجز آلار تومان کوینک
اگر وئره نسیه "همتی" فابرقاسی




دلبرا[ویرایش]

دلبرا بیر چاره ایله بوش قالوب قندانیمیز
چای وئریب عمرین سیزه مرحوم اولوب فنجانیمیز

استکان چایدان سماور باشنه سالمیش قرا
آهی آه اوستن چکر بیچاره دسترخانیمیز

چاره سیز بیر درده توش اولموش ذوغال بینوا
باشینه منقل نه کول توکسین هانی درمانیمیز

کوپلرین قارنی یاپوشموش پشتینه، وا محنتا
یاتدیغی یردن دورانمیر دیغ توتوب باردانیمیز

یوخ بش وقت نمازدان غیر بیرزاد خانه ده
وار و لیکن واجبی اون بش قلم نقصانیمیز

وقت پائیز بیر قالاخ خرج ایستیری یرتیخ، یاماخ
ای کیشی فکرین نه دور پژمرده دور یورغانیمیز

بو گئجه رؤیاده گوردوم بیر پریشان واقعه
قورخورام قالسین قوغورماسیز بو ایل قازانیمیز

چوخ یاغیش یاغدی بهاردا، دامدا تورپاخ قالمادی
بیر قپیک یوخ، بش تومن خرج ایستیری ویرانیمیز

وارلی باخمیر یوخسولا، قورخمور خدادن ذره جه
بو عجبدور قارغادان قورخار بیزیم نودانیمیز

آیۀ قرآن مساوات امر ائدر، اما چه سود
بیلمیری بیر سوز عربجه بیسواد اعیانیمیز

گون به گون آرتیر مصیبت دلبرا بیر بوسه وئر
هئچ امید اولما رجبدن خوش گئچه شعبانیمیز

بو ولایتده آ قیز باش ساخلاماق آسان دگیل
سکیز آرشین آستار ایستیر بیر قاریش تومانیمیز

بوندان اوّلکی آداملار یوز سنه عمر ایلدی
بیلمه دی غربت نه دور اجداد عالی شأنیمیز

ایندی وار باعث نه دور، غربتده بیر میلیون کیشی
اهل عیالی آج سوسوز سرگشته و حیرانیمیز



الطاف یزدانی[ویرایش]

گوزون آچ معجزا قیل بیر نظر الطاف یزدانه
تمام ائتمیش خدا نعمتلرین بیز اهل ایرانه

چوبوق، سیغار وغلیان خلق ائدیب هم بنگ هم افیون
شراب و چای و قهوه، میکده هم شیره کش خانه

یاراتمیش مهربان آلله هر بیر اصناف ایچون بیر داش
سقط، تبریزی، زنگانی، دو صد به به بو اوزانه

طسوجی، خونگری، دیلمانی، تهرانی تعالی الله
و سنگ ارونق پوط، آفرین اولسون او رحمانه

و شاه عبدالعظیم و کاظمین و کربلا، مکه
خراسان، سامره، بغداد، مدینه، شام شاهانه

یاراتمیش بیر...
و بیر دجال.... زمان بیز اهل ایرانه

پازهری، قرمزی، آغ، گوک، یاشیل، ساری، قره ساققال
سر عریان، میان بیرچک، بناگوش آنلادین یا نه

اوروجلوق ماه ماتم، اربعین و روز عاشورا
کفن، قدّاره، میدان، طبل، استهزای بیگانه

دخی ائتمیش نه لر احسان خصوصی بیزلره خالق
فغان و ناله و زنجیر و سیللی، قلب ویرانه

بیزه ائتمیش فقط اشک بصرله روضه خوان احسان
نه تور که ایلمیش احسان، نه افغانه، نه یونانه


اونی[ویرایش]

شرارت اولسا بیری خلق ائدر مذمت اونی
اوغورلیق ائتسه رعیت دوگر حکومت اونی

حکومتین گوجی چاتمیر بو صاغری باشماغه
گئده ک کیمه گوره سن ایلیه ک شکایت اونی

بسان رستم دستان گیریبدی میدانه
صغیر اوشاق کیمی قورخور گورنده مات اونی

گتیر قولاقوی بیر سوز دییم نهانی سنه
جماعتین گوجی چوخدور ییخار جماعت اونی

او اَل خیانت ائدیبدیر امانته ساقی
او حیله کار اَلی دور، ایلمه زیارت اونی

او معتقد ده گی روز قیامته هرگز
گر اعتقادی اولا قورخوردار قیامت اونی

دئدیم: اگر لوطیسان قویما باشووا دستار
مقام غیظه گتیردی بو سوز نهایت اونی

دئدی بو ردّ دانیشدی کنار اولون بوندان
که قورخورام گله اود یاندیرا بو ساعت اونی

ایناندی بو سوزه فی الفور بینوا کتدی
داغیلدی هر بیری بیر یانه راحت ائتدی اونی

تازا عمارتینه اوچ قاپی قویوب فاضل
غریبه خوش یاشادیر بیزده کی جهالت اونی

دئدیم: بونین پولی هاردان گلیب؟ دئدی: سنه نه؟
دئدیم: همان فقره ایلییب عمارت اونی

دئدی: چاخیر سپه رم اوستووه دیلین قیسات
دئدیم: که دوزدی آغا، سویلیرم ظرافت اونی




مه ممده لی[ویرایش]

بودی چوسترده فقط تازه خبر مه ممده لی
وئریب عمرین سنه حاج ملا جفر مه ممده لی

شب یکشنبه ساعات اوندا یر ائتدی حرکت
وطن آز قالدی اولا زیر و زبر مه ممده لی

پهلوی زاده ده قویدی باشنا تاج کیان
ائتدی کرنوش او شهه جن و بشر مه ممده لی

شاه بی رشد قوجاقلیبدی ایکی دیزلرینی
ساللاییب قاش قاباغین مثل یته ر مه ممده لی

توتدی آلله او شهی بلدۀ پاریسده چون
قویدی شاپفا باشینا شام و سحر مه ممده لی

بسکه قالیندی قافاسی، شکمی مثل کوتوک
ایلمز هرگز اونا غصه اثر مه ممده لی

زوریله باشووا شاپقا گئچه جک ایراندا
دون سحر وئردی منه قارغا خبر مه ممده لی

بورکی الله یارادیب، شاپقانی شیطان رجیم
باشووا قویما اونی ایله حذر مه ممده لی

ئوزون اوخشاتما فرنگه، اوروسا گَل وطنه
دوریه نی باس باشووا مثل دوسر مه ممده لی

جهل رسوای جهان ایله دی ایرانلیلاری
جهل ووردی بیزه مین گونه ضرر مه ممده لی

معجزی ایله مرخص دخی لطفوز آرتیق
گلدی ساعت به سه بو قدر یته ر مه ممدلی




قامچیلار[ویرایش]

ساقیا حاضر ائله اول قمری
شاد کام ایله گل بو دربه دری

وطنی سئومرم نه دییرسن ده
ایستیرم اختیار ائدم سفری

قارلا ایلییبله مالامال
بیر قاریش گنلیگینده کوچه لری

هر کس ایستر عمارتی قاییرا
اوستایا تاپشیریر: بیر آز ایره لی!

یعنی دیواری چک بیر آز قاباغا
ایله مخلوقه تنگ رهگذری

ئوزی بدعت ائدیر بنا احداث
سوکور اما او بینوا صفری

ای رعیتلرین پرستاری
بختیار ایله سین سنی تاری

پوزدی صراف ایگیرمی بش تومنه
قبله گاها اوبانق نوتلاری

شمر دی الجوشنین گناهیندن
چوخدی استانبولین طلبکاری

دوشمیشم آلتی یوز تومن بورجا
بوشلیلار اینجیدیر من زاری

وئریرم آیدا اون تومن فایض
یعنی بیر جفت لیرۀساری

بارالها باتیر یرین دیبینه
هارانی؟ خانۀ سبب کاری

نیه ئولدیرمیسن خداوندا
کیمی؟ آلمانی، تورکی، بولغاری

نئجه که ایلدین ذلیل آلله
قارا داغیله صرب بیعاری

او ایتالیانی ده ذلیل ایله
خاصه اول نمسۀ ستمکاری

چین و ژاپون پروس دیّوسی
مبتلا کن به درد بیکاری

++++++++

 مسلمانلار اینانماز گردییه م قرآنه آند اولسون وطن خیلی مقدسدر قانان انسانه آند اولسون  
 جهاندا یوخدی قیمتلی شئ جان عزیزیمدن جهالتدور بیزیم معبودیمیز بو جانه آند اولسون  
 گئچیلمز کوچه لردن چون اولار رحمت یره نازل مگر صندالیله، داملاردا کی نودانه آند اولسون  
  ابوالفضله یالاندان آند ایچه ممز بیر نفر کندلی دییه ر شستیله اما خالق سبحانه آند اولسون  
  عمر، عثمان سنی مذهب آند ایچمز ولی شیعه دییه ر هر گون بش اون دفعه شه مردانه آند اولسون  
  گرک مؤمنلرین عقلی قیسا قدی بلند اولسون کمند امر معروفیله مخلوقاته بند اولسون  
 قویوبسان باشووا شمس سپهر جمشید کافر تک مسلمانین گرک بورکی به شکل کله قند اولسون  
 اوتانما انگلیس و روسدن یار باشیوی اوغلان گرک مؤمن کیشی آماج تیر ریشخند اولسون  
 اوباشدان که آخار هر سال مین مثقال قان ای دوست او باشدا عقل قالماز معجز؛ آللهه آند اولسون  
++++++++
 ......اولدون مسلمان ارمنی بیر قولاق وئر عرضیمه ای موسیو وارتان ارمنی  
  قورخورام تومانیوی آلسین الیندن شیعه لر یوز مسلمان وار بو کتد ده چونکه عریان ارمنی  
 عورتینین خلقه گوسترمزدی والله العظیم بو قیزا وئرسیدیلر بیر کهنه تومان ارمنی  
 گئت یاپیش اینجیلیوه اینجیتمه جانین غوسپودین جان وئریر توپراقلار اوسته مین مسلمان ارمنی  
 ظلم الیندن قاچدی گلدی بو یره مینلرجه جان خالصا مخلص محب شاه مردان ارمنی  

++++++++

 گوردوم هنگام سحر مدرسه شاگردلری هر بیری بیر پارچه اودون چیگنینه قویموش گئدیر  
  دئدیم اوغلان بو نه در؟ سویله دیکی برد العجوز دولتی مدرسه ساکنلرینی اینجیدیور  
  دئدیم ای وای بیله بیردولته که ئوز ئوزونی ایکی خروار اودوندان یانا رسوای ائدییور  

++++++++


 جاجیا واردی سنین ملک صمد آبادین قوشترازین و ایکی دانه اوغول امدادین  
  اوچ دکان: باغ، سرای، بیرده چوره کچی خانه قلم آلدیم الیمه یازدیم بو سنین ایرادین  
  سن ده آل بیر قلمی دستیوه یاز سویله گوروم نه یی وار ملک شبسترده من ناشادین  
 گئچه ره م من او طلبدن یازارام بیر پارا سوز که الی یوم قیامت اوتانار اولادین  


مثنوی[ویرایش]

آه و آه ای امت خیر البشر
گلدی طهراندان بوگون بیر بد خبر

که ائدوب وهابیان بی ایمان
روضۀ پیغمبری بومباردمان

سالمیش ایرانه تزلزل بو خبر
تعزیه بر پا ائدیبدیر شیعه لر

گئنه وئردی گوز یاشینا اذن خلق
سیلله و یومروق وورار باشنه خلق

روضه خوانلار الده مندیل عزا
آغالادار خلقی به صورت غم فزا

سرگذشت کربلادن آرتاجاق
بو حکایت ائتدی خلقی بی دماغ

آغلایانلار آغلادانلار مثل نی
باشینه سامان سه پر اهل گونئی

مثنوی ده خوش دییب ملای مست
"دم سگ از ریش نادان بهتر است"

روضه خوانلار شیعه نی بیروح ائدر
سینه زنلر سینه نی مجروح ائدر

چون الین قوزار گویه زنجیرزن
سسله نه ر زنجیر هم بیت الحزن

مؤمنون یوخدور توپی طیاره سی
ئوز ئوزین دویمکدر آخر چاره سی

لعنت ایلر انگلیسه خاص و عام
انگلیسین رنگیدور بووالسلام

انگلیسه زوریمیز چاتمیر امان
سن یتیش امداده یا صاحب زمان

چک قیلینجون حمله ایله لندنه
قیر، داغیت مانند تخم پرپنه

غیرتوز چوخدور و هم زوریز سیزین
بیزده ایش یوخدی بیلیرسن سن ئوزین

سن قیلینج وور کافر ئولدور ای آغا
من قوییم سققالیمه رنگ و حنا

وور جدایه سن او کفارون سرین
من ائدیم صیغه او کافر قیزلرین

سویلر هر کس کوچه و بازارده
انگلیس بارماغی وار بو کاریده

اوائدیر تحریک وهابیلری
حکمتی وار بو ایشین ای همشری

انگلیس او حیله کار آوروپا
روضۀ پیغمبری باغلار توپا

بو جهتدن که عجم غمگین اولا
تعزیه برپا ائده صبح و مسا

گونده یوز سیب چای آلا مین پوط شکر
تکیه لرده صرف ائده شام و سحر

سن ایچیرسن چای اولارسان اشکریز
گونده بیر یوک پول قازانار انگلیس

او بیلیر که بیر مصیبت وئرسه یوز
شیعه لر قاره گییه ر اوغلان و قیز

لااقل ایراندا وار اون دورت کرور
شیعۀ خالص سوای از شیل و کور

هر بیری آلسا قرا چیت اوچ چه ره ک
از برای کوینه ک و شال و به ره ک

پس گرک وئرسین پول یدی کرور
تا قرا گئیسین گروه بی شعور

سنکه بیلمزسن حساب و هندسه
پس گوجین چاتماز سنین انگلیسه

آغلاماق مشقین وئروب فاضل سنه
فاضل دربندی عاقل سنه

اوخویوبسان چون فقط سن بیر نصاب
اول جهتدن بیلمیسن قارداش حساب

ضارب و مضروبله اللشمه چوخ
جبر اوخی ابوابده بیر نفع یوخ

ئوز بِزون وئر کربلای باقره
یاقاسین باسسین کوپه ائتسین قره

اگنوه گییسین اونی کوسمه ز امام
خوش دگیل رنگی دئمز فخر انام

گر آخوندا سویلیه بقالیمیز
کیم دییر قیرخیلماسین سققالیمیز

هر توکونده سققلون وار بیر ملک
بوحدیثین اولمیا اصلی گرک

کفرینه امضا قویار فی الفور آخوت
هیچکس آلماز اوبقالدان نخوت

انگلیس اما سویور پیغمبری
توپا باغلار او مقام اطهری

آلیروق اوندان گینه بیز استکان
لاله و لامپا و قند و چایدان

ایلده یوز مین استکان مرحوم اولار
انگلیسین جیبینه پوللار دولار

اللی مین ساموار قاینار صبح و شام
بو سماورلر کیمیندور آی بالام

بوخ اوتان شالواریوا تومانیوا
مخملین یه ل ایلمه جانانیوا

آلمیسان بقالدان یاغ آشوا
قویموسان عمامه تنظیف باشوا

پس سنه لازم گلیر تنبیه اولا
بعد وورروخ تازیانه باققالا

معنی پورتستی بیلمک شرطدور
بیلمییرسن چونکه ذهنون پرتدور

لعنت ائتمه انگلیس کافره
ایچمه چایین، استکانین وور یره

اطلسه ماهوته، ماهوت واریه
مشتری کیمدور عمو چلواریه؟

یارماسیدی کله سین میرزا موسی
انگلیس ساتمازدی اون مین توپ خاصا

خلق تحریک ائتمه سیدی شستری
کیم اولاردی بو متاعه مشتری

ووردی باشین منبره فاضل کیشی
من ده یاردیم باشیم یای و قیشی




ائدر[ویرایش]

گاهی آنا فراقی جگر داغدار ائدر
گاهی آتا وفاتی کونول بیقرار ائدر

هر گون خراب اولار بیرینون آشیانه سی
دائم گلر قولاغیمیزه غم ترانه سی
ایشلر صباح و شام جهان کارخانه سی
طفلی جوان، جوانیمیزی اختیار ائدر

ایلر سحر وداع طیور آشیانه سین
قالخار، دوشر تدارک ائدر آب دانه سین
ای وای اگر گله گوره او اهل خانه سین
صیاد ائدوب اسیر، باخار آه و زار ائدر

گاهی فراق یار پوزار استراحتین
گاهی غم زمانه بوکر سرو قامتین
بیر گون اوروج توتار بوغازیندان جماعتین
صبح و مسا کسالت ائوین تارمار ائدر

گاهی سویوق برادر شمر و یزید اولار
بستی سینار لولنگ و طهارت شهید اولار
گه قار یاغار او قدر که یول ناپدید اولار
مشدی قالار حمامده تک انتحار ائدر

گه قلب غصه دن ارینر، گاه استخوان
گه جان سیخار مظنۀ چیت گه تکذبان
گه قند بند اولار بزه گه چای جانستان
گاهی اودون کومور بزیله کارزار ائدر





من نیلیوم[ویرایش]

خلق ائدن کیمدر زمین و آسمانی کتدیلر
لطف و قهری، بر و بحری انس و جانی کتدیلر
دادلی داسیز، شور شیرین، یاغلی یاوانی کتدیلر
خلق ائدن آلله دگلمی آب و نانی کتدیلر؟
کاسبه وئرمیر پلو، کوکی، بورانی کتدیلر

کوفته، شوربا، قایقاناخ قایماق تره ک من نیلیوم
خلق ایله کج طوغلری چرخ و فلک من نیلیوم

چاق ایله غلیانی اوغلان عارض یاریم کیمی
قندی دولدور استکانه دولتیم واریم کیمی
چایی ده پر رنگ ایله مندوله شلواریم کیمی
تفسیر سیل پارلاسین ورشو سماواریم کیمی
ترتمیز پاکیزه ناموسیم کیمی، عاریم کیمی
دقت ایله برک قیفیللا بوغدا انباریم کیمی
خلق آجندان موردار اولسا قلب مورداریم کیمی

وئرمرم بیر پونزا بوغدا بیر چوره ک من نیلیوم

قالمیشیق چایسیز چوره کسیز، پوللی غیرت وقتیدر
بیر آراش قالیشلاری بذل و سخاوت وقتیدر
بوندان آرتیق پیس گون اولماز خلقه نعمت وقتیدور
یار یولداشین رفیقین خیلی عسرت وقتیدر
هم ولایتلین الیندن دوت ضرورت وقتیدر
اللی آیدر باغلانیب یوللار مروت وقتیدر

بو قدر دولتلی وار، ائتسین کمک من نیلیوم

جانشین لمسه نی ئولدیردی صربستانلیلار
چیرمالاندی گیردی میدانه او دم گیرمانلیلار
سول طرفدان قاره داغ، ساغدان چیخیب عثمانلیلار
باغلانیب بوسفور پریشان اولدی چوخ ایرانلیلار
پایمال اولدی داغیلدی خویلولار، دیلمانلیلار
صوفیانلی، اورمولی، محو اولدی هم گوگانلیلار
عهد و پیمام ایلدی قان توکمگه میلیانلیلار

انگلیس و روس و ژاپون و فرنگ من نیلیوم

دستگیر اول شاه مردان تک فقیره یوخسولا
ساللاما بورنون، یوزون تورشاتما مثل موشمولا
احتیاجیم وار پولا، ال چاتمیری استانبولا
باشوی سالما آشاغا بیر نظر قیل ساغ سولا

بیر بلوک کلفت قالیبدر چار و چک من نیلیوم

بوش یره یالوارما آغزین یورما نافله
هیچ بیر احمق ایندی پول وئرمز سنه بی معامله
معامله ایندی اولور آیدا بش اون یول حامله
گون به گون آرتیر جانیم قوربان اولا بو حاصله
سیز دیین کیم پول وئره ر ایندی گیروسیز جاهله

باغی یوخ، بوستانی یوخ،قویمون درک من نیلیوم

اهل غیرت، صاحب شرم و حیاییق نیلیاخ
اللی آی اول غنی، اینید گداییق نیلیاخ
بیر بولوک کلفت فقیر بینواییق نیلیاخ
ساکت اول بیزده عمی قلبی قراییق نیلیاخ
منفعت مشتاقی، مفتون ریاییق نیلیاخ
پست فطرت کم حمیت، ناخداییق نیلیاخ
ملکداریق عاشق کهریز چاهیق نیلیاخ

سنده آل سات، سنده اکدیر، سنده اک من نیلیوم

بیرده چای وئر، گل آپار غلیانی اوغلان نازله
تنگ اولور خلقین خیرسیز سوزلریندن حوصله
بیر سوری آج، بی حیا مخلوق گیرمیش سنگره
پوللینی گورحک هجوم ایلر بسان حرمله
هر بیری بیر فندیله ایستر منی سالسین اله

بو قدر مخلوق ایچینده سویله تک من نیلیوم

قالماییب عالمده بیر آباد ویران اولماسین
یوخی بیر او فرشی، ظرفی، رختی تالان اولماسین
اهل عیال شرمنده سی هئچ بیر مسلمان اولماسین
منفعت قیدین چکه نلر شاد و خندان اولماسین
گوزلیه هر کیم پریشانی پریشان اولماسین
پس مسلماندا نچون انصاف و وجدان اولماسین
بو مروتدن اوزاقدر منده بیرنان اولماسین
سن پلو یه پوللی قارداش شیرۀ جان اولماسین
بوعجب سوز سویلیری عقلینده نقصان اولماسین

ئول جانین چیخسین جانوندان بالدرک من نیلیوم

طیب نفسیله گئچیبدر کیم قازانجدان آی داداش
تا پئچیم من ده پلودان، آغ لاواشدان آی داداش
کندلی خیریتدن یانا قالخار اوباشدان آی داداش
پا پیاده یوکلری سگز آغاشدان آی داداش
خیر ایچون دلگیر اولور باجی داداشدان آی داداش
ماللا قرآنی چیخار باشلار تازاشدان آی داداش
بوندا خیریم یوخ دئسه، سویله ر یالاشدان آی داداش
سهلدر بو، یاغ چیخاردیر ملا داشدان آی داداش

زر پرستدر صاحب تحت الحنک من نیلیوم

اِو چوکوب ویران اولوبدر هر یانی خلق نیله سین
ناشی بنا قنداریبدر نودانی خلق نیله سین
قند و چای یوخدر دوگورسن اوغلانی خلق نیله سین
ساتمیسان گیرم پالاسی یورغانی خلق نیله سین
شمدانی، کورکی، عبانی، تومانی خلق نیله سین

یا که قالمیش لوت قارین، چیگنین، کوره ک من نیلیوم

گل سن آلله باخ بونین بیغ قویدیغی بیر بستیه
بیگرو وئر وای عجب در هر شی بو اسوتیه
اودا وئرسین وسمیه، قنده نباته پستیه
کوزه ئوز مالیم سودا دولدیرمشام ال بستیه
وئرمیرم بیردامجی واللهی گیرسه خستیه
حقی یوخ یردن گوگه هر کیم سنه ناکس دییه

کس سه سین بوش سوز دانیشما ای جفک من نیلیوم

رحموه قربان اولوم قارداش حمایت وقتیدر
گل منی مأیوس قایتارما عنایت وقتیدر
دور گوره ک عورت ایتل گئت استراحت وقتیدر
باشیمی دنک ایلمه ظهر اولدی طاعت وقتیدر
ترک ائله چایی چوبوقچکمه قناعت وقتیدر
دورگوره ک وقت نماز اولدی عبادت وقتیدر

سن ده گئت آللهی یالوار بوشدیبه ک من نیلیوم

باخ باجی یاخدان دولی صاحب قراندر وئرمیرم
یالوار اوچ گون، اوچ گئجه یا گئت دایان دور وئرمیرم
مصرفیم چوخدر توتون، چای، قند گراندر وئرمیرم
ماحصل، سوز مختصر پول تنده جاندر وئرمیرم

چکمرم من جاندان ال سن گئت چک من نیلیوم

زوریله مندن پول ایستیر باخ بونین اندامنه
اژدها تک آز قالیر چکسین منی بو کامنه
عاشقم گویا بونین من دیدۀ بادامنه
گول وئرم، اکمک تدارک ایلییم آخشامنه

چای چوره ک ایلر جوانمر گلر دیله ک من نیلیوم

میلیم اولسا وئرمگه چائی طلائی یا پاپو
یا عبا، یا جبه، یا دون، زنجفیل، هل، یا کاکو
وئررم اول ذاته که طالبدر، بلدد، ارد، آلو
بذل احسانیله وورام آغزینا محکم جلو
بوجهتلر اولماسا ائتمم جهانی سر فرو
قلعه باغ، ماللان کوره، سیس بک براب و بوکیکو
اهل جمله آج یاتارسا ذره جه ائتمم خنو
من عزیز من عزیزم نعمتیم وار نوع به نوع
منزلیم ایستی، شامیم قابل، ناهاریم ترچلو

بینوا یاندیرماغا تاپمیرتزه ک من نیلیوم

چوخ گورنمه، غره لنمه حالیوا اولادوه
باغوه، بوستانوه، اجدادوه،احفادوه
هئچ بیری گلمز ئولنده دادوه، فریادوه
گیدیرر غسال کفن چون قامت شمشادوه
آه او ساعتدن قارانلیق قبر اوین سال یادوه
بیر چراغ گوندرمدین اول خانۀ بربادوه
آه او ساعتدن قارانلق قبر اوین سال یادوه
بیر چراغ گوندرمدین اول خانۀ بربادوه
آه او وقتدن یوکله نر سنگ لحد بنیادوه
گورکن قبرین قازار حسرت قویار آروادوه
مالوی وارث ییه ر واحسرتا میعادوه
مالک دوزخ جهنمده گلر فریادوه

اعتقادین یوخ جهیمه ای آغ بیرجک من نیلیوم

بوینوی شاخ توتما،شاققیلدانما چوخ بارماقلارین
اللرین اولچمه، ایتیتمه قورت کیمی دیرناقلارین
بوینونی بوکمش اجل چوخ سن کیمی سارساقلارین
شیشمه سین قولتوقلارین، یلله نمه سین قورساقلارین
جانین عزرائیل چیخاردار، مرده شور باشماقلارین
ترک ائدر بیر گون سنی یاخداندا کی جیرماقلارین
آخره یتدی زمانیکه یمک ایچماقلارین
پرده باغلار سوت، سحر عورت ییه ر قایماقلارین
اوینادار، شاققیلدادار قیزلار قیزیل قولباقلارین

سن حسابین وئر، جانین چیخسین جفک من نیلیوم

آه اوساعتدن لوت ایلر مرده شور انداموی
تخته اوستنده یووار، تابوته زوللار جانوی
خلق ایچر چایین، ییه ر پایین، چکر غلیانوی
قیرخ چیخار، وارث گلر تالان ائدر ویرانوی
هر نه وار پای پشک ائدر، حتی سینیق چایدانوی
بو همان مالدر که ساندین دینوی، ایمانوی
پایلاشار بیر گون بش اون عمامه لی احسانوی
ثلثوی یغما ائدرلر همچنین یاخدانوی
هم آلار دورت آی سورا بیر بختور جانانوی
قیرلی فرلی بیر گوزه ل اوغلان مه تابانوی
کردی وار ایلر، دوزه لدر باغوی بوستاوی
بو همان عورتدی اینجیتدین نقدری جانوی
اوندان ئوتری خلقی سویدون، چیگته دین وجدانوی

ایندی یاد ائتمیر سنی، ایلیر بزه ک من نیلیوم

چونکه آیریلدی سوموکدن اتلرین یونقال کیمی
کله لوت قالدی، آچیلدی گوزلرین ماذقال کیمی
قد شمشادین قضا حدادی بوکدی نال کیمی
رحم ائدر وارثلرین اوندا سنه آبدال کیمی
آچدیریر قبرین، چیخاردار جمده گین چاققال کیمی

باش بدندن آیری دوشمش بوشپته ک من نیلیوم
ساچ و ساققالین توکولموش بیر اتک من نیلیوم

باغلانار اوندا جنازه ن بیر آتین پالانینه
تقا تیق باشین دگر چارچوبه نین زهدانینه
جمده گین نفرین ائدر وارثلرین احسانینه
آز قالیر کاروان یتیشسین مرحله میدانیه
ناگهان بیر سس گلر دوزخده کی دربانینه
قویمیون گئتسین بو ملعونی وورون گردانینه
گیتمک ایستر روح منفورین خدا رضوانینه
مالک دوزخ دوزه ر نظمیه دورت بیریانینه
یالوارار، آغلار، سیزیلدارسان جهنم خانینه
حرصله نر مالک وورار گرزیله عریان جانوه
سویلر: ای ظالم سنین عصیاننه، کفرانیه

لعنت ایلر آدم و جن و ملک من نیلیوم

معجزا، سیندیر قلمدانی، تولازلا باغچیا
دفتر اشعاری یرت، آت، چیخارتما تاقچیا
ساکت اول، دیمه دانیشما، کس دیلین قوی بوقچیا
بو قدر کاغذ قارالتدین دگمدی بیر آقچیا
آنلارین، بیلدین که هئچکس باخمایر پیس یاخچیا

سنده هوشیار اول منیم تک سویله تک من نیلیوم
خلقه کج توغلیری چرخ فلک من نیلیوم



اوگون که اولدی[ویرایش]

 او گون که معجم و ابواب خار و زار اولدی حساب هندسه مکتبده تاجدار اولدی  
 قدم قویاندا الفبای تازه مدرسه یه معلمین کهنسال بیقرار اولدی  
 صدای جیغ بیغ اوجالدی چو سقف کیوانه دو پُش، دو زیر، دو زَبَر خوار روزگار اولدی  
 گوروب بو حالی چکیب نعره پیشوای رشید سوار اولوب آتا مشغول کارزار اولدی  
 چیخیب او خنچر تکفیر چون غلافندن حساب و هندسه و جبر زخمدار اولدی  
  تازا چیخان او شریعت کتابی چون گوردی یرینده کهنه جنابباسی شرمسار اولدی  
 داغیتدی لشکر بیدینی پس دئدی: یاران بو گون شریعت ایچون تازه بیربهار اولدی  
  هزار شکر که یاتدی تجددین عَلَمی بو گون شبستریمیز مثل شندوار اولدی  
  گرک او مدرسۀ دولتی اولا ویران که گئتدی هر کس اورا دیندن کنار اولدی  
  بلی! دئدی سوزینه چون مقدسان وطن وطن اوشاقلاری حمال چاروادار اولدی  
 محالدور گیره کهنه قفایه فکر جدید او فکره خدمت ائدن شخص سنگسار اولدی  
  ملایمتله قبول ائتمه دی اونی منکر اونا رواج وئرن برق دوالفقار اولدی  
 عرب او فکر جدیدیله گیردی میدانه عمر او سایه ده ایرانه شهریار اولدی  
 اوجالتدی بیرق روسیه نی لنین یولداش تجدد عالمینه چون قدم گذار اولدی  
  کتاب مزدکین اسراری آشکار اولاجاقپیاده آتلیلارین بوینونا سوار اولدی  
 تجددیله شریعت یخیلمادی آ کیشی بنای وهم و خرافات تار و مار اولدی  
  قدم او عالمه قوی ای محمدی سنده که عیسویلر او عالمده بختیار اولدی  
  او صرف و نحوی بوراخ نحویا به حق خدا او صرف و نحویله چوخ عمر و زید خوار اولدی  
 دئدیم اون ایلده نه ئورگنمیسن؟ دئدی که: بویور عربجه جمعی حمر، مفردی حمار اولدی  
 دئدیم اگر ائشّگین پالچیغا باتا یولدا گئجه صباحه کیمی کارین آه و زار اولدی  
  قالار مسافر بیچاره چاره سیز چولده ائوی ییخیلدی اگر اوغرویا دچار اولدی  
  اوچ آی یولی گئدر اوچ گونده پهلوان ماشین بوگون یر اوسته داداش حکمران بخار اولدی  
 بخار جهل سنین گوزلرین ائدیب اعمی حقیقتی گوره بیلمز او گوز که، تار اولدی  
  دیین او معجزه بیهوده ائتمه سین فریاد دهل صداسین ائشیتمز قولاق که کار اولدی  



وطن[ویرایش]

نچون آه ایلدین ای بلبل نالان وطن
یادیوا دوشدی مگر حال پریشان وطن

خس و خاشاک باسیب گلشنی گللر سارالیب
نیه بو حاله قالیب بس بوگلستان وطن

نه یاتیبسان آییل ای ملت بیچاره آییل
ساتیر آخر وطنی دشمنه اعیان وطن

در و دیوارینی قان ایلیوب الوان ای داد
نه غم انگیزدی یا رب بو شبستان وطن

بالش نازه قویوب باشوی ناز ایلمه دور
سورونی قورت داغیدار یوخلاسا چوپان وطن

اجنبی ملکی دولوب بی سر و پا ملتیله
نیه یا رب بیله خوار اولدی عزیزان وطن

دشمن علمیله بیزی ایلدی حمال ئوزینه
کیم ذلیل ائتدی بیزی؟ جهل؛ آ مسلمان وطن

وطنیز جسمدی، سیزده وطنه جان کیمیسیز
راضی اولمون قالا جانسیز وطن ای جان وطن

وئره لم ال اله تحصیل کمال ایلیه لم
خواب غفلتدن آییلسین گرک اخوان وطن

اولمیون شاد، اوزی گولمیوب افسوس، افسوس!
اوزماندان که اولوب معجزه ایران وطن



من نیلیوم[ویرایش]

ساقیا یوخدی دعانین اثری من نیلیوم
اعتقاد ایلر اونا خجه قری من نیلیوم

پول وئریر فالچیلارا باغلادیر آغزین کیشینین
قوۀ سِحرله لال ایلر اَری من نیلیوم

آچدیریر قیزلار ایچون مدرسه اعیان وطن
ئورگه دیر اونلارا زیر و زبری من نیلیوم

قیز اَله آلسا قلم دینیله ایمانی گئدر
باعثه لعنت ائدر جن و پری من نیلیوم

بسدی نشتو قارینا بینیمیزی قازما گوره ک
یری بوغ یا که ئوکوز ترپه دیری من نیلیوم

ائوینین قبله سینی هر کس ئوزی یاخشی تانیر
..... دولانیر دور و بری من نیلیوم

قبر فرعونی زیارت ایلمیش قاهره ده
حاجینین یوخدی خدادن خبری من نیلیوم

مثل نمرود مینیر آیروپلانه سنه نه
اوخلیور خالق جن و بشری من نیلیوم

باشنا شاپقا قویورموش دییه سن خلقه نه وار
یا فرنگیدن آلیرمیش سوخاری من نیلیوم

سالدیریب عکسینی حاجی کیشی یوللار شهره
ئوز سوزون دانیش آی اوغلان سحری من نیلیوم

پهلوی زاده چیخیب تخته دیرلر دییه سن
او قویوب باشینه تاج قجری من نیلیوم

باغلادی مجلس شورائی توپا ممده لی شاه
دوشدی ئوز جانینه آخر شرری من نیلیوم



نه در خیالین[ویرایش]

ای پیر سالخورده الواندر ریش و یالین
آلنین قیریشلاریندان بللی دی سن و سالین

رنگ و هنا الینده، حمد و ثنا دیلینده
یوغون قورشاق بئلینده بیلمم نه در خیالین

ریشته قوورما یارما لازمدر قیش ائوینده
یایدا تدارک ایله آج قالماسین عیالین

دف قیزماسا چالینماز، پولسیزچوره ک آلینماز
تسبیحی قوی کناره تا رفع اولا ملالین

عزم تولانبار ایله چال بیتلرین قیریلسین
قویمازلا بت پرستی فردوسه آنلا حالین

حوری سنیله یاتماز مین ایل قالارسا ارسیز
گلمه کله ک عزیزیم بیهوده دور جدالین

بیر باشی توکلی گورسه یولداشنه میریلدار
داز کله سینده یوخ چون بیرتوک بو بی کمالین

آب حمام طیب، عطر بنفشه موردار
اسرار وار بولاردا، کچ گئتمه سین خیالین

سال قندی استکانه، تربت خرامه گلسین
لعنت عوامه گلسین "معجزه، بتیر کلامین




استاد[ویرایش]

دچار فقر و ضرورت اگر اولا استاد
هزار سال اوخوسا اوغلون آنناماز بیرزاد

معلم اولسا پریشان روزگار ای دوست
چوره ک خیالی ائدر ذهن ائوین اونین برباد

گلر چیخاندا ائویندن دورار قاباغیندا
نه اَت، نه قند، نه سوغان وار نه دوز دییه ر آرواد

او حالیلن یتیشر مکتبه عبوس و غضوب
دوگر اوشاقلاری بی جرم یوکسه لر فریاد

ز بسکه پرت ائدیب او بینوانی پولسیزلیق
جیبینی، قولتوغینی آختارار الینده مداد

معلمه وئریله یاخشی ماهیانه گرک
گرک معلم اولا احتیاجدن آزاد

آچین قولاغوزی ای دوستان من ائشیدین
وطن خرابه لری علمیله اولار آباد

بیزایسته ریک فلکی سیر ائده ک اولاغیله
ائشک گویه اوچا بیلمز چون اوندا یوخدی قاناد

گلین ینه ک آشاغی مرکب جهالتدن
فرنگیلر کیمی طیاره ایلیه ک ایجاد

کیمین الینده دور ایندی مدینه و مکه
او پاک یرلریمیز کربلا، نجف، بغداد

سه سین چیخارتما آماندی که باشین اوسته دوروب
الینده تیغ دو سر انگلیس بد بنیاد

حسین دشمنیله ایتدی جنگ مردانه
توپ اوینوسان هله سن ایندی طفل تک ای داد

ایشیقلانار گئجه گوندوز چراغ حریت
محالدور قاییدا بیرده دور استبداد

گلین دیز اوسته قویاق بورکی بیر گوزه ل دوشونک
بو گون گرک بیز اولاق صید خلقه یا صیاد؟

گلین گئده ک اوخویاق بیزده اهل غرب کیمی
که بلکه ال چکه بیزدن او بی امان جلاد

گلین دوتاق بو معلملرین باشین قیزیلا
اولاردا علمیله جمله جهانی ایلسین ارشاد

گلین کماندان ائده ک طرد تیر تکفیری
قولاق وئره ک معجزه بیز هر چا بادا باد


دلگشادر[ویرایش]

بو باغچا خیلی دلگشادور
گل باغی دئسم اونا روادور

یوخ، یوخ بهشتدور بومأوا
گل باغی دئمه ک اونا خطادور

گلدانلار ایچینده خوشجا گللر
به به نه قدر فرحفزا دور

دیوار حیاطدور بو یاران
یا آئینۀ بدن نما دور

سرو قد یار دلبر تک
لیمو آغاجلاری اوجا دور

باخدیقجا کونول گلیر نشاطه
احسن احسن نه دلربا دور

بو عالم عشقدور خدایا
که بیله گوزه ل و خوش هوادور

صد برگ بنفشه ماشاءالله
گویا اوگلین، بو کدخدادور

شبویه نظر قیلین سیز آلله
باخ گور نئجه خوش و با صفادور

بایراغی زمرد ایله همتا
اما گلی لعل پر بهادور

بیر چای بو سلیقه لی حیاطدا
میل ایله که روح ایچون غذادور

بلیل دئدی معجزه که بو یر
بو باغچه جنت خدا دور

چون وارد معجزی گورنده
سویلر که بیر ئوزگه ماجرادور

پایان جلد اول

جلد دوم

یانار اولدوز